26 قاڭتار 2020, 13:20 1634 0 ءبىلىم انار لەپەسوۆا

مينيستر دوكتورلىق ديسسەرتاتسيا قورعاۋدىڭ جاڭا تالاپتارىن تانىستىردى

ءبىلىم جانە عىلىم ءمينيسترى اسحات ايماعامبەتوۆ Facebook پاراقشاسىندا ەلىمىزدە دوكتورلىق ديسسەرتاتسيا قورعاۋدىڭ جاڭا ەرەجەلەرىن تانىستىردى. 

ايماعامبەتوۆتىڭ ايتۋىنشا، ديسسەرتاتسيانى قورعاۋ ءۇشىن قاجەتتى باسىلىمدارعا قويىلاتىن تالاپتاردى وزگەرتۋ بويىنشا قر بعم بۇيرىعىنىڭ جوباسى دايىندالدى. قر بعم №127 بۇيرىعىنا سايكەس،  قورعاۋعا شىعۋ ءۇشىن دوكتورانت مىندەتتى تۇردە جەتى ماقالا جاريالاۋى قاجەت. ماقالالاردىڭ ە ساپاسى بويىنشا ەرەكشە تالاپتار قويىلمايدى.

"ناتيجەسىندە باستى نازار تەك ساندىق كورسەتكىشكە اۋدارىلىپ، ماقالالار ساپاسى كۇماندى جۋرنالداردا جاريالانا باستايدى. كەيىن عالىمدارىمىزدىڭ ماقالالارى حالىقارالىق بازالاردان شىعارىلعان بەلگىسىز ءبىر جۋرنالداردا باسىلىپ شىققاندا تاڭ قالىپ جاتامىز. البەتتە، قالىپتاسقان بۇل ءداستۇردى وزگەرتۋ كەرەك. ياعني، سۇرانىسقا يە ەمەس ء"السىز" جۋرنالداردا ماقالالاردىڭ كوپ جاريالانۋىنا قاراعاندا، بەدەلدى جۋرنالداردا ساپالى جاريالانىمدار از شىققانى جاقسىراق دەپ انىق ايتۋعا بولادى", - دەيدى ۆەدومستۆو باسشىسى. 

ءمينيستردىڭ ايتۋىنشا، ديسسەرتاتسيالىق كەڭەس تۋرالى ۇلگىلىك ەرەجەگە ديسسەرتاتسيالىق كەڭەس مۇشەلەرىنە قويىلاتىن تالاپتاردى ارتتىرۋ جونىندەگى جاڭا نورما ەنگىزىلگەن. كەڭەس مۇشەلەرىنىڭ كەمىندە 2/3 بولىگىندە حيرش يندەكسى مەن رەتسەنزيالاناتىن حالىقارالىق عىلىمي جۋرنالداردا كەمىندە ءۇش جاريالانىم بولۋى ءتيىس. الەۋمەتتىك-گۋمانيتارلىق باعىتتار ءۇشىن بۇل كورسەتكىشتەر تومەن بولادى.

ماگيسترلىك جانە دوكتورلىق ديسسەرتاتسيالار جەتەكشىلەرىنە قويىلاتىن تالاپتار دا وزگەرگەن.  "بۇگىنگى تاڭدا دوكتورانتتان بەدەلدى جۋرنالداردا جاريالانىم تالاپ ەتىلسە، وندا عىلىمي جەتەكشىنىڭ دە وسىنداي جاريالانىمدارى بولۋى ءتيىس. قازىرگى ۋاقىتتا ءىس جۇزىندە ءتيىستى تالاپتار جوق", - دەيدى ايماعامبەتوۆ. 

سوڭعى جاڭالىقتار