24 قاڭتار, 09:44 394 0 سپورت انار لەپەسوۆا

قىتايداعى ىندەتكە بايلانىستى بوكستان ىرىكتەۋ ءتۋرنيرىنىڭ مەرزىمى مەن وتەتىن ورنى وزگەردى

قىتايدا كوروناۆيرۋستىڭ ورشۋىنە بايلانىستى كەيىنگە شەگەرىلگەن بوكستان ازيا ايماقتىق ىرىكتەۋ ءتۋرنيرىنىڭ مەرزىمى مەن وتەتىن ورنى وزگەرەدى. بۇل تۋرالى Olympic.kz حابارلادى. 

«حالىقارالىق وليمپيادا كوميتەتىنىڭ بوكس بويىنشا جۇمىس توبى مەن قىتايدىڭ وليمپيادالىق كوميتەتى ۋحانداعى كوروناۆيرۋس ينفەكتسياسىنىڭ تارالۋىن ءجىتى قاداعالاۋدا. سپورتشىلار مەن رەسمي تۇلعالاردىڭ قاۋىپسىزدىگىن قامتاماسىز ەتۋ ماقساتىندا 3-14 اقپان ارالىعىنا جوسپارلانعان 2020 جىلعى توكيو وليمپياداسىنا ازيا/تىنىق مۇحيتى ەلدەرىنىڭ بوكسشىلارىن ىرىكتەۋدى كەيىنگە قالدىرۋ شەشىمى قابىلدانعان بولاتىن. ىرىكتەۋ ءتۋرنيرى وتكىزىلەتىن جاڭا مەرزىم – 3-11 ناۋرىز. قازىرگى كەزدە جارىستى وتكىزەتىن ورىن قاراستىرىلۋدا. ءبىر انىعى، تۋرنير قىتايدا ۇيىمداستىرىلمايدى. جۇمىس توبى ءتۋرنيردى قابىلدايتىن مەملەكەت پەن قالانى انىقتاعان كەزدە بارلىق ۇلتتىق وليمپيادالىق كوميتەتتەر، ۇلتتىق فەدەراتسيالار مەن رەسمي تۇلعالار حاباردار ەتىلەدى»، - دەلىنگەن حوك-تىڭ رەسمي حاتىندا.

وسىلايشا، بوكستان توكيو وليمپياداسىنا العاشقى ىرىكتەۋ ءتۋرنيرى 20-29 اقپان ارالىعىندا افريكانىڭ باتىسىنداعى سەنەگال ەلىندە وتەدى. سەبەبى ۋحاننان كەيىنگى كۆاليفيكاتسيالىق جارىس ءدال وسى ەلدە وتەتىنى جوسپارلانعان بولاتىن.

 

سوڭعى جاڭالىقتار