16 قاڭتار 2020, 16:28 1214 0 رۋحانيات انار لەپەسوۆا

ۆيتسە-مينيستر ابايدىڭ 175 جىلدىعىن تويلاۋعا قانشا قاراجات جۇمسالاتىنىن ايتتى

ابايدىڭ 175 جىلدىق مەرەيتويىنا ارنالعان شارالارعا قانشا قاراجات جۇمسالادى؟ بۇل ساۋالعا ورتالىق كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا قر مادەنيەت جانە سپورت ۆيتسە-ءمينيسترى نۇرعيسا داۋەشوۆ جاۋاپ بەردى. 

«نەگىزى، بارلىعى جىلدىق جوسپار اياسىندا وتەدى. وسىلايشا، اباي بابامىزدىڭ 175 جىلدىعىنا ارنالعان بارلىق شارالارعا 3 ميللياردقا تارتا اقشا جۇمسالادى. ول – جوسپارلى قاراجات. مىسالى، اباي اتىنداعى وپەرا تەاترىنىڭ گاسترولدىك ساپارلارىنا بولىنەتىن قارجى بولادى. ولار سول قارجىنى ابايدىڭ مەرەيتويىنا ارناپ، ماسكەۋ، تۇركيا مەن قىتايعا بارادى. باسقا ونەر ۇجىمدارى دا سولاي ىستەپ وتىر»، - دەيدى نۇرعيسا داۋەشوۆ.

سونداي-اق، ۆيتسە-مينيستر مەرەيتوي اياسىندا ابايدىڭ «جيدەباي-ءبورىلى» مەملەكەتتىك تاريحي-مادەني جانە ادەبي-مەموريالدىق مۋزەي-قورىعىن تۇرلەندىرۋ جانە اقىن ەسىمىمەن بايلانىستى تاريحي-مادەني مۇرا وبەكتىلەرىنە عىلىمي-رەستاۆراتسيالاۋ جۇمىستارىن جۇرگىزۋ قاراستىرىلعانىن اتاپ ءوتتى.

«بۇل جۇمىستاردىڭ ءبارى «قازرەستاۆراتسيا» ۇيىمىنا بولىنگەن قاراجات ەسەبىنەن جاسالادى. مىسالى، ابايدىڭ سەمەي قالاسىنداعى مۋزەيىنىڭ ىشكى جوندەۋ جۇمىستارىنا 30 ملن تەڭگە ءبولىندى»، - دەيدى نۇرعيسا داۋەشوۆ. ۇلى اباي مەرەيتويىنىڭ رەسمي سالتاناتتى اشىلۋ ءراسىمى 21 قاڭتار كۇنى نۇر-سۇلتان قالاسىندا وتەدى.

 

سوڭعى جاڭالىقتار