14 اقپان, 17:53 1190 0 ايماق انار لەپەسوۆا

جاڭا قىزمەتىندەگى العاشقى جيىن: ساپارباەۆ قاراماعىنداعىلارعا قانداي تاپسىرما بەردى؟

جامبىل وبلىسى اكىمى قىزمەتىنە كىرىسكەن بەردىبەك ساپارباەۆ العاشقى اپپارات كەڭەسىن وتكىزدى. بۇل تۋرالى ايماق اكىمدىگىنىڭ ءباسپاسوز قىزمەتى حابارلادى. 

جيىندا وبلىس اكىمى ءوڭىردىڭ ودان ءارى دامۋى مەن ەكونوميكالىق جانە الەۋمەتتىك ساياساتتاعى باسىم باعىتتارى تۋرالى ءوز ويىن ورتاعا سالدى.

"ەڭ باستى تالاپ- مەملەكەت باسشىسىنىڭ تاپسىرمالارىن ساپالى جانە ۋاقىتىلى ورىنداۋ.

وتكەن جىلدىڭ قورىتىندىسى بويىنشا وبلىس جاقسى الەۋمەتتىك-ەكونوميكالىق كورسەتكىشتەرگە قول جەتكىزدى. وسى قارقىندى تومەندەتپەۋ كەرەك", - دەپ اتاپ ءوتتى ءوڭىر باسشىسى.

اكىمدىكتىڭ حابارلاۋىنشا، وبلىستىڭ الەۋەتى ايتارلىقتاي جوعارى، الايدا اعىمداعى جىلدىڭ ءبىرىنشى ايىندا ونەركاسىپ، قايتا وڭدەۋ، ينۆەستيتسيا تارتۋ سياقتى سالالاردا تومەندەۋگە جول بەرىلگەن.

يگەرىلگەن قاراجاتتىڭ كولەمى بويىنشا ايتارلىقتاي ارتتا قالۋى بايقالعان.

ەندى وسى باعىتتا بيۋدجەتتىك باعدارلامالاردىڭ ورىندالۋ بويىنشا جۇمىستاردى كۇشەيتۋ قاجەت ەكەن.

Cاپارباەۆ قىزمەتكەرلەرىنە ناقتى تاپسىرما بەردى.

  • "قازفوسفات" جشس جانە "ەۆروحيم" سياقتى جەرگىلىكتى ونەركاسىپتىڭ الىپتارىمەن تىعىز جۇمىس ىستەۋ، وڭىرگە ءىرى وتاندىق جانە شەتەلدىك ينۆەستورلاردى تارتۋ قاجەت.
  • وبلىس اكىمى امانگەلدى گاز كەن ورنىنىڭ دا قارقىندىلىعىن ارتتىرۋ ءۇشىن سالالىق مينيسترلىكتىڭ كومەگىمەن اۋقىمدى گەولوگيالىق بارلاۋ جۇمىستارىن جۇرگىزۋ قاجەتتىگىن جەتكىزدى.
  • كۇن تارتىبىندە كوتەرىلگەن ماسەلەلەردىڭ ءبىرى – كوكتەمگى ەگىس جۇمىستارىنا دايىندىق، اۋىل شارۋاشىلىعى تەحنيكاسىن ۋاقىتىندا دايىنداۋ، جوعارى ساپالى تۇقىم ساتىپ الۋ جانە وتىرعىزۋ بولدى.

سونىمەن قاتار ساپارباەۆ اۋىل تۇرعىندارىنىڭ تۇرمىستىق تابىسىن ارتتىرۋ پيلوتتىق جوباسىنىڭ مىندەتتى تۇردە ءوز جالعاسىن تاباتىندىعىن، ول باستاپقى قارقىنىنىڭ تومەندەمەۋىن باسا ايتىپ، جاۋاپتىلارعا ناقتى تاپسىرمالار جۇكتەدى.

"اۋىل تۇرعىندارى جىل بويى جۇمىسپەن قامتىلىپ، ەگىن شارۋاشىلىعىمەن دە، مال شارۋاشىلىعىمەن دە اينالىسۋى كەرەك. بۇل ورايدا پيلوتتىق جوباعا بولىنگەن 7,2 ميلليارد تەڭگە تولىق كولەمدە يگەرىلۋى ءتيىس. ءبىز جوبانىڭ ومىرشەڭدىگىن كورسەتۋىمىز كەرەك، بۇل الداعى ۋاقىتتا قارجىلاندىرۋ كولەمىن ۇلعايتۋعا جانە كوپ ادامداردىڭ ماتەريالدىق جاعدايىن جاقسارتۋعا مۇمكىندىك بەرەدى", - دەپ اتاپ ءوتتى وبلىس باسشىسى.

سونداي-اق، حالىقارالىق اۋەجايعا يە بولا وتىرىپ، تەك ىشكى قازاقستاندىق باعىتتار بويىنشا عانا ەمەس، ەلارالىق اۋە قاتىناستارىنىڭ سانىن بىرنەشە ەسە ۇلعايتۋ قاجەت ەكەنى ايتىلدى.

ال ءبىلىم بەرۋ سالاسىندا اپاتتى جانە ءۇش اۋىسىمدى مەكتەپتەردى جويۋ ءۇشىن 17 مەكتەپ اشۋ قاجەت ەكەنى بەلگىلى بولدى. وڭىردەگى الەۋمەتتىك-مادەني نىسانداردىڭ قۇرىلىسى دا ءوز جالعاسىن تاپپاق.

سونىمەن قاتار، تاۋار اينالىمىن ۇلعايتۋ ءۇشىن وبلىستىڭ ترانزيتتىك الەۋەتىن كەڭىنەن پايدالانىپ، بالامالى ەنەرگەتيكا سالاسىندا التى ستانتسيانىڭ قۇرىلىسىن اياقتاۋ جانە كەس، جەس-تەردەن الىناتىن ەلەكتر ەنەرگياسىنىڭ جيىنتىق قۋاتىن 400 مۆت-قا دەيىن جەتكىزۋ كوزدەلۋدە.

جيىندا جامبىلدىقتاردىڭ تابىس دەڭگەيىن ارتتىرۋ، سالىق سالۋ بازاسىن ۇلعايتۋ، مىندەتتى مەديتسينالىق ساقتاندىرۋ جۇيەسىن ەنگىزۋ، جالاقى بويىنشا بەرەشەكتەردى جويۋ، مەديتسينالىق قىزمەت ساپاسىن ارتتىرۋ، دەنساۋلىق ساقتاۋداعى بيۋروكراتيا دەڭگەيىن تومەندەتۋ، جاستاردى رۋحاني-ادامگەرشىلىك تاربيەلەۋ، اتا-انالار مەن مەكتەپ اراسىنداعى بايلانىستى نىعايتۋ سياقتى وزەكتى ماسەلەلەر دە  جان-جاقتى كوتەرىلىپ، سارالاندى.

كەڭەستى قورىتىندىلاي كەلە، بەردىبەك ساپارباەۆ جاۋاپتى مەملەكەتتىك ورگاندار قورداي اۋدانىندا بولعان وقيعالاردان قورىتىندى شىعارۋ كەرەكتىگىن اتاپ ءوتتى.

"بۇل جاعداي بىزگە ساباق بولۋ كەرەك. وسى سەكىلدى قايعىلى وقيعالار الداعى ۋاقىتتا قايتالانباس ءۇشىن ءتيىستى شەشىم شىعارا ءبىلۋىمىز قاجەت. مەملەكەتتىك ورگاندار، جۇرتشىلىق پەن ينتەلليگەنتسيا ءوز كۇش-جىگەرىن بىرىكتىرىپ، قوعامداعى بىرلىك پەن كەلىسىمدى ساقتاۋ بويىنشا جۇمىس جۇرگىزۋى ءتيىس", - دەپ تۇيىندەدى ول.

سوڭعى جاڭالىقتار