19 قاڭتار, 17:12 503 0 جاھان انار لەپەسوۆا

تەگەرانداعى اپاتتان كوز جۇمعان ۋكراينالىقتاردىڭ دەنەسى كيەۆكە جەتكىزىلدى

يرانداعى اۋە اپاتىنان قازا تاپقان ۋكراينالىق «ماۋ» اۋە كومپانياسى قىزمەتكەرلەرىنىڭ دەنەسى «بوريسپول» حالىقارالىق اۋەجايىنا جەتكىزىلدى. بۇل تۋرالى ۋكرينفورم حابارلادى.

اگەنتتىكتىڭ حابارلاۋىنشا، اۋەجايعا قازا تاپقانداردىڭ تۋىستارى جينالعان. سونىمەن قاتار گۇل الىپ كەلگەن ادامداردىڭ قاراسى دا قالىڭ. اۋەجايدا مەديتسينالىق قىزمەتتەردىڭ، مەملەكەتتىك توتەنشە جاعدايلار قىزمەتىنىڭ وكىلدەرى، ۇلتتىق گۆارديا جاۋىنگەرلەرى، ۇلتتىق پوليتسيا قىزمەتكەرلەرى ءجۇر. ازا تۇتۋ شاراسىنا قاتىستى اقپارات تاراتۋ ءۇشىن كەلگەن جۋرناليستەردىڭ لەگى دە مول. مۇردەلەردى الىپ كەلگەن ۇشاق اۋەجايعا جەرگىلىكتى ۋاقىت بويىنشا ساعات 11-دە قونعان.

قازا تاپقانداردى ازا تۇتۋعا ارنالعان شارا ءوتىپ جاتقانىنا قاراماستان «بوريسپول» حالىقارالىق اۋەجايى شتاتتىق رەجىمدە جۇمىس ىستەپ تۇر. وزگە تەرمينالداردان ۇشاقتاردىڭ ۇشىپ كەلۋى مەن ۇشۋى كەستەگە سايكەس جۇرگىزىلىپ جاتىر. جولاۋشىلارعا ساعات 12-مەن 13 ارالىعىندا «بوريسپول» اۋەجايى باعىتىنداعى جولدا قوزعالىسقا شەكتەۋ بولاتىندىعى ەسكەرتىلگەن.

ەسكە سالايىق، سارسەنبى، 8 قاڭتاردا تەگەران ۋاقىتىمەن 6:00-دە يمام حومەيني اتىنداعى اۋەجايدان تەگەران-كيەۆ باعىتىمەن ۇشقان «ۋكراينا حالىقارالىق اۋە جەلىلەرى» اۋە كومپانياسىنىڭ Boeing-737 ۇشاعى اپاتقا ۇشىرادى. ۇشاق بورتىندا 177 ادام بولعان: 168 جولاۋشى مەن 9 ەكيپاج مۇشەسى. ونىڭ ىشىندە يراننىڭ – 82, كانادانىڭ - 63, ۋكراينانىڭ - 2 + 9 (ەكيپاج), شۆەتسيانىڭ – 10, اۋعانستاننىڭ – 4, گفر-دىڭ – 3, ۇلىبريتانيانىڭ 3 ازاماتى بولدى. ولاردىڭ بارلىعى قازا تاپتى.

 

سوڭعى جاڭالىقتار