24 قاڭتار, 17:28 5481 0 قاۋىپسىزدىك انار لەپەسوۆا

1 جىلدا 233 قىلمىس جاسالعان: ءتارتىپ ساقشىلارى الماتىداعى ەڭ قاۋىپتى ءۇيدى اتادى

مەملەكەتتىك باس پروكۋراتۋرانىڭ «قىلمىستىق كارتاسىنداعى» اۋەزوۆ اۋدانىندا ورنالاسقان №13 ءۇي قالاداعى ەڭ قاۋىپتى ءۇي دەپ كورسەتىلگەن. نەگە دەسەڭىز، 2019 جىلى مۇندا 200-دەن اسا قىلمىس ورىن العان، ال 2020 جىلدىڭ العاشقى اپتاسىندا-اق 24 قۇقىق بۇزۋشىلىق تىركەلگەن، دەپ حابارلايدى "الماتى" ارناسى. 

الماتىداعى قىلمىستىڭ ەڭ جوعارعى دەڭگەيلەرى كورسەتىلگەن ەڭ قاۋىپتى بۇل ءۇي جۇبانوۆ پەن ساين كوشەلەرىنىڭ قيىلىسىندا ورنالاسقان. جاي قاراعاندا قاراپايىم كوپقاباتتى ءۇي سەكىلدى. شىن مانىسىندە، مۇندا 1 جىلدىڭ ىشىندە 233 قىلىمىس جاسالعان. بۇرىندارى بۇل ءۇي - ماقتا فابريكاسى جۇمىسكەرلەرىنىڭ جاتاقحاناسى بولعان ەكەن. وسى ورايدا، قۇقىق بۇزۋشىلىقتىڭ كوبى پاتەردى جالعا الاتىن تۇرعىندار تاراپىنان ورىن الادى دەيدى تۇرعىندار.

«وڭشەڭ پاتەر جالداۋشىلار تۇرادى. ءۇي يەلەرى پاتەرلەرىن جالعا بەرىپ قويادى. ال، وندا ناشاقور ما، تەرروريست پە، جەڭىل جۇرىستىلەر تۇرادى ما، شارۋالارى جوق. اقشاسىن السا بولدى».

«كوبىنەسە، القاشتار، ناشاقورلار تۇراتىن. جالپى دۋشقا ءتۇسىپ جۇرگەن كەزدە، توقىلداتپاي كىرىپ كەتەتىن كەزدەرى بولعان. بىردە ءتىپتى، اياعى اۋىر كەلىنشەك سۋعا ءتۇسىپ جاتقان كەزدە، ۆيدەوعا ءتۇسىرىپ، قاراپ تۇرىپتى»، - دەدى ءبىر تۇرعىن.

قازىرگى ۋاقىتتا بۇل ءۇيدىڭ جاي-كۇيى دە ءماز ەمەس. اۋلادا قاڭعىرعان يتتەر قاپتاپ، اينالا قوقىسقا تولعان. سىرتقا جايىلعان كيىمدەر مەن دالاعا توڭازىتىلۋعا شىعارىلعان ازىقتار - كەڭەستىك ۋاقىتىتتاعى ۇيلەردى ەرىكسىز ەسكە تۇسىرەدى. جىل بويىنا بۇل ۇيدە ۇرلىق پەن الاياقتىقتىق، توناۋشىلىق جانە ەسىرتكى زاتتارىن زاڭسىز ساقتاۋلار ورىن العان. ال، 1-قاباتتاعى تەرەزەلەردىڭ بارىندە ورناتىلعان تەمىر قورشاۋلار - تۇرعىنداردىڭ قاۋىپسىزدىك ءۇشىن الاڭداۋىنىڭ ءبىر بەينەسى.

«بۇل ماسقارا سۇمدىق. ۇرلىق كوپ. اينالا قوقىسقا تولا. بوتەلكەلەر جاتادى، بىرەۋلەر ءبىر ءتۇرلى دارىلەردى ىشىمدىكپەن ءىشىپ جاتادى. ءسوزىم جوق»، – دەدى ءبىر تۇرعىن.

«بىلتىرلار ۇرلىق كوپ بولعان. بارىنە تور قويىلعان. ءتىپتى، شىنداپ كەلگەندە، تورلار دا ۇرلىققا توسقاۋىل بولا المايدى»، - دەيدى ءبىر تۇرعىن.

سونداي-اق، بۇل كوپقاباتتى ءۇيدىڭ ماڭىندا ساۋدا ءۇيى، پەرزەنتحانا، الماتى قۇرىلىس-تەحنيكالىق كوللەدجى ورنالاسقان. اسىرەسە، تۇنگى ۋاقىتتا بەلگىسىز جاندار ءۇي ماڭىندا كوپ سەرۋەندەيتىن كورىنەدى. دۇكەندەردەگى ۇرلىق-قارلىق تا اۋىزدالماي تۇر.

13-ۇيدەگى دۇكەندەردىڭ بىرىندە تولەماقى تەرمينالىن كىرە بەرىستەگى تەمىرگە دانەكەرلەپ تاستاعان. دۇكەن يەسىنىڭ مۇنداي ءىس-ارەكەتكە بارۋىنا - بىرنەشە اپتا بۇرىن عانا كورشى دۇكەندەگى ءدال وسىنداي تولەماقى تەرمينالىن بەلگىسىز بىرەۋلەردىڭ الىپ كەتۋى تۇرتكى بولعان.

ابىروي بولعاندا، وسىنداي قۇقىقبۇزۋشىلىقتاردىڭ الدىن الۋ ءۇشىن مۇندا اۋداندىق پوليتسيا بولىمشەسى جۇمىس جاسايدى ەكەن. ءبىزدىڭ ءتۇسىرىلىم توبى پوليتسيا قىزمەتكەرلەرىنەن ءمان-جايدى ءبىلۋ ءۇشىن، ۋچاسكەگە دە بارعان بولاتىنبىز.

بۇل 13-ءۇيدىڭ جانىندا ورنالاسقان نومەرى  33 ۋچاسكەلىك پوليتسيا پۋنكتى. مۇندا جۇمىس ۋاقىتى ساعات تاڭعى 9-دان كەشكى 10-عا دەيىن دەپ كورسەتىلگەن. ال، ءدال قازىرگى ۋاقىت ساعات تۇسكى 12:12-ءنى كورسەتىپ تۇر. ءبىز ەسىكتى توقىلداتقاندا، بىزگە ەسىكتى ەشكىم اشا قويمادى.

تۇرعىندار وزدەرىن قۇقىقبۇزۋشىلىقتان قورعاۋ ماقساتىندا بەينەكامەرالار مەن تەمىر ەسىكتەر ورناتۋدى سۇراعانىمەن، ءالى كۇنگە دەيىن ناتيجە جوق. ءتارتىپ ساقشىلارى دا كەيدە ۋاقىتىلى ورنىندا بولماي قالادى ەكەن. ارادا ءبىراز ۋاقىت وتكەن سوڭ، ءتارتىپ ينسپەكتورى وسى ماسەلە بويىنشا اۋداندىق جيىندا بولعانىن ايتىپ، بۇل اقپاراتتىڭ شىندىققا جاناسپايتىنىن العا تارتتى.

«ءبىزدىڭ اۋداندا 24 500  ادام تۇرادى. ولاردىڭ ىشىندە 133-ءى تىركەۋگە الىنعاندار، مەرزىمىنەن بۇرىن بوساتىلعاندار بار، ىشىمدىككە سالىنعاندار، كامەلەت جاسقا تولماعان بالالارعا بۇزاقىلىق  كورسەتكەن ءۇشىن تىركەۋگە الىنعاندار دا تۇرادى. ال، №13 ۇيدە 270 ادام تۇرىپ جاتىر، ونىڭ بىرەۋى عانا ىشىمدىككە سالىنعان ماسكۇنەم ايەل. بۇل جەردە ينسپەكتور بولعانىما 8 جىل بولدى، ونداي كوپ قىلمىس تىركەلمەگەن»، – دەيدى اۋەزوۆ اۋدانى پوليتسيا باسقارماسىنىڭ №33 ۋچاسكەلىك پوليتسيا ينسپەكتورى باقىتجان الىمبەرگەن.

ال قالالىق پوليتسيا دەپارتامەنتى قۇقىقتىق كارتاداعى اقپاراتتا قاتە كەتكەن دەپ ەسەپتەيدى. شىن مانىندە، اۋدانداعى قىلمىس سانى اتالعانداي كوپ ەمەستىگىن ەسكەرەدى.

«2019 جىلى جوعارىدا اتالعان مەكەن-جاي بويىنشا 11 قىلمىس تىركەلدى، ونىڭ ىشىندە 8-ءى باسقا بىرەۋدىڭ مۇلكىن ۇرلاۋ، 1 توناۋ جانە 2 الاياقتىق. اۋىر جانە اسا اۋىر قىلمىستار تىركەلمەگەن. جوعارىدا كەلتىرىلگەن ستاتيستيكالىق مالىمەتتەرگە كەلەر بولساق، قازىرگى ۋاقىتتا الدىن-الا تەكسەرۋ بارىسىندا تەحنيكالىق قاتەلىكتىڭ ورىن العانى انىقتالدى. جاقىن ارادا دەرەكقورعا تۇزەتۋ ەنگىزىلەدى»، – دەدى پوليتسيا دەپارتامەنتىنىڭ وكىلى سالتانات ازىربەك.

قالالىق پوليتسيا دەپارتامەنتى بۇل جاعدايدىڭ انىق-قانىعىن مالىمدەگەنىمەن، 13-ءشى ءۇيدىڭ تۇرعىندارىن اۋلاداعى باسقا دا - بەتى اشىق شۇڭقىرلار، بالالار الاڭىنىڭ ەسكىرىپ كەتكەنى سەكىلدى ماسەلەلەر الاڭداتادى. سوندا دا، مۇندا ءجيى ورىن الاتىن زاڭسىزدىقتارعا پاتەرلەردى جالعا الۋشىلار كىنالى مە الدە 13-ءشى ءۇيدىڭ قارعىس اتقانى ما؟ قانداي بولعاندا دا، اۋدان اكىمدىگى بۇل ماسەلەلەردى ىقتياتتى قاراستىرعانى ابزال.

سوڭعى جاڭالىقتار