15 اقپان, 12:18 715 0 الەۋمەت انار لەپەسوۆا

شامالعانداعى اپاتتا زارداپ شەككەن وتباسى 40 ملن تەڭگە تالاپ ەتتى

شامالعانداعى تەمىرجولدا بولعان اپاتتا زارداپ شەككەن وتباسى 40 ميلليون تەڭگە مورالدىق شىعىن تالاپ ەتتى. بۇل تۋرالى Astana ارناسى حابارلادى.

الماتى وبلىسىندا تەمىرجولدا بولعان جانتۇرشىگەرلىك اپاتتا زارداپ شەككەن وتباسى قوماقتى قارجىنى  مورالدىق شىعىن رەتىندە تالاپ ەتەدى. ويتكەنى جابىرلەنۋشى ەلميرا جانىبەكوۆانىڭ 4 جانە 5 جاستاعى قوس قىزى قازىر مۇگەدەكتەر ارباسىندا.

ال بەكەتتەگى قايعىلى وقيعاعا كۇدىكتى رەتىندە سول كۇنى وتكەلدە كەزەكشىلىك ەتكەن ازامات تارتىلعان. 

الماتى وبلىسىنداعى جانتۇرشىگەرلىك اپاتتىڭ بۇگىنگى كەزەكتى سوت وتىرىسىنا كەلگەندەردىڭ قاراسى قالىڭ. سوتقا 50-دەن استام كۋاگەر مەن جابىرلەنۋشى بارعان. وتىرىس باستالا سالىسىمەن سۋديا، ءسوزدى جابىرلەنۋشى ەلميرا جانىبەكوۆاعا بەردى. كەلىنشەك قوس قىزىمەن بىرگە سول كۇنى اۆتوبۋس ىشىندە بولعان. 

"اۆتوبۋستان شىعا المايتىنىمدى بىلگەننەن كەيىن ەكى بالامدى جۇرگىزۋشىنىڭ ارتىنا ورىندىققا وتىرعىزدىم. وتىرعىزىپ ۇلگەرگەنىمدە پوەزد كەلىپ سوقتى. ودان كەيىنگى ەسىمدى جوق تەك دالادا جيدىم. قازىر بالالارىم دا ءوزىم دە ۇيدەمىن. جولداسىم قاراسۋدا. ويتكەنى ەكى بالام دا مۇگەدەكتىك الدى", - دەدى ەلميرا جانىبەكوۆا. 

جۇرەگى قان جىلاعان انا قىزدارىنىڭ كەلەشەگىنە الاڭدايدى. دارىگەرلەر قولدان كەلگەندى جاساعانىمەن، بۇلدىرشىندەرىم وزدىگىنەن ءجۇرىپ-تۇرا المايدى دەيدى. قورعاۋشىسى سوت وتىرىسىندا وتباسىنىڭ مورالدىق شىعىنىن وتەپ بەرۋدى سۇرادى.

"قازاقستان تەمىرجولى ۇلتتىق كومپانياسى اكتسيونەرلىك قوعامى وسى قىلمىستىق ءىس بويىنشا ازاماتتىق جاۋاپكەر رەتىندە تانىلۋى ءتيىس دەپ سانايمىن. جانە قاسكەلەڭ اۆتوبۋس پاركى ونىڭ جۇمىس بەرۋىشىسى وسى ءىس بويىنشا ازاماتتىق جاۋاپكەر بولۋى ءتيىس. جابىرلەنۋشى جانىبەكوۆا جانە ەكى كامىلەتكە تولماعان بالاسى مورالدىق زياندى ارقايسىسىنا 20 ملن تەڭگە دەپ باعالاپ وتىر", - دەيدى جابىرلەنۋشىنىڭ قورعاۋشىسى انار شىنىبەكوۆا.    

ەلدى دۇرلىكتىرگەن اپاتقا كۇدىكتى رەتىندە سول كۇنى وتكەلدە كەزەكشىلىك كەتكەن 60 جاستاعى دوسباتىر احمەتجانوۆ تارتىلعان. پروكۋرور وعان تەمىر جول قوزعالىسى قاۋىپسىزدىگىنىڭ ەرەجەسىن بۇزىپ، ابايسىزدا ادام ولىمىنە اكەپ سوققان دەگەن ايىپ تاققان. اتالمىش ايىپپەن كۇدىكتىنىڭ ادۆوكاتى كەلىسپەيدى. ول ءومىرىنىڭ جارتىسىن ءوز قىزمەتىنە ادال ارناعان ازاماتتىڭ ەش كىناسى جوعىنا سەنىمدى. سوندىقتان ىسكە قاتىستى ساراپتامالاردى "قايتا جۇرگىزۋ كەرەك" دەدى. 

"ايىپتاۋ اكتىسى مەنىڭ ويىمشا سولونەنكا مەن كولەشنيكوۆتىڭ قورىتىندىسى نەگىزىندە جاسالعان. ول دۇرىس ەمەس. 55 سەكۋند كەشىرەك كوك نۇكتەنى باستى دەپ تۇر. ول ەش جەردە نۇكتەنى ءدال ۋاقىتىندا باستى ما كەش باستى ما بىردە-ءبىر پريبور ەش جەردە ەسەپتەمەيدى. بۇل ورىسشا ايتقاندا "يسكات نە پريچينۋ، ا كراينوگو چەلوۆەكا كوگو موجنو بىلو سوجات", - دەدى الماتى وبلىسى قورعاۋشىلار القاسىنىڭ قورعاۋشىسى ءشاميان جايىلزانوۆ.    

ال تەرگەۋ مالىمەتتەرىنە سەنسەك، ديسپەتچەر ءوز مىندەتىن دۇرىس ورىنداماي، تەمىر جول قوزعالىسى قاۋىپسىزدىگىنىڭ ەرەجەسىن بۇزعان. اپات قاۋپى تونگەندە وتاربانىڭ ماشينيستىنە جىلدامدىقتى تەجەۋ تۋرالى حابار دا بەرمەگەن دەدى. سوت وتىرىسىندا كۋاگەرلەردە سۋدياعا كورگەن-بىلگەنىمەن ءبولىستى. 

ايتا كەتەيىك، شامالعان بەكەتىندەگى اپات بىلتىر قىركۇيەكتە بولعان. وتكەلدە تۇرعان اۆتوبۋس بەن جۇيتكىگەن پويىز سوعىسىپ، قوعامدىق كولىك جۇرگىزۋشىسى وقيعا ورنىندا ءتىل تارتپاي كەتتى. سونداي-اق ءۇش ادام جانساقتاۋ بولىمىنە ءتۇستى. 

جالپى جانتۇرشىگەرلىك اپاتقا قاتىستى ىستە 50-دەن استام كۋاگەر بار. بۇگىنگى وتىرىستا ولاردىڭ جارتىسىنان عانا جاۋاپ الىندى. سوتتا كۇدىكتى دوسباتىر احمەتجانوۆتىڭ كىناسى دالەلدەنسە، 7 جىلعا دەيىن باس بوستاندىعىنان ايىرىلۋى مۇمكىن  ەكەنى ەسكەرتىلدى. وعان قوسا ازامات 10 ميلليون تەڭگە ماتەريالدىق شىعىندى ءوتىپ بەرۋى ءتيىس. 

سوڭعى جاڭالىقتار