14 اقپان, 11:19 518 0 ونەر انار لەپەسوۆا

"ديرەكتورىمىز اۋىسپاسىن!": اۋەزوۆ تەاترىنىڭ قىزمەتكەرلەرى پرەزيدەنتكە حات جولدادى

"تۇركىستان" گازەتىنىڭ ەلەكتروندى پوشتاسىنا م.اۋەزوۆ اتىنداعى قازاق مەملەكەتتىك اكادەميالىق دراما تەاترى ۇجىمى، قر حالىق ارتىستەرى، قر ەڭبەك سىڭىرگەن قايراتكەرلەرى اتىنان پرەزيدەنت ق.توقاەۆتىڭ اتىنا جولدانعان حات كەلىپ ءتۇستى. وندا "تەاتر ديرەكتورى ءسابيت ابدىحالىقوۆ باسشىلىق قىزمەتتەن نەگىزسىز الىنعالى جاتىر" دەگەن ونەر ورداسىنىڭ ۇجىمى ق.توقاەۆتان ديرەكتوردىڭ ءوز لاۋازىمىندا قىزمەتىن جالعاستىرۋىنا ىقپال ەتۋىن سۇراعان. سول حاتتىڭ ءماتىنى مەن حاتقا قول قويعاندار ءتىزىمىن وقىرمان نازارىنا ۇسىنىپ وتىرمىز.

قازاقستان رەسپۋبليكاسىنىڭ پرەزيدەنتى ق.ك.توقاەۆقا

قۇرمەتتى قاسىم-جومارت كەمەلۇلى!

م.اۋەزوۆ اتىنداعى قازاق مەملەكەتتىك اكادەميالىق دراما تەاترى ەلىمىزدەگى ماڭىزدى مادەني وشاقتاردىڭ ءبىرى ەكەندىگى وزىڭىزگە ءمالىم. كورەرمەندەردىڭ رۋحاني دامۋىنا ۇلەس قوسىپ كەلە جاتقان قاراشاڭىراقتىڭ جاڭا بەلەستەردى باعىندىرۋىنىڭ باستى كەپىلى تۇراقتىلىق ەكەنى دە داۋسىز. كاسىبي مادەنيەتتىڭ قاينار بۇلاعى بولعان م.اۋەزوۆ اتىنداعى قازاق مەملكەتتىك اكادەميالىق دراما تەاترى – ەلىمىزدىڭ «اكەمتەاترى». اكەمتەاتر قاراشاڭىراعىنان ءوزىنىڭ ەنشىسىن الىپ، اباي اتىنداعى وپەرا جانە بالەت تەاترى، جامبىل اتىنداعى قازاق مەملەكەتتىك فيلارمونيا جانە ەلىمىزدىڭ تەاترلارى شاڭىراق كوتەرىپ، قازىرگى ۋاقىتتا مەملەكەتىمىزدىڭ مادەني قوعامىنىڭ قالاۋشىسى بولعانىنا تاريح كۋا.

2019 جىلى م.اۋەزوۆ تەاترى ەڭسەسىنىڭ كوتەرىلۋى، شىعارماشىلىقتىڭ قايتا جاندانۋىمەن قاتار تەاتر شارۋاشىلىعىنىڭ ءبىر جۇيەگە كەلۋى – ۇيىمنىڭ ديرەكتورى ابدىحالىقوۆ ءسابيت ءابدىمۇتالىۇلىنىڭ كەلۋىمەن تىعىز بايلانىستى. سەبەبى، تەاتر باسشىلىعىنا كەلگەن ءبىر جىل ۋاقىتتىڭ ىشىندە شىعارماشىلىق ۇجىمعا ەركىندىك بەرە وتىرىپ، جاڭا جوبالارعا قولداۋ كورسەتتى، تەاتر رەپەرتۋارى  ءساتتى قويىلىمدارمەن تولىقتى. حالىقارالىق فەستيۆالدەر مەن گاسترولدەر ۇيىمداستىردى. ءبىر جىل ىشىندە كورەرمەندەر سانى 30%-عا ءوسۋى، ءار قويىلىمداردا كورەرمەن زالىندا ورتا ەسەپپەن 70% بولۋى، ەلىمىزدىڭ باسقا تەاترلارىمەن سالىستىرعاندا بۇل سالادا ۇزدىك ەكەنىمىزدى ايتقىمىز كەلەدى. تەاتردىڭ جالپى وندىرىستىك تيىمدىلىگى 20%-عا ارتتى. سونىمەن قاتار، قىزمەتكەرلەرگە الەۋمەتتىك سالادا وڭ جاعداي جاسالىپ، بىرنەشە مارتە سىياقىلارعا يە بولدىق. تەاتردىڭ ۇزاق جىلدار بويى جينالعان ميلليونداعان قارىزىنىڭ تولىقتاي جابىلۋىنا، تەاتردىڭ ءيميدجىنىڭ كوتەرىلۋىنە، تەاتر قىزمەتكەرلەرىنىڭ قاجەتتى جابدىقتارىنىڭ قامتاماسىز ەتىلۋىنە جانە ۇسىنىس-تالاپتارىنىڭ ورىندالۋىنا مۇمكىندىك جاساپ وتىرعان ديرەكتورگە ۇجىم ءدان-ريزا. ديپلوماتيالىق قابىلەتىنىڭ ارقاسىندا سپورت كەشەندەرىندە تەاتر قىزمەتكەرلەرىنە سپورت تۇرلەرىمەن اينالىسۋىنا تەگىن قاتىسۋ مۇمكىندىك جاسادى. بۇل جاسالىپ جاتقان جۇمىستاردىڭ تەك ءبىر جىل ىشىندە اتقارىلعان جەمىسى!

بۇگىنگى كۇنى دە، تەاتر ىشىندە تۇراقتىلىق پەن شىعارماشىلىق دامۋعا دەگەن ۇلكەن سەنىم پايدا بولىپ وتىر. 2019 جىلدا قويىلعان بارلىق ماقساتتار مەن جوسپارلار ارتىعىمەن ورىندالىپ، تەاتردىڭ وسۋىنە، جاڭا دەڭگەيگە شىعۋىنا جول اشىلدى. ءوزىنىڭ يگى باستامالارىمەن تەك قانا تەاتر عانا ەمەس، سونىمەن قاتار الەۋمەتتىك، قايىرىمدىلىق شارالارىنىڭ ءوزى جوعارى دارەجەدە وتكىزىلۋى – تەاترىمىزدىڭ مارتەبەسى ارتىپ، كوشباسشى تەاتر ەكەنىن دالەلدەۋدە. تەاتردا تاريحىندا كوپتەگەن باسشىلار بولدى. قازىرگى زاماننىڭ جاڭا فورماتتاعى زاماناۋي ۇزدىك تەاتر مەنەدجەرى رەتىندە قر ەڭبەك سىڭىرگەن قايراتكەرى، «دارىن» مەملەكەتتىك سىيلىعىنىڭ يەگەرى، جاستار وداعى سىيلىعىنىڭ لاۋرەاتى ءسابيت ءابدىمۇتالىۇلىن ايتۋعا تولىق نەگىز بار. ع.مۇسىرەپوۆ اتىنداعى قازاك مەملەكەتتىك اكادەميالىق جاستار جانە بالالار تەاترىنداعى 4 جىلدىق ەڭبەگىنىڭ ارقاسىندا اتالمىش تەاتردىڭ جاڭا بەلەسكە كوتەرىلۋىنە جاعداي جاسالعانىنا كۋامىز.

قۇرمەتتى قاسىم-جومارت كەمەلۇلى! وسى ورايدا، تەاتر باسشىلىعىنىڭ اۋىسۋىنا قاتىستى اڭگىمەلەر وسىمەن 6-7 ايدىڭ كولەمىندە ءجۇرىپ جاتقانىن جەتكىزگىمىز كەلەدى، «جاڭا باسشىنىڭ كەلۋى مۇمكىن» دەگەن سوزدەر ۇجىمدا كوپتەگەن سۇراقتار تۋدىرىپ وتىر. ۇجىم ءبىر باسشىمەن جۇمىس ىستەۋىنە ەندى ۇيرەنە بەرگەندە، اۋىستىرىپ جىبەرەتىن «ءداستۇر» قالىپتاستى. جاڭا باسشى كەلمەي جاتىپ، ونى دا جاقىن ارادا تاعى دا اۋىستىرادى دەگەن ءسوز شىعاتىنىنا ەتىمىز دە ۇيرەنىپ كەتتى. بۇل فاكتور تەاتر جۇمىسىنىڭ اتموسفەراسىنا، وندىرىسىنە كەرى اسەرىن تيگىزىپ كەلەدى. 94 جىلدىق تاريحى بار  باسشىلىقتىڭ ءجيى اۋىسۋى ۇجىمدا تۇراقسىزدىق تۋدىرىپ، قولعا الىنعان ىستەردىڭ اياقسىز قالۋىنا الىپ كەلەرى ءسوزسىز. باس تەاترعا بۇل ارەكەت وتە جاراسىمسىز.

قۇرمەتتى قاسىم-جومارت كەمەلۇلى! ەندى مىنە، 1 جىلعا جۋىق قىزمەت اتقارعان ءسابيت ءابدىمۇتالىۇلى ابدىحالىقوۆتى لاۋازىمنان بوساتادى دەگەن ارەكەتتەر سىزگە حات جازۋدى ماجبۇرلەپ وتىر. ديرەكتوردى قانداي سەبەپپەن لاۋازىمنان الىپ تاستايتىنى بەلگىسىز. تاعايىندالاتىن جاڭا ديرەكتوردىڭ قانداي سەبەپپەن قويىلىپ جاتقانىنا دا بىزگە بەيمالىم. ديرەكتوردىڭ دەنساۋلىعىنا بايلانىستى لاۋازىمىنان بوساتۋ تۋرالى ارىزى ءماجبۇرلى تۇردە جاسالعان دەپ ەسەپتەيمىز. ۇجىمنىڭ كوكەيىن مازالاعان وسى سۇراقتارعا جاۋاپ الۋ ماقساتىندا قر مادەنيەت جانە سپورت ءمينيسترى ا.ر.رايىمقۇلوۆاعا حات جولدادىق.

قۇرمەتتى قاسىم-جومارت كەمەلۇلى! ءتيىمدى مەملەكەتتىڭ نەگىزى – مەملەكەت پەن حالىق اراسىنداعى سەنىمدى قارىم-قاتىناس. قازاقستان حالقىنا ۇندەگەن جولداۋىڭىزدا «ەستيتىن مەملەكەت» تۇجىرىمداماسى – حالىق تاراپىنان ارەكەت ەتەتىن بيلىككە دەگەن سەنىمدى ورناتۋ مەن نىعايتۋعا نەگىزگى ەكپىن جاسالاتىن باستى ستراتەگيالىق ەلەمەنت ەكەنىن اتادىڭىز. ءبىزدىڭ ۇجىمدى دا ەستيدى، تىڭدايدى دەگەن ۇمىتتەمىز.

قۇرمەتتى قاسىم-جومارت كەمەلۇلى! ءبىز م.اۋەزوۆ اتىنداعى قازاق مەملەكەتتىك اكادەميالىق دراما تەاترى ۇجىمى قر ەڭبەك سىڭىرگەن قايراتكەرى ءسابيت ءابدىمۇتالىۇلى ابدىحالىقوۆتىڭ ەڭبەگىنە ريزاشىلىعىمىزدى بىلدىرە وتىرىپ، سىزدەن ديرەكتوردىڭ ءوز لاۋازىمىندا قىزمەتىن جالعاستىرۋىنا ىقپال ەتۋىڭىزدى سۇرايمىز.

اسا قۇرمەتپەن، قر حالىق ارتىستەرى قر ەڭبەك سىڭىرگەن قايراتكەرلەرى

 

سوڭعى جاڭالىقتار