15 جەلتوقسان, 09:01 450 0 الەۋمەت انار لەپەسوۆا

الماتىدا جاتاقحانا ورتەنىپ، ءبىر ادام كوز جۇمدى

الماتىنىڭ المالى اۋدانىندا 4 قاباتتى جاتاقحانادان ءورت شىقتى. بۇل تۋرالى توتەنشە جاعدايلار دەپارتامەنتى حابارلادى. 

«كەشە ساعات 17.45-تە «101» پۋلتىنە الماتى اۋدانى، اۋەزوۆ كوشەسى، 62 «ا» مەكەنجايىندا ءورت بولىپ جاتقانى تۋرالى حابارلاما ءتۇستى. ساعات 17.55-تە جەتكەن قۇتقارۋشىلار 4 قاباتتى جاتاقحانانىڭ ءۇشىنشى قاباتىنداعى بولمە اشىق جالىنمەن ورتەنىپ جاتقانىن انىقتاعان»، - دەپ ءمالىم ەتتى تجد-دان.

قويۋ ءتۇتىن سالدارىنان تۇرعىندار دالاعا جۇگىرىپ شىعىپ، ءورت سوندىرۋشىلەرگە حابارلاسقان. سونداي-اق ءورت شىققان بولمەدە ادام بولۋى مۇمكىندىگىن ايتقان. «ادامداردى ىزدەۋ جانە ءتىلسىز جاۋدى اۋىزدىقتاۋ ءۇشىن گازتۇتىننەن قورعاۋ قىزمەتىنىڭ 2 بريگاداسى جۇمىلدىرىلدى. وسى ماقساتتا ءۇشىنشى قاباتتاعى تەرەزەگە دەيىن ءۇشيىندى ساتى ورناتىلىپ، جالىندى وشىرۋگە ءورت ءسوندىرۋ وقپانى بەرىلدى. ونىمەن ءبىر مەزگىلدە ەۆاكۋاتسيا جولدارىن قورعاۋ ءۇشىن ەكىنشى وقپان پايدالانىلدى»، - دەپ قوستى ءباسپاسوز قىزمەتىنەن.

بولمەدەن ءبىر ادامنىڭ ءمايىتى تابىلدى، جىنىسى جانە تۇلعاسى انىقتالۋ ۇستىندە. قولعا الىنعان شارالاردىڭ ارقاسىندا ءورتتىڭ جاتاقحانانىڭ قابىرعالاس ورنالاسقان بولمەلەرىنە جانە وزگە قاباتتارعا تارالۋىنا جول بەرىلگەن جوق. جالىن 17.59-دا وقشاۋلانىپ، تاعى 10 مينۋتتان كەيىن تولىعىمەن ءوشىرىلدى. زالال كەلگەن اۋماق - 20 شارشى مەتر.

 

تەگتەر الماتى ءورت

سوڭعى جاڭالىقتار