14 جەلتوقسان, 19:47 541 0 جاڭالىقتار اسىل تۇمار

"دەنەسىن 30% كۇيىك شالعان" – بالاباقشادا سورپاعا كۇيگەن قىزدىڭ اناسى سوتتاسۋدا

سۋرەت عالامتوردان الىندى
سۋرەت عالامتوردان الىندى

بالاباقشادا كۇيىپ قالعان قىزدىڭ اناسى ءبىلىم باسقارماسىمەن سوتتاسىپ جاتىر. ول بالاسىنىڭ ۇستىنە ىستىق سورپا توگىپ العان مەكتەپكە دەيىنگى مەكەمەنىڭ قىزمەتكەرلەرى ءتيىستى جازاسىن الماي، جايباراق جۇرگەنىنە نارازى. وقىس جاعداي ناۋرىز ايىندا اقتاۋداعى بالاباقشالاردىڭ بىرىندە بولعان. بۇل تۋرالى كتك ارناسى حابارلادى.

جەتى جاسار كارينانىڭ وڭباي كۇيگەن ءساتى بەينەباقىلاۋ كامەراسىنا جازىلعان. كادرلەردەن اس بولمەگە جۇگىرىپ كىرگەن قىزدىڭ ۇستىنە كۇتۋشى ايەل ىستىق سورپانى توگىپ العانىن كورۋگە بولادى. سالدارىنان ءبۇلدىرشىننىڭ دەنەسىن 30 پايىز كۇيىك شالعان. العاشىندا كارينانىڭ ءجۇرىپ-تۇرۋى دا مۇڭ بولىپتى. اناسى جۇمىسىنا سالعىرت قاراعان بالاباقشا قىزمەتكەرلەرىن كىنالاپ وتىر. «مەكتەپكە دەيىنگى مەكەمەدە بالالاردىڭ قاۋىپسىزدىگى مۇلدەم ساقتالماعان»، – دەيدى ول.

«ءبىز بارعاندا بالانىڭ ءۇستىباسى سورپا بولدى. ەشكىم جەدەل جاردەم شاقىرماعان. كيىمدەرىن بىردەن شەشكەنى اقىلعا قونىمسىز. العاشقى مەديتسينالىق كومەك مۇلدەم كورسەتىلمەگەن. قىزىم جانۇشىرا ايعالاپ جاتسا دا، تاربيەشى الاڭسىز ءجۇر. ويتكەنى ول ساڭىراۋ ەكەن. جاسى 72-دە. مۇنداي ادامدى قالاي جۇمىسقا الۋعا بولادى؟»، – دەپ شاعىنادى قىزدىڭ اناسى.

بالاسىن ۋايىمداعان ءسانيا توعىز ايدان بەرى تالاي اۋرۋحانا تابالدىرىعىن توزدىرىپتى. الايدا اقتاۋدان بىلىكتى مامان تاپاعانىن ايتادى. كەيىن قىزىن نۇر-سۇلتان قالاسىنا اپارىپ، بىرنەشە وتا جاساتقان. قازىر قىزدىڭ جاعدايى قالىپتى. بىراق دەنەسىندە كۇيىكتىڭ ىزدەرى ءالى بار. قىزىنىڭ قينالعانىن ەسكە العان انا كوزىنە ەرىكسىز جاس الدى:

«قىزىما 40 ەكپە سالدى. قينالعانىن كورىپ، جانىمدى قويارعا جەر تاپپادىم. بالاباقشا ديرەكتورى ءبىر اي وتكەن سوڭ ءبىزدى ۇمىتتى. قىزىم ءالى ءوز وزىنە كەلگەن جوق. ابدەن شوشىپ قالعان. بۇل جاعداي باسقالارعا دا ساباق بولۋى ءتيىس».

ال قالالىق ءبىلىم باسقارماسىنداعىلار بالاباقشانىڭ بىرقاتار قىزمەتكەرىن جۇمىستان شىعارعانىن ايتادى. ال بالانىڭ ەم-دومىنا مەكتەپكە دەيىنگى مەكەمەنىڭ ۇجىمى 600 مىڭ تەڭگە جيناپ بەرىپتى.اقتاۋ قالالىق ءبىلىم باسقارماسىنىڭ ءبولىم باسشىسى اقمارال بايشاحانوۆا ءىستىڭ ءمان-جايىن وزىنشە ءتۇسىندىرىپ بەردى:

«وسى جاعدايدان كەيىن ءبىز بالاباقشادا قىزمەتتىك تەكسەرىس جۇرگىزدىك. تاربيەشى مەن ديرەكتوردان تۇسىنىكتەمە الدىق. اتالعان بالاباقشانىڭ تاربيەشىسى، ونىڭ كومەكشىسى مەن مەدبيكە جۇمىستان بوساتىلدى.»

الايدا ءسانيا قالالىق ءبىلىم باسقارماسىن سوتقا بەرگەن. وقيعاعا قاتىستى العاشقى سوت پروتسەسى دە باستالدى. كارينانىڭ اناسى كىنالىلەر ءتيىستى جازاسىن المايىنشا، سوڭىنا دەيىن كۇرەسەمىن دەپ وتىر. قىزدىڭ ەمىنە كەتكەن قاراجاتتى ول تولىق كولەمدە ءوندىرىپ الماقشى.

aikyn.kz

سوڭعى جاڭالىقتار