15 اقپان, 15:14 5225 0 ونەر انار لەپەسوۆا

"ابدىحالىقوۆتىڭ ءىسى مايشاممەن قارالادى": مينيستر تەاتر ارتىستەرىنە ءمان-جايدى ءتۇسىندىردى

مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىنداعى ۇجىمنان جىك شىقتى. ءبىر توپ ونەر يەسى قارا شاڭىراقتىڭ ديرەكتورى ءسابيت ابدىحالىقوۆ قالسىن دەسە، ەكىنشى تاراپ ول ديرەكتور بولۋعا لايىقتى ەمەس دەيدى.

بەرەكەسى قاشقان ۇجىمعا باسۋ ايتىپ، ماسەلەنىڭ ءمانىسىن ءتۇسىندىرۋ ءۇشىن مادەنيەت جانە سپورت ءمينيسترى اقتوتى رايىمقۇلوۆانىڭ ءوزى كەلىپ، داۋدىڭ ورتاسىندا قالدى، دەپ حابارلايدى "استانا" ارناسى. 

مۇحتار اۋەزوۆ تەاترىنىڭ ديرەكتورى ءسابيت ابدىحالىقوۆ بۇل ۇجىمعا 2018 جىلدىڭ جەلتوقسانىندا كەلگەن. ءبىر اي بۇرىن ءوز ەركىمەن جۇمىستان كەتۋ تۋرالى ءوتىنىش جازعان. وسىدان كەيىن قارا شاڭىراقتاعى ۇجىمنان بەرەكە كەتتى. ارتىستەردىڭ ءبىر توبى ونىڭ قالۋىن تالاپ ەتىپ، مينيسترلىككە حات جازعان. ال ەكىنشى ءبىر توبى ءسابيت ابدىحالىقوۆتى بۇل قىزمەتكە لايىق ەمەس، ورنىن بوساتقانى دۇرىس دەيدى.

"تەاتر جاڭا جىلعا دەيىن جوسپارىن ورىندادى، قانشاما كورەرمەن جينادى، قانشاما جوسپار قۇردى. قازىر تەاتردا ىستەپ جۇرگەن جىگىتتەردىڭ كوڭىل-كۇيى جوق. تەاتر قازىر جۇمىس ىستەمەي تۇر. ءبىر ايدان بەرى وسىنداي كۇيدەمىز. بۇل ونەردى ويلاۋ ما، الدە اركىم ءوزىنىڭ جەكە باسىن ويلاۋ ما؟", - دەيدى قازاقستاننىڭ ەڭبەك سىڭىرگەن قايراتكەرى بولات ءابدىلمانوۆ.  

ء"بىزدىڭ تەاترعا جوعارى ءبىلىمدى، تالعامى بيىك، ونەگەلى تۇلعا قاجەت. مەن سول كەزدە ء"سابيت ابدىحالىقوۆ مەن ءۇشىن تۇلعا ەمەس، ءبىزدىڭ تەاترعا لايىق ەمەس" دەپ ايتقانىم راس. ول تەاتر سالاسىندا رەجيسسەر ەمەس، اكتەر ەمەس، كىم ەكەنىن بىلمەيمىن", - دەپ اتاپ ءوتتى قازاقستاننىڭ ەڭبەك سىڭىرگەن قايراتكەرى ءداريا ءجۇسىپ.

تەاتردان شىققان داۋدى باسۋعا، ءارى ماسەلەنىڭ ءمانىسىن جەتە ءتۇسىنۋ ءۇشىن تەاترعا مادەنيەت جانە سپورت ءمينيسترى ارنايى كەلگەن. ول تەاتر ديرەكتورىنىڭ ءوزى ارىز جازعانىن، ءارى قازىر جۇمىسقا جارامسىز دەگەن مەديتسينالىق قاعازبەن ورنىندا جوق ەكەنىن ايتتى. 

"قۇداي قالاسا ءوزى شىعىپ، ايتادى. جەلتوقسان ايىندا ەسەپ كوميتەتى كەلىپ كەتتى. ەسەپ كوميتەتىنىڭ وسى اكىمشىلىككە، ديرەكتورعا وتە كوپ سۇراعى بار. وسى تەاتردىڭ ەسەبىنەن 1 ميلليون اقشا ايىپپۇل تولەگەن", - دەيدى مادەنيەت جانە سپورت ءمينيسترى اقتوتى رايىمقۇلوۆا.

دەگەنمەن سابىرعا كەلەتىن ارتىستەر ەمەس. ولار ءوز اراسىندا ورتاق كەلىسىمگە كەلە الماي وتىر.

"ونداي كىسىنىڭ جەتەكشىلىگىندە مەن جۇمىس ىستەي المايمىن. نەگە دەسەڭىز، ءازىل-ىسقاق الەمىنىڭ ءبىر ادامى بۇكىل قارا شاڭىراق، قازاقتىڭ العاشقى تەاترىن باسقارىپ وتىر. بۇل فاكتىنىڭ ءوزى سۇمدىق قوي", - دەيدى قازاقستاننىڭ ەڭبەك سىڭىرگەن قايراتكەرى بەرىك ايتجانوۆ.

جينالعانداردىڭ ايتۋىنشا، جاڭا جىلدان باستاپ مەملەكەتتىك تەاتر ارتىستەرىنىڭ جالاقىسى 50 پايىزعا وسكەن. ال ساحنا سىرتىنداعى تەحنيكالىق قىزمەتكەرلەرگە اقشا قوسىلماپتى. ودان بولەك تەاتر ماڭىنا اۆتوتۇراق جاساپ بەردى دەدى. 

جوسپار بويىنشا بيىل تەاتر كۇردەلى جوندەۋدەن ءوتۋ كەرەك ەدى. ول ءۇشىن ۇكىمەت تاراپىنان قولداۋ دا كورسەتىلگەن. الايدا تەاتر باسشىسى ءبىر جىلدان بەرى تاريحي نىساننىڭ جاڭا كەلبەتىنە قاتىستى سمەتالىق قۇجاتتى ءالى كۇنگە دەيىن وتكىزبەگەن. مۇنى مينيستر ايتتى. ول ول ما، قازاق دراما تەاترىنىڭ ديرەكتورىنىڭ ءىسى الداعى ۋاقىتتا مايشاممەن قارالاتىنىن ەسكەرتتى.

 

سوڭعى جاڭالىقتار