14 اقپان, 09:54 470 0 سپورت انار لەپەسوۆا

جاڭا ويىن: پاۆلودارلىق مۇعالىمدەر قازاقشا حوككەي ويلاپ تاپتى

پاۆلودارداعى نازارباەۆ زياتكەرلىك مەكتەبىنىڭ مۇعالىمدەرى قازاقشا حوككەي ويلاپ تاپتى. ويىن ەرەجەلەرى قازاقتىڭ ۇلتتىق قازان ويىنى نەگىزىندە جاسالعان، دەپ حابارلايدى pavlodarnews.kz.

قازاقشا حوككەي ويىنى اۆتورلارىنىڭ ءبىرى – حيميا-بيولوگيالىق باعىتىنداعى نزم-ءنىڭ دەنە شىنىقتىرۋ ءپانى مۇعالىمى سەرىك تەمىرعاليەۆتىڭ ايتۋىنشا، QAZ-HOK, ياعني قازاقشا حوككەي ەرەجەلەرى ءارتۇرلى تاريحي قۇجاتتاردى زەرتتەي وتىرىپ ازىرلەندى. سپورتتىق ويىنعا اۆتورلىق كۋالىگى بەرىلدى.

«قازاقتاردا ەرتەدە قورعانىس پەن شابۋىل تاسىلدەرى پىسىقتالاتىن قازان ويىنى بولعان. ارىپتەس-پەداگوگتار بولات مۇقىشەۆ پەن دانيار نۇرعاليەۆپەن بىرلەسە بۇل ويىننىڭ ەرەجەلەرىن قازىرگى زامانعا لايىق ەتىپ وزگەرتتىك. ويىن ەرەجەلەرى قازاقستان رەسپۋبليكاسى ۇلتتىق زياتكەرلىك مەنشىك ينستيتۋتىندا ساراپتامادان ءوتتى»، - دەيدى سەرىك تەمىرعاليەۆ.

QAZ-HOK-تا بەس-بەستەن بولىنگەن ەكى كوماندا دوپتى تاياقپەن قازانعا تيگىزۋى شارت. وسى ارقىلى ويىن دوپتى حوككەيگە ۇقسايدى. دوپتىڭ ديامەترى 7,6 سم. «الاڭنىڭ ەكى جاعىنداعى 1,8 مەترلىك شەڭبەر ورتاسىنا 50ح40 سانتيمەترلىك كوپ قىرلى «قازان» قويىلادى. ءاربىر كوماندا شابۋىلعا بەرىلگەن 5 مينۋت ىشىندە دوپتى قازانعا تيگىزۋى كەرەك. قورعانعان كوماندا قازان اينالاسىنداعى شەڭبەر ىشىنە كىرمەۋى ءتيىس. بەس مينۋت اياقتالعاندا شابۋىل قۇقىعى قارسىلاس كومانداعا بەرىلەدى»، - دەيدى پەداگوگ.

كەز كەلگەن سپورت تۇرىندە ءتارىزدى مۇندا دا ەرەجە بۇزعان كومانداعا جازا تاعايىندالادى. دوپتى اياقپەن ويناعان كومانداعا بۋلليت سەكىلدى الاڭ ورتاسىنان ەركىن سوققى باعىتتالادى. بالاعات ءسوز ايتقان نەمەسە تورەشى شەشىمىمەن كەلىسپەگەن ويىنشى 2 مينۋتقا الاڭنان قۋىلادى.

سەرىك تەمىرعاليەۆتىڭ سوزىنە قاراعاندا، «رۋحاني جاڭعىرۋ» باعدارلاماسى اياسىندا جاساپ شىعارىلعان بۇل ويىن مەكتەپتەردە وتكىزۋگە ۇسىنىلادى. قازاقشا حوككەي جاستاردى ەپتىلىككە، ۇجىمدا بىرلەسە قيمىلداۋعا ۇيرەتەدى. نازارباەۆ زياتكەرلىك مەكتەبىندە قالا مەن وبلىستىڭ جالپى ءبىلىم بەرەتىن مەكتەپتەرىنىڭ دەنە شىنىقتىرۋ مۇعالىمدەرىنە ويىن ەرەجەلەرى مەن ەرەكشەلىكتەرى تانىستىرىلدى.

الداعى ۋاقىتتا اتالعان سپورتتىق ويىننان قالا مەكتەپتەرى اراسىندا جارىس وتكىزۋ جوسپارلانۋدا.

 

سوڭعى جاڭالىقتار