26 قاڭتار 2020, 16:39 659 0 ساياسات انار لەپەسوۆا

مامين ەلىمىزدە كوروناۆيرۋستىڭ الدىن الۋ ماسەلەلەرى جونىندە كەڭەس وتكىزدى

مەملەكەت باسشىسىنىڭ قازاقستان اۋماعىندا كوروناۆيرۋستىڭ تاراۋىنا جول بەرمەۋ تۋرالى تاپسىرماسىنا وراي ۇكىمەت باسشىسى اسقار مامين كەڭەس وتكىزدى. جيىن ناتيجەسى بويىنشا ۇكىمەت باسشىسىنىڭ ورىنباسارى بەردىبەك ساپارباەۆتىڭ توراعالىعىمەن ۆەدومستۆوارالىق كوميسسيا قۇرىلدى. 

جيىن بارىسىندا دەنساۋلىق ساقتاۋ ءمينيسترى ەلجان ءبىرتانوۆ، يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ، مادەنيەت جانە سپورت ءمينيسترى اقتوتى رايىمقۇلوۆا، سىرتقى ىستەر ءمينيسترىنىڭ ءبىرىنشى ورىنباسارى شاحرات نۇرىشەۆ، قازاقستاننىڭ باس سانيتارلىق دارىگەرى جانداربەك بەكشين، قر ۇلتتىق قاۋىپسىزدىك كوميتەتىنىڭ شەكارا قىزمەتىنىڭ ديرەكتورى دارحان ءدىلمانوۆ، سونداي-اق الماتى جانە شىعىس قازاقستان وبلىستارىنىڭ باسشىلىعى قالىپتاسىپ وتىرعان احۋال مەن ولارعا ارەكەت ەتۋ شارالارى تۋرالى باياندادى.

«قر پرەزيدەنتى قاسىم-جومارت توقاەۆ قىتايدان قازاقستان اۋماعىنا كوروناۆيرۋستىڭ تارالۋىنا جول بەرمەۋ بويىنشا شەشۋشى ۇيىمداستىرۋ شارالارىن قابىلداۋدى تاپسىردى»، — دەدى ا. مامين.

كەڭەس قورىتىندىسى بويىنشا ۇكىمەت باسشىسى كەلەسى كەشەندى الدىن الۋ شارالارىن قابىلداۋدى تاپسىردى:

1. مەملەكەتتىك شەكارادان وتكىزۋ بەكەتتەرىندە، ونىڭ ىشىندە اۋە، اۆتوكولىك جانە تەمىرجول كولىگى نىساندارىندا سانيتارلىق-ەپيدەميولوگيالىق جانە كوشى-قون باقىلاۋىن كۇشەيتۋ;

2. قحر-دان كەلگەن بارلىق ادامدارعا تۇرعىلىقتى مەكەنجايى بويىنشا مەديتسينالىق باقىلاۋ ورناتۋ;

3. ەپيدەميولوگيالىق احۋال ناشارلاعان جاعدايدا حالىققا قاجەتتى كومەك كورسەتەتىن مەديتسينالىق ۇيىمداردىڭ دايىندىعىن قامتاماسىز ەتۋ;

4. قىتايعا قىزمەتتىك ءىس-ساپارلاردى شەكتەۋ، سونداي-اق جەكە ىستەر مەن تۋريستىك ماقساتتاردا بارماۋعا كەڭەس بەرۋ;

5. قحر-دان كەلەتىن ترانزيتتىك جولاۋشىلارعا قر اۋماعىنا 72 ساعاتتىق ۆيزاسىز كەلۋ رەجيمىن ۋاقىتشا توقتاتۋ;

6. «قورعاس» شىحو قازاقستاندىق بولىگىنىڭ جۇمىسىن ۋاقىتشا توقتاتۋ;

7. قحر اۋماعىنداعى قازاقستاندىق ازاماتتارمەن ولارعا كونسۋلدىق جانە وزگە دە كومەك كورسەتۋ ماقساتىندا جۇمىستى جانداندىرۋ;

8. مەملەكەتتىك ورگاندار كوروناۆيرۋستىق ينفەكتسيانىڭ تارالۋىن بولدىرماۋ جونىندەگى ءىس-قيمىلدى ۇيلەستىرۋ ماقساتىندا قحر جانە باسقا دا مۇددەلى ەلدەردىڭ ءتيىستى مەملەكەتتىك قۇرىلىمدارىمەن قاجەتتى ءوزارا ءىس-قيمىلدى ۇيىمداستىرۋى ءتيىس;

9. قاجەت بولعان جاعدايدا قحر ۋحان قالاسىندا جۇرگەن قازاقستان ستۋدەنتتەرى مەن قر باسقا دا ازاماتتارىن شۇعىل ەۆاكۋاتسيالاۋدى قامتاماسىز ەتۋ;

10. پرەمەر-ءمينيستردىڭ ورىنباسارى ب. ساپارباەۆتىڭ توراعالىق ەتۋىمەن ۆەدومستۆوارالىق كوميسسيا قۇرۋ، وعان قازاقستاندا كوروناۆيرۋستىڭ تارالۋىنا جول بەرمەۋ جونىندەگى ءىس-قيمىل جوسپارىن ازىرلەۋ تاپسىرىلدى.

 

سوڭعى جاڭالىقتار