15 اقپان, 11:04 355 0 مادەنيەت انار لەپەسوۆا

قازاقستاننىڭ ۇزدىك تەاترلارى انىقتالدى

2020 جىلعى 13 اقپان كۇنى «حالىقارالىق تەاتر سىنشىلارى بىرلەستىگىنىڭ» – «International Union of Theatre Critics» تۇساۋكەسەرى ءوتتى. حالىقارالىق بىرلەستىكتىڭ قۇرىلتايشىلارى – تەاتر سىنشىلارى انار ەركەباي، لاشا چحارتيشۆيلي جانە ەلچين دجافاروۆ.

انار ەركەباي

بىرلەستىكتىڭ قازاقستاندىڭ جەتەكشىسى، ونەرتانۋ كانديداتى، تەاتر سىنشىسى انار ەركەباي: «حالىقارالىق تەاتر سىنشىلارى بىرلەستىگىنىڭ ماقساتى – تەاترتانۋشىلار مەن قازاقستان تەاترلارىنىڭ بايلانىسىن نىعايتۋ، قويانقولتىق جۇمىس ىستەۋ. شەتەلدەردە تەاترتانۋشىلاردىڭ دارەجەسى جوعارى باعالانىپ، ولار ءوز تەاترلارىن وزگەلەرگە تانىستىرۋعا ىقپال ەتەدى. ءبىز دە قازاق تەاترىن شەتەلدە تانىستىرعىمىز كەلەدى. الداعى جوسپارىمىزدا حالىقارالىق دەڭگەيدەگى ءتۇرلى جوبالار بار. ەڭ باستى ماقساتىمىز – بۇگىنگى قازاق تەاترىنىڭ نەگىزگى تەندەنتسيالارىن انىقتاپ، ونىڭ دامۋى جولىندا جۇمىس ىستەۋ»، - دەپ اتاپ ءوتتى.

تەاترتانۋشىلار قازاقستاندىق مەملەكەتتىك جانە تاۋەلسىز تەاترلار اراسىندا ارنايى ساۋالناما جۇرگىزىپ، وعان قاتىسقان 43 تەاتر اراسىندا 2019 جىل بويىنشا جالپى ستاتيستيكاسىن جاسادى. سونىمەن قاتار، "سىنشىلار جۇلدەسى" دەپ اتالاتىن ارنايى ديپلومدارمەن ۇزدىك دەپ تابىلعان تەاترلاردى ماراپاتتادى. ولار:

1) اۋەزوۆ ات. قازاق مەملەكەتتىك اكادەميالىق دراما تەاترى ۇزدىك سايت ءۇشىن;

2) تەمىرتاۋ بالالار مەن جاسوسپىرىمدەر تەاترى «ۆ گوستياح ۋ تروللي» سپەكتاكلى ءۇشىن;

3) الماتى مەملەكەتتىك قۋىرشاق تەاترى «ايكو مەن ستروشكا» قويىلىمى ءۇشىن;

4) رەجيسسەر د.بازارقۇلوۆ 2019 جىلعى 3 پرەمەرا ءۇشىن;

5) ق.قۋانىشباەۆ ات. قازاق مەملەكەتتىك اكادەميالىق مۋزىكالىق دراما تەاترى «ءلايلى-ءماجنۇن» سپەكتاكلى ءۇشىن.

«م.و.اۋەزوۆ مۇراجاي-ءۇيى» عىلىمي-مادەني ورتالىعىنىڭ ءماجىلىس زالىندا وتكەن تۇساۋكەسەر راسىمىنە قر تەاتر قايراتكەرلەرى وداعىنىڭ مۇشەلەرى، قازاقستان تەاترلار اسسوتسياتسياسىنىڭ وكىلدەرى، الماتى قالاسىندا ورنالاسقان تەاتر ۇجىمدارىنىڭ باسشىلارى، رەجيسسەر، اكتەر، دراماتۋرگيا سالاسىنىڭ بەلگىلى ماماندارى كەلىپ، بىرلەستىكتىڭ قۇرىلۋىمەن قۇتتىقتاپ، الداعى ىسىنە ساتتىلىك تىلەدى.

سوڭعى جاڭالىقتار