17 قاڭتار 2020, 13:54 923 0 ەكولوگيا انار لەپەسوۆا

ءبىر اعاشتىڭ ورنىنا – 100 ءتۇپ: الماتىدا جاسىل جەلەككە زالال كەلتىرۋدىڭ وتەمى بەلگىلەندى

الماتىدا جاسىل جەلەكتى كۇتۋ ەرەجەلەرى وزگەرمەك. «الماتى قالاسىنىڭ ەرەكشە مارتەبەسى تۋرالى» زاڭىنا قانداي وزگەرىستەر  ەنگىزىلگەنىن الماتى قالالىق جاسىل ەكونوميكا باسقارماسىنىڭ باسشىسى ەرجان سەيتەنوۆ بايانداپ بەردى.

اتالعان زاڭعا بىرقاتار جاڭا ەرەجەلەر ەنگىزىلدى:

– اعاشتاردى سانيتارلىق كەسۋ، جاسارتۋ الماتى اكىمدىگىنىڭ كەلىسىمىمەن عانا جۇرگىزىلەدى;

- اكىمدىكتىڭ رۇقساتىمەن سانيتارلىق جولمەن نەمەسە ادەيى كەسىلگەن اعاشتاردىڭ ورنىنا جاسىل جەلەك قايتا وتىرعىزىلادى، ماگيسترالدى كوشەلەردىڭ بويىنا دىڭگەگى 20-25 سم بولاتىن جاپىراقتى اعاش تۇرلەرى وتىرعىزىلادى، قىلقان جاپىراقتى اعاشتاردىڭ بيىكتىگى - كەم دەگەندە 2,5 مەتر ء(ى نەمەسە ءىى سىنىپتى ساپا) بولۋى ءتيىس;

– كەسىلگەن اعاش شىعىنىن وتەۋدىڭ ءادىسى جاسالدى، سونىڭ ارقاسىندا كەلتىرىلگەن زالالدىڭ ناقتى باعاسى انىقتالادى;

– اعاش اپاتتى جاعدايدا كەسىلسە، ونىڭ ورنىنا ءبىر اعاش وتىرعىزىلادى، ەگەر زاڭسىز الىنسا، وندا ءبىر اعاشتىڭ ورنىنا 100 ءتۇپ وتىرعىزىلادى;

– جاسىل جەلەكتىڭ كەپىل مەرزىمى – 3 جىل;

– جاۋاپتى مەكەمە ورتاق قولدانىستاعى جەرلەردەگى جاسىل جەلەكتى كوكتەمگى-جازعى جانە جازعى-كۇزگى مەزگىلدەردە زيانكەستەردەن، ءتۇرلى اۋرۋلاردان قورعاۋ ءۇشىن زالالسىزداندىرۋ جۇمىستارىن جۇرگىزۋى ءتيىس.

«بىزدە الماتى قالاسىنىڭ جاسىل جەلەگىن كۇتىپ ۇستاۋ مەن قورعاۋدىڭ جەكە ەرەجەلەرىن ازىرلەۋ جانە بەكىتۋ مۇمكىندىگى پايدا بولدى. بۇعان دەيىن باسقارما قالانىڭ جاسىل قورىنىڭ دامۋى مەن ساقتالۋىنا كەدەرگى كەلتىرەتىن ءتۇرلى ماسەلەلەرمەن بەتپە-بەت كەلگەن بولاتىن. ەلدى مەكەندەر اۋماعىندا وسەتىن جاسىل جەلەكتەردى كۇتىپ ۇستاۋ جانە قورعاۋ ماسەلەلەرىن رەتتەيتىن ستاندارتتاردىڭ، رەگلامەنتتەردىڭ، نۇسقاۋلىقتاردىڭ، ادىستەمەلىك ۇسىنىمداردىڭ بولماۋى، رۇقسات بەرۋ قۇجاتىنسىز اعاشتاردى كەسۋ ءۇشىن وتەمدىك وتىرعىزۋ بويىنشا نورمالاردىڭ بولماۋى - مەگاپوليستىڭ جاسىل قورىنىڭ جويىلۋىن جەدەلدەتەتىن سەبەپتەردىڭ ءبىرى ەدى»، - دەيدى ەرجان سەيتەنوۆ.

باسقارما باسشىسىنىڭ ايتۋىنشا، جاڭا ەرەجە جوباسى جۇرتشىلىقتىڭ تالقىلاۋىنا شىعارىلادى، بەلسەندى قالا تۇرعىندارى قاتىسىپ، ءوز ۇسىنىستارىن ەنگىزە الادى.

«بارلىق مۇددەلى مەكەمە جانە ۇيىمدارمەن كەلىسىلگەننەن كەيىن جاسىل جەلەكتى كۇتىپ ۇستاۋ مەن قورعاۋدىڭ جاڭا ەرەجەلەرى قالالىق ماسليحاتقا بەكىتۋگە جىبەرىلەدى»، - دەپ قورىتىندىلادى ە. سەيتەنوۆ.

 

سوڭعى جاڭالىقتار