16 قاڭتار, 17:14 455 0 الەۋمەت انار لەپەسوۆا

ءمامس: قورعا قانشا قارجى اۋداراتىنىڭىزدى بىلەسىز بە؟

قازاقستاندا مىندەتتى الەۋمەتتىك مەديتسينالىق ساقتاندىرۋ جۇيەسى ەنگىزىلگەنىنە ەكى اپتادان استى. ەكى جىل كەيىنگە شەگەرىلىپ بارىپ ىسكە قوسىلعان جاڭا جۇيەگە قاتىستى تۋىنداپ جاتقان سۇراق كوپ. ەڭ باستى سۇراق – جارنا كولەمىنە قاتىستى.

كوپتىڭ كوكەيىندەگى ساۋالدارعا «الەۋمەتىك مەديتسينالىق ساقتاندىرۋ قورى» كەاق الماتى قالالىق فيليالى وكىلدەرى جاۋاپ بەرەدى.

«ساقتاندىرۋ جۇيەسى ەنگىزىلگەننەن كەيىن قالا تۇرعىندارىنان كوپتەگەن سۇراقتار ءتۇسىپ جاتىر. سۇراقتاردىڭ نەگىزگى بولىگى جارنا ماسەلەسىنە كەلىپ تىرەلەدى. ازاماتتاردى قانشا جارنا تولەۋىم كەرەك، ساقتاندىرۋ شەڭبەرىندە كورسەتىلەتىن قىزمەتتەرگە سوماسى جاعىنان شەكتەۋ بار ما، اسكەريلەر قالاي تولەيدى دەگەن سياقتى ت.ب. ساۋالدار مازالايدى»، -  دەدى قوردىڭ الماتى فيليالى ديرەكتورى نۇرلىبەك قابدىقاپاروۆ.

ايتۋىنشا، ءبىرىنشى ساناتقا مەملەكەت تاراپىنان ساقتاندىرىلاتىن 15 سانات جاتادى. بۇل تىزىمگە 18 جاسقا دەيىنگى بالالار، زەينەتكەرلەر، ۇلى وتان سوعىسىنىڭ قاتىسۋشىلارى مەن ارداگەرلەرى، رەسمي جۇمىسسىز رەتىندە تىركەلگەندەر، ينتەرنات تاربيەلەنۋشىلەرى، جۇمىس ىستەمەيتىن جۇكتى ايەلدەر، دەكرەتتىك دەمالىستاعى انالار، مۇگەدەكتەر، مۇگەدەك بالا كۇتىمىمەن اينالىساتىندار، ستۋدەنتتەر، تەرگەۋ يزولياتورلارىندا وتىرعاندار، جۇمىسسىز ورالماندار جاتادى. ولاردىڭ جالپى سانى 11 ميلليونعا جۋىقتايدى.

ودان كەيىن جۇمىس بەرۋشىلەر، جالدامالى جۇمىسشىلار، جەكە كاسىپكەرلەر مەن ءوز بەتىنشە تولەۋشىلەر دەگەن ساناتتار بار.

ەستەرىڭىزگە سالا كەتسەك، جۇمىس بەرۋشىلەر قاراماعىنداعى قىزمەتكەرلەر ءۇشىن 2017 جىلدىڭ شىلدەسىنەن باستاپ جارنا تولەپ كەلەدى. 2020 جىلى اتالعان سانات ءوز قاراجاتى ەسەبىنەن ءار قىزمەتكەردىڭ جالاقىسىنان 2% اۋدارادى.

قالعان ساناتتاردىڭ بارلىعى جارنا اۋدارۋعا بيىلدان باستاپ كىرىستى. سونىڭ ىشىندە:

- جالدامالى جۇمىسشىلار – جالاقىنىڭ 1% (جۇمىس بەرۋشى ايلىق جالاقىدان ۇستاپ، قورعا اۋدارىپ وتىرادى);

- جەكە كاسىپكەرلەر –  1,4 ەڭ تومەنگى جالاقىنىڭ 5% (اي سايىنعى تولەم – 2975 تەڭگە (ەتج – 42 500 تەڭگە) تولەيدى;

«سونىمەن قاتار، الماتىدا ءوزىن-ءوزى جۇمىسپەن قامتىعان 50 مىڭعا جۋىق ادام تۇرادى. بۇل ساناتقا جالدامالى جۇمىسشىلار، جەكە كاسىپكەر قاتارىنا كىرمەيتىن ازاماتتار جاتادى. مىسالى، جەكە كولىگىمەن ادام تاسيتىندار، ءسۇت ساتاتىندار، بالا كۇتۋشىسى بولىپ جۇمىس ىستەيتىندەر، ياعني، كەلىسىمشارت بەكىتپەي-اق جەكە تۇلعاعا قىزمەت ەتەتىن جەكە تۇلعالار بىرىڭعاي جيىنتىق تولەم تولەۋىنە بولادى (بجت)»، - دەدى نۇرلىبەك قابدىقاپاروۆ.

بىرىڭعاي جيىنتىق تولەم ەلىمىزدە 2019 جىلدىڭ 1 قاڭتارىنان باستاپ ەنگىزىلگەن بولاتىن. جيىنتىق تولەمنىڭ ىشىندە وزگە دە الەۋمەتتىك تولەمەرگە قوسا ساقتاندىرۋ جارناسى دا بار. ول جالپى سومانىڭ 40 پايىزىن قۇرايدى. بجت – رەسپۋبليكالىق ماڭىزى بار 1 ايلىق ەسەپتىك كورسەتكىش (اەك) نەمقالالار ءۇشىن ەسە 2525 تەڭگە، اۋىلدىق جەرلەر ءۇشىن – 0,5 اەك نەمەسە 1263 تەڭگە كولەمىندە بەلگىلەنگەن.

سونىمەن قاتار، ءوز بەتىنشە تولەۋشىلەر دەپ اتالاتىن سانات بار. بۇل ساناتقا جاتاتىن ازاماتتار 1 ەتج-نىڭ 5% اۋدارادى.

جارنانى كەز-كەلگەن ەكىنشى دەڭگەيلى بانك، «قازپوشتا» بولىمشەلەرى، ەمدەۋ مەكەمەلەرىندە ورنالاسقان «كاسسا 24» تەرمينالدارى مەن Kaspi ءموبيلدى قوسىمشاسى ارقىلى تولەۋگە بولادى.

تەگتەر ءمامس

سوڭعى جاڭالىقتار