14 اقپان, 20:17 2289 0 جاڭالىقتار انار لەپەسوۆا

15 جىل بويى قازاقستاندا قۇلدىقتا بولعان شەتەلدىك ءوز ەلىندە ولىلەر ساناتىنا قوسىلعان

قاراعاندىدا 15 جىل قۇلدىقتا بولعان سالاۆات ەسىمدى رەسەي ازاماتى ءوزىنىڭ ءتىرى ەكەنىن دالەلدەپ شىقتى. قوجايىنى قايتىس بولعان سوڭ عانا بوستاندىق العان ازامات ءوز ەلىندە ولىلەر ساناتىنا قوسىلعان، دەپ حابارلايدى "استانا" تەلەارناسى. 

سالاۆات اسكەردە بورىشىن وتەگەن سوڭ قازاقستانعا كەلىپتى.

وسىندا ءجۇرىپ، قۇجاتتارىن جوعالتىپ العان. سول كەزدە تانىسى وعان ءوزىنىڭ اتا-اناسىنىڭ قولىندا جۇمىس ىستەۋدى ۇسىنعان. ەر ادام بۇل ۇسىنىسقا كەلىسكەن، الايدا، 15 جىل بويى قۇلدىقتا ءومىر سۇرەتىنى ويىنا دا كىرمەسە كەرەك.

ۇزاق جىلدار بويى ول تاماق پەن باسپانا ءۇشىن مال باعىپ، ءۇي شارۋاسىن اتقارىپ كەلگەن. تەك قوجايىنى قايتىس بولعان سوڭ عانا بوستاندىققا شىعۋىنا مۇمكىندىك پايدا بولىپتى. سالاۆات وتانىنا ورالۋعا نيەتتەنگەن، الايدا، ول جاقتا ەر ادامدى باياعىدا ولىلەر قاتارىنا قوسىپ قويعانى بەلگىلى بولدى.

"كەلمەي اق قويساڭىز بولادى، ءسىز ولىلەر قاتارىنداسىز دەدى. قايتىس بولعانىم تۋرالى انىقتاما دا بار ەكەن. ونى ەلشىلىكتەن بەردى. 2003 جىلى مەنى رەسەيدە جەرلەپ قويىپتى", – دەيدى سالاۆات.

ەر ادام اقىرى سوت ارقىلى ءوزىنىڭ ءتىرى ەكەنىن دالەلدەگەن. الايدا، ءالى دە قۇجاتتارىن قالپىنا كەلتىرە الماي ءجۇر. ول بۇگىندە ۇيسىزدەرگە ارنالعان باسپانادا تۇرىپ، ءار جەردە پايدا تاۋىپ كۇنىن كەشۋدە.

ەلىمىزدە تاعدىرى وسىعان ۇقسايتىن ادامداردىڭ قاراسى كوپ ەكەنى بەلگىلى بولدى. وتكەن جىلدىڭ وزىندە 76 ازامات ادام ساۋداسىنىڭ قۇربانى بولعان. ولاردىڭ باسىم بولىگى – ەر ادامدار. سونداي-اق ءبىر بالانىڭ دا ساۋداعا سالىنعانى انىقتالدى. ادەتتە ولاردى قازاقستان اۋماعىندا ساتقان. 2019 جىلى ادامدى شەتەلگە ساتۋدىڭ ءبىر عانا وقيعاسى تىركەلگەن ەكەن.

ء"بىر ادام تۇركياعا ساتىلعان. قالعان جاعدايلاردا ادامدار قازاقستان اۋماعىندا پايدالانىلعان. ولاردىڭ جيىرماسى – قازاقستان ازاماتى. بۇلاردى ءبىر قالالاردان الىپ كەتىپ، باقسا قالادا ساتقان. ياعني، ىشكى ادام ساۋداسى. ال ادامداردى شەتەلدەن ەل اۋماعىنا الىپ كىرۋدىڭ 50 وقيعاسى انىقتالعان", – دەيدى بۇۇ-نىڭ ميگراتسيا بويىنشا حالىقارالىق ۇيىمىنىڭ ۇلتتىق وفيتسەرى اليا بەلونوسوۆا.

بۇۇ وكىلىنىڭ ايتۋىنشا، ادەتتە وزبەكستان، رەسەي، مولدوۆا، فيليپپين جانە قىتاي ازاماتتارى ساۋداعا سالىنادى. ولاردى نەگىزىنەن ءۇي شارۋاشىلىعىندا، قۇرىلىستا، فەرمالاردا جانە سەكس-يندۋستريادا پايدالانادى.

سوڭعى جاڭالىقتار