14 جەلتوقسان, 17:53 485 0 جاڭالىقتار اسىل تۇمار

پرەزيدەنتتەر تاۋەلسىزدىك كۇنىمەن قۇتتىقتاپ جاتىر

سۋرەت عالامتوردان الىندى
سۋرەت عالامتوردان الىندى

قاسىم-جومارت توقاەۆتىڭ اتىنا قازاقستان رەسپۋبليكاسىنىڭ تاۋەلسىزدىك كۇنىنە وراي شەت ەلدەردىڭ باسشىلارى مەن حالىقارالىق ۇيىمداردان قۇتتىقتاۋ حاتتار مەن جەدەلحاتتار كەلىپ ءتۇسىپ جاتىر، – دەپ حابارلادى akorda.kz

رەسەي فەدەراتسياسىنىڭ پرەزيدەنتى ۆلاديمير پۋتين مەملەكەت باسشىسى قاسىم-جومارت توقاەۆتى تاۋەلسىزدىك مەرەكەسىمەن قۇتتىقتادى. «ءسىزدىڭ ەلىڭىزدىڭ الەۋمەتتىك-ەكونوميكالىق، عىلىمي-تەحنيكالىق جانە باسقا دا سالالارداعى جەتىستىكتەرى جالپىعا ءمالىم. قازاقستاننىڭ الەمدىك ارەنادا بەدەلى بيىك، ايماقتىق جانە حالىقارالىق كۇن تارتىبىندەگى وزەكتى ماسەلەلەردى شەشۋدە سىندارلى ءرول اتقارادى. مەملەكەتتەرىمىز اراسىنداعى قارىم-قاتىناس ستراتەگيالىق ارىپتەستىك جانە وداقتاستىق رۋحىندا جىلدام دامىپ كەلەدى. ءارتۇرلى باعىتتار بويىنشا ەكىجاقتى ىنتىماقتاستىق، سونداي-اق، ەۋرازيالىق ينتەگراتسيالىق پروتسەستەر اياسىنداعى ۇيلەستىرۋ شارالارى دا وڭ ناتيجەسىن بەرۋدە»، – دەلىنگەن قۇتتىقتاۋ حاتىندا.

ۆلاديمير پۋتين قاسىم-جومارت توقاەۆقا زور دەنساۋلىق، تابىس، ال قازاقستان حالقىنا باق-بەرەكە تىلەدى.

قىتاي حالىق رەسپۋبليكاسىنىڭ توراعاسى سي تسزينپين قازاقستان تاۋەلسىزدىگىنىڭ 28 جىلدىعىنا وراي، قىتاي ۇكىمەتى مەن حالقىنىڭ جانە جەكە ءوزىنىڭ اتىنان قۇتتىقتاۋ جولدادى. «مەن قىتاي-قازاق قارىم-قاتىناسىنىڭ دامۋىنا ۇلكەن ءمان بەرەمىن. «ءبىر بەلدەۋ، ءبىر جول» جوباسىن بىرلەسىپ جۇزەگە اسىرۋ ءۇشىن ەلدەرىمىز بەن حالقىمىزدىڭ يگىلىگى جولىندا زور تابىستارعا وزىڭىزبەن بىرلەسىپ جەتۋگە دايىنمىن»، – دەپ جازعان قۇتتىقتاۋ حاتىندا.

سي تسزينپين قازاقستان حالقىنا ءوسىپ-وركەندەۋ تىلەدى.

ۇلىبريتانيا كورولەۆاسى ەليزاۆەتا ءىى قازاقستان پرەزيدەنتى قاسىم-جومارت توقاەۆتى تاۋەلسىزدىك كۇنىمەن قۇتتىقتادى. «جوعارى مارتەبەلى، ءسىزدى ۇلتتىق مەرەكەڭىزبەن زور ريزاشىلىقپەن قۇتتىقتاي وتىرىپ، قازاقستان حالقىنا باقىت پەن وركەندەۋ تىلەيمىن»، – دەلىنگەن جەدەلحاتتا.

بىرىككەن اراب امىرلىكتەرىنىڭ پرەزيدەنتى حاليفا بەن زايد ءال ناحايان: «ءسىزدى جانە دوستاس حالقىڭىزدى تاۋەلسىزدىك كۇنىمەن شىن جۇرەكتەن قۇتتىقتايمىن. جوعارى مارتەبەلى، سىزگە زور دەنساۋلىق، باقىت پەن ساتتىلىك، ال دوستاس حالقىڭىزعا يگىلىك پەن ىرىس تىلەيمىن»، – دەپ قۇتتىقتاۋ جولدادى.

وزبەكستان رەسپۋبليكاسىنىڭ پرەزيدەنتى شاۆكات ميرزيوەۆ ءوزىنىڭ جانە باۋىرلاس وزبەك حالقىنىڭ اتىنان قۇتتىقتادى. «ءبىز باۋىرلاس قازاقستاننىڭ قوعامدىق-ساياسي جانە الەۋمەتتىك-ەكونوميكالىق دامۋىنداعى جانە حالىقارالىق ارەناداعى ابىرويىنىڭ كۇن ساناپ ارتۋىنا شىن جۇرەكتەن قۋانىشتىمىز. وزبەك-قازاق قارىم-قاتىناسىندا بارلىق سالا بويىنشا جوعارى سەنىم مەن ءوزارا تۇسىنىستىك قالىپتاسقان. ءسىزدى جانە قازاقستان حالقىن تاۋەلسىزدىك مەرەكەسىمەن قۇتتىقتايمىن»، – دەلىنگەن جەدەلحاتتا.

قىرعىزستان رەسپۋبليكاسىنىڭ پرەزيدەنتى سوورونباي جەەنبەكوۆ قاسىم-جومارت توقاەۆ پەن قازاقستان حالقىن تاۋەلسىزدىك مەرەكەسىمەن قۇتتىقتاپ: «قىرعىزستان مەن قازاقستان اراسىنداعى ستراتەگيالىق سەرىكتەستىك، دوستىق، وداقتاستىق، تاتۋ كورشىلىك قاتىناستار بۇدان بىلاي دا نىعايا بەرەتىنىنە سەنىم بىلدىرەمىن»، – دەپ جازعان.

سونداي-اق تاجىكستان پرەزيدەنتى ەمومالي راحمون، تۇركىمەنستان پرەزيدەنتى گۋربانگۋلى بەردىمۇحامەدوۆ، ازەربايجان پرەزيدەنتى يلحام اليەۆ ەلىمىزدى تاۋەلسىزدىك مەرەكەسىمەن قۇتتىقتاپ، جەدەلحاتتارىن جولدادى.

ۋكراينا پرەزيدەنتى ۆلاديمير زەلەنسكي قاسىم-جومارت توقاەۆقا: «ساياسي-ەكونوميكالىق جانە قاۋىپسىزدىك ماسەلەلەرىن شەشە وتىرىپ، قازاقستان رەسپۋبليكاسى ايماقتاعى كوشباسشى جانە الەمدىك ارەنادا ابىرويلى مەملەكەتكە اينالدى. جوعارى مارتەبەلى، سىزگە زور دەنساۋلىق، كۇش-قۋات، دوستاس قازاقستان حالقىنا بەيبىتشىلىك، بەرەكە مەن وركەندەۋ تىلەيمىن»، – دەپ ىزگى نيەتىن جولداعان.

كورەيا رەسپۋبليكاسىنىڭ پرەزيدەنتى مۋن چجە ين ءوزىنىڭ قۇتتىقتاۋ جەدەلحاتىندا «قازاقستان مەن كورەيا اراسىنداعى دوستىق قاتىناستار ءتۇرلى سالاداعى تىعىز ىقپالداستىقتىڭ ارقاسىندا تۇراقتى دامىپ كەلەدى. اتاپ ايتقاندا جوعارى دەڭگەيدەگى بەلسەندى ءىس-قيمىلداردىڭ، سونىڭ ىشىندە مەنىڭ بيىلعى ساپارىمنىڭ ناتيجەسىندە ەكى ەلدىڭ دوستىق قاتىناستارى نىعايا تۇسكەنىنە قۋانىشتىمىن»،– دەلىنگەن.

سونىمەن قاتار قازاقستان تاۋەلسىزدىگىنىڭ 28 جىلدىعىنا وراي، قاسىم-جومارت توقاەۆتىڭ اتىنا نيدەرلاند كورولى ۆيللەم-الەكساندر، مالايزيا كورولى سۇلتان ابدۋللا رياتۋددين ءال-مۇستافا بيللاح، بەلگيا كورولى فيليپپ، شۆەتسيا كورولى كارل گۋستاۆ، اۋعانستان يسلام رەسپۋبليكاسىنىڭ پرەزيدەنتى موحامماد اشراف عاني، چەح رەسپۋبليكاسىنىڭ پرەزيدەنتى ميلوش زەمان، ماجارستان پرەزيدەنتى يانوش ادەر، تايلاند كورولدىگىنىڭ پرەمەر-ءمينيسترى پرايۋت چان-وچا، حورۆاتيا پرەزيدەنتى كوليندا گرابار-كيتاروۆيچ، بولگاريا پرەزيدەنتى رۋمەن رادەۆ، ليۆان رەسپۋبليكاسىنىڭ پرەزيدەنتى ميشەل اۋن، لاتۆيا رەسپۋبليكاسىنىڭ پرەزيدەنتى ەگيلس لەۆيتس، يراك رەسپۋبليكاسىنىڭ پرەزيدەنتى بارحام سالەح، گرەكيا رەسپۋبليكاسىنىڭ پرەزيدەنتى پروكوپيس پاۆلوپۋلوس، كانادانىڭ گەنەرال-گۋبەرناتورى جيۋلي پايەتت، ءابۋ-ءدابيدىڭ مۇراگەر حانزاداسى مۇحاممەد يبن زايد ءال ناحايان، تمد اتقارۋ كوميتەتىنىڭ توراعاسى – اتقارۋشى حاتشىسى سەرگەي لەبەدەۆ، يسلام ىنتىماقتاستىعى ۇيىمىنىڭ باس حاتشىسى يۋسەف ءال-وسەيمەن، بىرىككەن اراب امىرلىكتەرىنىڭ ۆيتسە-پرەزيدەنتى، پرەمەر-مينيستر، دۋباي امىرلىگىنىڭ بيلەۋشىسى مۇحاممەد بەن راشيد ءال ماكتۋم، ۇجىمدىق قاۋىپسىزدىك شارتى ۇيىمى باس حاتشىسىنىڭ مىندەتىن اتقارۋشى ۆالەري سەمەريكوۆتەن قۇتتىقتاۋ جەدەلحاتتارى كەلدى.

سوڭعى جاڭالىقتار