6 قاڭتار 2020, 17:08 423 0 سپورت انار لەپەسوۆا

ۇلتتىق قۇرامانىڭ جارتىلاي قورعاۋشىسى "استانادان" كەتتى

فۋتبولدان كازاقستان ۇلتتىق قۇراماسىنىڭ جارتىلاي قورعاۋشى سەرىكجان مۇجىقوۆ ەڭبەك كەلىسىمشارتىنىڭ اياقتالۋىنا بايلانىستى ەلوردالىق ۇجىمنان كەتتى. بۇل تۋرالى "استانا" فۋتبول كلۋبىنىڭ ءباسپاسوز قىزمەتى حابارلادى. 

فۋتبولشى "استانا" ساپىنا 2014 جىلى قوسىلىپ، ودان كەيىن "قايسارعا" اۋىسىپ، ارتىنشا ەلوردا كومانداسىنا قايتا ورالعان ەدى.

سەرىكجان وسى ارالىقتا "استانا" قۇرامىندا 189 ويىن وتكىزىپ، 19 گول سوعىپ، 31 ناتيجەلى پاس بەرگەن.

ول كوماندا قۇرامىندا بولعان جىلداردا التى دۇركىن قازاقستان چەمپيونى اتانىپ، ودان بولەك چەمپيوندار ليگاسى مەن ەۋروپا ليگاسىنىڭ توپتىق كەزەڭدەرىندە وينادى.

"استانا" فۋتبول كلۋبى سەرىكجانعا كوماندا قۇرامىندا وتكىزگەن جارقىن ساتتەرى ءۇشىن ەرەكشە العىس ءبىلدىرىپ، الداعى مانسابىنا تولاعاي تابىس تىلەيتىنىن جەتكىزدى.

سوڭعى جاڭالىقتار