23 قاڭتار, 20:23 1058 0 اتاجۇرت Túrkistan Gazeti

ناۋقاس وتباسىنىڭ باسپاناسىن بانك نەگە تارتىپ الدى؟

ەلبيرا راحامدولدا – 1992 جىلى قاراعاندى وبلىسىنا موڭعوليانىڭ قوبدا ايماعىنان كوشىپ كەلگەن. قاراعاندى قالاسى 23-شاعىناۋدانى 29-ءۇي 13-پاتەردە بارلىعى 11 ادام، ياعني 3 وتباسى ءبىر باسپانادا تۇرعان. پاتەردى اجەسى ءسادۋ قازايقىزى مۇراگەرلىكپەن ەلبيرا راحامدولداعا قالدىرعان. نەگىزى بۇل پاتەردى قاراعاندى قالاسىنىڭ اكىمدىگى تاريحي وتانىنا ورالعان ەتنيكالىق قانداستارعا كۆوتا رەتىندە بەرىپتى.

ءۇي يەلەرى 2014 جىلى 23 ساۋىردە «تسەنتركرەديت» بانكتەن ءۇيدى كەپىلدىككە قويىپ، 3,4 ميلليون تەڭگە كولەمىندە نەسيە الادى. نەسيەنىڭ تولەمىن 3 جىلعا جۋىق ۋاقىتىندا تولەپ تۇرعان. الايدا 2016 جىلى ءۇي يەلەرىنىڭ دەنساۋلىعىنا بايلانىس­تى ەكەۋى دە جۇمىسسىز قالادى. ەلبيرا جۇكتىلىكپەن وپەراتسياعا ءتۇسىپ، جانى ازەر قالادى (نارەستەسى شەتىنەگەن). وسى سترەستەن ء(ۇيدىڭ داۋى) كۇيەۋى بەكمۇرات التايحاننىڭ مي قانتامىرى جارىلىپ، 10 ساعاتقا سوزىلعان كۇردەلى وپەراتسيا جاسالادى.  وسىلايشا ءۇش وتباسىن اسىراپ وتىرعان ءبىر ءۇيدىڭ ەكى ادامى قاتارىنان جۇمىسقا جارامسىز بولىپ قالعان. سول سەبەپتى نەسيەنىڭ اي سايىنعى تولەمى كەشىكتىرىلگەن. بانك وسىدان كەيىن ءۇيدى ولاردان الىپ، باسقاعا ساتىپ جىبەرگەن.

ارى قاراي ءىستىڭ انىق-قانىعىن  ەلبيرا راحامدولدا قىسقاشا بىلاي دەپ بايانداپ بەردى:

– بانك سوت ورىنداۋشىنى جانە ساتىپ الۋشىمەن ىمىرالاسىپ ىستەگەن جەمقورلىعىنىڭ كەسىرىنەن كۇيەۋىم بەكمۇراتتى ءولىم
حالىنە جەتكىزدى.

2017 جىلدان بەرى نەسيەنى اقشا بولعاندا اندا-ساندا تولەدىك، ونى بانك كاسساسىنا ەمەس، «تسەنتركرەديت» بانكىنىڭ پروبلەمالار ءبولىمىنىڭ مامانى اسحات دەگەن قىزمەتكەرىنە تولەپ وتىردىق. ول اقشانى بانكىگە تولەمەي ءوز قالتاسىنا باسا بەرگەن. سول سەبەپتى بانك ءبىزدى نەسيەنى مۇلدەم تولەمەدى دەپ  سوتقا بەرىپ سوت نەسيەنى جابۋ ءۇشىن پاتەردى ساتۋعا شەشىم شىعارىپتى.
سوتقا ءبىزدى شاقىرعان جوق. ءبىزدىڭ قاتىسۋىمىزسىز بىرجاقتى وتكەن. سول زاڭسىز شەشىمنىڭ نەگىزىندە جەكە سوت ورىنداۋشىسى adilet.gov.kz سايتى ارقىلى ەلەكتروندى اۋكتسيونمەن باسپانامىزدى ساتىپ جىبەردى. جەكە سوت ورىنداۋشىسى ساتاتىنىن حابارلادى، مەن وعان بارىپ جاعدايىمدى ايتىپ، سوتتىڭ شەشىمى شىققانىن بىلمەدىم دەدىم، ول وعان دا قارامادى. جاي كەزدە ايلاپ-جىلداپ وتپەيتىن پاتەر بۇل جولى اۋكتسيونعا قويعان كۇنى ساتىلىپ كەتكەن. ياعني بۇلاردىڭ اراسىندا سىبايلاستىق بايلانىس بولعان.

ءبىزدىڭ بۇل باسپانامىزدى سىرتىمىزدان، رۇقساتىمىزسىز، قاتىسۋىمىزسىز سوت ارقىلى زاڭسىز شەشىم شىعارىپ ساتىپ جىبەرگەنىنە، ءبىز وسىندا وتىرعان 3 وتباسى تۇبەگەيلى  قارسىمىز.

اتالعان ماسەلەدەگى كەيبىر تۇسىنىكسىز نيۋانستاردى تەرەڭىرەك ءتۇسىنۋ ماقساتىندا اتامەكەنگە ورالعان قانداستاردىڭ قۇقىعىن قورعاۋشى، قاراعاندى وبلىسىندا كوپتەگەن قانداستاردى قۇجاتتاندىرۋ ىسىندە تاجىريبەسى مول بىلىكتى مامان تالعات ءمۇرساليدىڭ بۇل جاعدايعا قاتىستى پىكىرىن سۇراعان ەدىك.

 

تالعات ءمۇرسالي، «اتاجۇرت» ورالماندار مەن بوسقىنداردى قولداۋ قوعامدىق قورىنىڭ توراعاسى:

– بۇل ىسكە باسىندا ءوزىم ارالاسسام، وسىعان دەيىن بىرجاقتى ەتەر ەدىم. دەنساۋلىعىما بايلانىستى ىسكە قاتىسا المادىم. بىراق داۋلى ماسەلەنىڭ بارلىق قىر-سىرىن زەرتتەپ بولدىم. ەلبيرا راحامدولدانىڭ قۇقىعى تاپتالىپ وتىرعانى راس. ازىرگە مىنانداي باس­تى قۇقىقبۇزۋشىلىق بار دەپ ويلايمىن:

ەلبيرا راحامدولدا نەسيەنى ءوزى تولەۋدەن باس تارتقان جوق;

سوت بىرجاقتى شەشىم شىعارعان، سەبەبى جابىرلەنۋشىنى سوتقا قاتىستىرماعان، حابارلاماعان;

سوتتىڭ شەشىمىن ەلبيرا راحامدولدا مۇلدەم تۇسىنبەيتىن ورىس تىلىندە شىعارعان. بۇل ءبىرىنشى – ادام قۇقىعى،
ەكىنشى – مەملەكەتتىك ءتىلدى قورلاۋ;

بۇل ىستە سوتتىڭ شەشىمى زاڭسىزدىقتى قاداعالايتىن پروكۋروردىڭ قاتىسۋىنسىز شىعارىلعان;

جەكە سوت ورىنداۋشىسى پاتەردى باعالاۋ كومپانياسىمەن ىمىرالاسىپ، نارىقتاعى باعادان ارزانعا ساتقان;

ەلبيرا راحامدولدا جانە «تسەنتركرەديت» بانكىنىڭ اراسىنداعى نەسيە العان كەزدەگى كەلىسىمشارت مەرزىمىنەن بۇرىن بانك تاراپىنان بىرجاقتى زاڭسىز بۇزىلعان.

الايدا ەلبيرا راحامدولدا «تسەنتركرەديت» بانكىمەن قايتا بەيبىت كەلىسىمگە كەلۋگە، جاڭا گرافيكپەن تولەۋگە دايىن جانە تۋىسقاندارى دا كومەكتەسۋگە ۋادە بەرىپ وتىر.

 

باقىتبەك قادىر

 

 

سوڭعى جاڭالىقتار