24 جەلتوقسان 2019, 14:38 730 0 الەۋمەت انار لەپەسوۆا

ەلىمىزدىڭ جولدارىندا ءبىر اپتادا 39 ادام قازا تاپتى

سۋرەت: ءىىم ءباسپاسوز قىزمەتى
سۋرەت: ءىىم ءباسپاسوز قىزمەتى

16-22 جەلتوقسان ارالىعىندا قازاقستان جولدارىندا 104 جول-كولىك وقيعاسى تىركەلگەن. سولاردىڭ سالدارىنان 39 ادام قازا تاۋىپ، 158-ءى ءتۇرلى جاراقات الدى.

ىشكى ىستەر مينيسترلىگى بۇنىڭ سەبەبىن اۋا رايىنىڭ قولايسىزدىعىمەن بايلانىستىرىپ وتىر دەپ حابارلايدى  Zakon.kz.

ىشكى ىستەر ءمينيسترى ەرلان تۇرعىمباەۆتىڭ ايتۋىنشا، اۋا تەمپەراتۋراسىنىڭ 0 گرادۋسقا دەيىن كۇرت جىلىنۋىنا بايلانىستى جولدا كوكتايعاق پايدا بولعان، ال قالىڭ تۇمان، جاڭبىر مەن قار جاۋى جولداعى كولىك قوزعالىسىنا ەداۋىر كەدەرگى كەلتىرۋدە.

"دەگەنمەن، جول اپاتىنىڭ سانىن ازايتۋ ماقساتىندا پوليتسيا كۇندەلىكتى باق وكىلدەرى ارقىلى قولايسىز اۋا رايى جاعدايىندا كولىك قۇرالىن پايدالانۋ تۋرالى ۇگىت-ناسيحات جۇمىستارىن جۇرگىزدى. كوپتەگەن جۇرگىزۋشىلەردىڭ جازعى دوڭگەلەكپەن اينالمالى جولدار ارقىلى جابىق قوزعالىسى بار جولدىڭ قاۋىپتى اۋداندارىنا شىعىپ، جول قوزعالىسى ەرەجەلەرىن ورەسكەل بۇزعان فاكتىلەرى ءجيى تىركەلگەن", – دەپ مالىمدەدى مينيستر ۇكىمەت وتىرىسىندا.

وسىعان مىسال رەتىندە ۆەدومستۆو باسشىسى الماتى وبلىسىنىڭ تاس جولىندا ورىن العان ءىرى جول اپاتىن كەلتىرىپ ءوتتى. ايتۋىنشا، MAN جۇك كولىگىنىڭ جۇرگىزۋشىسى كوكتايعاقتا جولدىڭ ورتاسىنداعى قورشاۋدى بۇزىپ ءوتىپ، قاراما-قارسى بەتكە شىعىپ كەتكەن. ءسويتىپ، تاس جولدىڭ ەكى بەتىن دە جاۋىپ تاستاعان. سونىڭ سالدارىنان وقيعا ورنىندا كەپتەلىس پايدا بولىپ، بەس اۆتوكولىكتىڭ قاتىسۋىمەن تاعى ەكى جول-كولىك وقيعاسى ورىن الدى. ناتيجەسىندە ەكى ادام قازا بولىپ، تاعى ەكەۋى دەنە جاراقتىن الدى.

جالپى، اۋا رايىنىڭ قولايسىز جاعدايىنا بايلانىستى مىڭنان استام اۆتوكولىك كەپتەلىستە قالعان. قار كوشكىنىنەن 120 اۆتوكولىك پەن 900-دەن استام ادام قۇتقارىلدى.

قازىرگى ۋاقىتتا جولداعى جاعداي تۇراقتاندىرىلدى. جول قوزعالىسىنىڭ قاۋىپسىزدىگىن قامتاماسىز ەتۋ ءۇشىن بارلىق قاجەتتى تەحنيكالار مەن ادامدار جۇمىلدىرىلدى.

سوڭعى جاڭالىقتار