14 اقپان, 13:50 2513 0 قاۋىپسىزدىك انار لەپەسوۆا

شەتەلدىك ءنومىرلى كولىكپەن جول ەرەجەسىن بۇزعان ەلوردالىققا 5 ملن تەڭگە ايىپپۇل سالىندى

ءبىر جارىم جىل جول ەرەجەسىن بۇزعان ەلوردالىق جۇرگىزۋشىگە «سەرگەك» كامەراسىنىڭ دالەلىمەن 5 ملن تەڭگە ايىپپۇل سالىندى. 

نۇر-سۇلتان قالاسىنىڭ مامانداندىرىلعان اۋدانارالىق اكىمشىلىك سوتىنىڭ توراعاسى ءۋاليحان راحماتۋللاەۆ ەلوردادا وتكەن ءباسپاسوز ءماسليحاتىندا ەلوردادا اكىمشىلىك ىستەردىڭ سانى بىلتىر 2018 جىلمەن سالىستىرعاندا 3,5 مىڭعا وسكەنىن ايتتى، دەپ حابارلايدى قازاقپارات.

«سەرگەك» كامەرالارى قالامىزدىڭ وتە كوپ جەرىندە ورناتىلعان. ولار وزدەرىنىڭ ءتيىستى دەڭگەيىندە جۇمىستارىن اتقارىپ جاتىر. ءبىزدىڭ جۇمىستىڭ كوبەيىپ كەتۋىنىڭ سەبەبى – «سەرگەك» كامەرالارىنا بايلانىستى كوپ كەلىسپەۋشىلىك تۋىنداپ وتىر. «سەرگەك» كامەرالارىمەن تاعايىندالعان ايىپپۇلدارعا كەلىسپەي، شاعىم كەلتىرۋ بويىنشا بىزگە ارىز كوپ تۇسۋدە. وسى جاعداي بىزدە قارالاتىن ءىستىڭ كوبەيگەنىن كورسەتتى»، - دەدى ءۋاليحان راحماتۋللاەۆ قالالىق مامانداندىرىلعان اۋدانارالىق اكىمشىلىك سوتتا وتكەن ءباسپاسوز ءماسليحاتىندا.

ونىڭ ايتۋىنشا، ءبىر ازاماتقا «سەرگەك» كامەراسى ارقىلى ايىپپۇل كەلەتىن بولسا، ول ايىپپۇلمەن كەلىسپەگەن جاعدايدا اكىمشىلىك سوتقا جۇگىنىپ، كىنالى ەمەس ەكەنىن دالەلدەۋىنە مۇمكىندىك بار. ال نۇر-سۇلتان قالالىق سوتىنىڭ اپپەلياتسيالىق القا سۋدياسى مادەنيەت وماربەكوۆا ءباسپاسوز ءماسليحاتىندا ءبىر ءىستى مىسالعا كەلتىردى.

«باسقا ەلدىڭ نومىرلەرىن تاققان كولىكتەر بىزدە وسى ۋاقىتقا دەيىن تىركەلمەي كەلگەنىن بىلەسىزدەر. وسىنى پايدالانعان جۇرگىزۋشىلەردىڭ ءبىرى جىلدامدىقتى اسىرىپ، ءبىر ءوزى 5 ملن تەڭگە ايىپپۇل ارقالادى. ول ايىپپۇلداردىڭ بارىنە قايتا شاعىم ءتۇسىرىپ، كولىكتى ايداعان ءوزى ەمەس ەكەنىن دالەلدەپ باققان. ال «سەرگەك» ونى ءبارىن ءتۇسىرىپ العان. ال ونىڭ كولىگى رەسەي فەدەراتسياسىنىڭ استاناسى ماسكەۋدە تىركەلگەن بولىپ شىقتى. ول ءبىر جارىم جىلدىڭ ىشىندە جول ەرەجەلەرىن بۇزىپ، 5 ملن تەڭگە ايىپپۇل ارقالادى»، - دەدى مادەنيەت وماربەكوۆا.

 

سوڭعى جاڭالىقتار