16 اقپان, 16:21 309 0 جاڭالىقتار انار لەپەسوۆا

شاكەن ايمانوۆتىڭ فيلمدەرى YouTube-كە جۇكتەلدى

 قازاق كينوسىنىڭ ساڭلاعى، كسرو حالىق ءارتيسى شاكەن ايمانوۆتىڭ تۋعان كۇنىنە وراي حاس شەبەردىڭ اكتەرلىك جانە رەجيسسەرلىك جۇمىستارىن YouTube جەلىسىنەن كورۋگە بولادى. 

اتالمىش ەڭبەكتەردى «قازاقفيلم» كينوستۋدياسى ءوزىنىڭ رەسمي ارناسىنا جۇكتەدى. 

- 15 اقپان – ەلىمىزدىڭ كينوگەرلەرى ءۇشىن ەرەكشە كۇن. بۇگىن اتى اڭىزعا اينالعان شاكەن ايمانوۆتىڭ تۋعان كۇنى. كينوستۋديانىڭ رەسمي الەۋمەتتىك جەلىلەرىندە وتاندىق فيلمدەردى عالامتوردان قالاي كورۋگە بولاتىنى تۋرالى ءجيى سۇرايدى. ءبىز YouTube جەلىسىندەگى ارنامىزدى ۇنەمى جاڭارتىپ وتىرۋعا تىرىسامىز. سوندىقتان دا قازاق كينوسىنىڭ كلاسسيگى شاكەن كەنجەتايۇلى قاتىسقان بارلىق فيلمدەردى youTube جەلىسىنە جۇكتەپ، بارلىق قازاقستاندىقتارعا وسىنداي سىيلىق جاساۋدى شەشتىك، - دەدى «قازاقفيلم» كينوستۋدياسىنىڭ پرەزيدەنتى، قازاقستاننىڭ ەڭبەك سىڭىرگەن قايراتكەرى ارمان اسەنوۆ.

شاكەن ايمانوۆ كينو الەمىنە 1938 جىلى كەلدى. ءدال سول جىلى ول قازاقتىڭ تۇڭعىش دىبىستى ءفيلمى «امانگەلدى» كارتيناسىنىڭ ەپيزودىنا تۇسكەن بولاتىن. ودان كەيىن اكتەر «رايحان»، «اق راۋشان»، «اباي اندەرى»، «التىن ءمۇيىز»، «جامبىل»، «ءبىز وسىندا تۇرامىز»، «ءبىزدىڭ سۇيىكتى دارىگەر»، «ءبىر اۋداندا»، «الدار-كوسە» جانە «قيىلىس» فيلمدەرىنە تۇسكەن.

1954 جىلى ايمانوۆ رەجيسسەر رەتىندە ءوزىنىڭ العاشقى ءفيلمىن ءتۇسىردى. جالپى ءوزىنىڭ شىعارماشىلىق جولىندا ول 11 كوركەم تۋىندىلاردى جاساپ شىعاردى، ولار: «دالا قىزى»، «ماحاببات تۋرالى داستان»، «ءبىز وسىندا تۇرامىز»، «ءبىزدىڭ سۇيىكتى دارىگەر»، «ءبىر اۋداندا»، «ءان شاقىرادى»، «قيىلىس»، «الدار كوسە»، «اتامەكەن»، «تاقيالى پەرىشتە» جانە «اتاماننىڭ اقىرى».

بۇگىننەن باستاپ بۇل فيلمدەردىڭ بارلىعىن «قازاقفيلم» كينوستۋدياسىنىڭ youtube جەلىسىندەگى ارناسىنان كورۋگە بولادى. ودان بولەك، «قازاقفيلم» كينوستۋدياسى قازاق كينوسىنىڭ التىن قورىنا ەنگەن باسقا دا فيلمدەردى ءوزىنىڭ youtube جەلىسىندەگى رەسمي ارناسىنا جۇكتەۋدى جوسپارلاپ وتىرعانىن ايتا كەتكەن ءجون. ەستەرىڭىزگە سالا كەتسەك، بىلتىر قازاق ايىندا رەسمي youtube-ارناسىنا تاۋەلسىزدىك جىلدارى جارىق كورگەن 4 تولىقمەتراجدى جانە 15 قىسقامەتراجدى انيماتسيالىق فيلمدەر جۇكتەلگەن بولاتىن.

سوڭعى جاڭالىقتار