13 اقپان, 18:28 329 0 ساياسات انار لەپەسوۆا

قازاقستان تاعى ءبىر دۇنيەجۇزىلىك ۇيىمدى باسقارادى

قازاقستان جاھاندىق تەڭىزگە شىعار جولى جوق دامۋشى ەلدەر توبىنىڭ توراعاسى بولىپ سايلاندى.

بۇل توپقا 32 مەملەكەت كىرەدى. ولار افريكا، ازيا، ەۋروپا جانە وڭتۇستىك امەريكا ەلدەرى. مۇشە مەملەكەتتەردىڭ ءبارى قازاقستاننىڭ توراعالىعىن ءبىر اۋىزدان قولدادى، دەپ حابارلايدى «حابار 24».

بۇۇ قاۋىپسىزدىك كەڭەسىندە اتقارعان تابىستى ەڭبەگىنەن كەيىن قازاقستانعا قايتا جاۋاپتى مىندەت تاپسىرىلدى. تەڭىزگە شىعار جولى جوق دامۋشى ەلدەر توبى ەلىمىزدى ۇيىمنىڭ توراعاسى ەتىپ سايلادى. جارتى ميللياردتان اسا حالقى بار 32 مەملەكەتتىڭ ماسەلەلەرى ورتاق. بۇل – گەوگرافيالىق الشاقتىق، تەڭىزگە شىعار تىكەلەي جولدىڭ بولماۋى جانە الەمدىك ساۋدا جولدارىنان وقشاۋ ورنالاسۋى. كوپتەگەن قابىلدانعان قارارلارعا قاراماستان، وسى سىن-تەگەۋىرىندەردى ەڭسەرۋدە ايتارلىقتاي جەتىستىكتەر بايقالمايدى.

"قازاقستاننىڭ ۇيىمعا توراعالىعى ەكى جىلعا، 2021 جىلدىڭ سوڭىنا دەيىن جالعاسادى. بۇل وتە جاۋاپتى ءارى ۇلكەن جۇمىس. قازاقستان – جەر اۋماعى جاعىنان تەڭىزگە شىعار جولى جوق ەڭ ءىرى ەل. سول سەبەپتى وسى ەلدەر توبىندا توراعالىق ەتۋ ءبىز ءۇشىن وتە پايدالى ءارى ءتيىمدى بولماق. ويتكەنى ءوزىمىز دە وسى ماسەلەلەرمەن اينالىسىپ، ترانزيت پەن ءوزارا ارەكەتتەسۋدى جاقسارتىپ، الەمدىك ساۋدا ورتالىقتارىنا شىعۋ جولدارىن تابۋعا تىرىسىپ كەلەمىز", - دەيدى  قازاقستاننىڭ بۇۇ جانىنداعى تۇراقتى وكىلى قايرات وماروۆ.

سوڭعى جاڭالىقتار