12 جەلتوقسان 2019, 17:26 1135 0 الەۋمەت اسەل انۋاربەك

جاستار – ۇلت بولاشاعى، مەملەكەت مارتەبەسى

مەملەكەت باسشىسى قاسىم-جومارت توقاەۆ جاستار جىلىنىڭ جابىلۋى جانە ۆو­لونتەر جىلىنىڭ اشىلۋ ءراسى­مىنە قا­تىس­تى. سالتاناتتى شارا بارىسىندا پرەزيدەنت ەلباسىنىڭ باستاماسىمەن وتكەن جاستار جىلىندا اتقارىلعان جۇ­مىستاردى قورىتىندىلاپ، كەلەر جىلدىڭ ماڭىزدى جوبالارىمەن تانىستىردى.

ەلىمىزدىڭ تۇكپىر-تۇكپىرىنەن كەلگەن 500-گە جۋىق جاستىڭ باسىن قوسقان جيىننىڭ تاۋەل­سىز­دىك كۇنىمەن تۇسپا-تۇس كەلگەنىن تىلگە تيەك ەتكەن مەملەكەت باسشىسى ەل مەرەيىن اسىرۋ جاستاردىڭ قولىندا ەكەنىن اتاپ ءوتتى. «ءبىز ءۇشىن بۇدان اسقان قاستەرلى ءارى ماڭىزدى مەرەكە جوق. تاۋەل­سىز­دىگىمىزدى نىعايتىپ، ەلىمىزدى ودان ارى وركەندەتۋ – قازىرگى ۇرپاقتىڭ قاسيەتتى بورىشى. سوندىقتان ءبىز سىزدەرگە زور ءۇمىت ارتامىز. مەملەكەتىمىزدىڭ كەلەشەگى – وزدەرىڭىز! بۇگىنگى جاستار – ەلىمىزدىڭ ەرتەڭى، ۇلتىمىزدىڭ بولاشاعى، مەملەكەتىمىزدىڭ مارتەبەسى. ۇرپاعىن ايالاي بىلگەن حالىق ىرگەلى جۇرتقا اينالاتىنى بەلگىلى. ءبىز حالقىمىزدى الەمگە تانىتقان ەڭ اسىل قاسيەتتەردى سىزدەردىڭ بويلارىڭىزدان كورگىمىز كەلەدى»، – دەدى قاسىم-جومارت توقاەۆ.

پرەزيدەنتتىڭ ايتۋىنشا، بيىل 5 مىڭ ازامات مەملەكەتتەن گرانت الىپ، جاس كاسىپكەر اتانعان. الداعى 3 جىل ىشىندە ولاردىڭ سانى 30 مىڭعا كو­بەيمەك. سونداي-اق مەملەكەت باسشىسى جۇمىس­شى جاستاردى قولداۋ جۇمىستارىنىڭ جالعاسا بەرەتىنىن ەسكەرتىپ، ەلىمىزدىڭ ءىرى قالالارىندا جۇمىس ىستەيتىن جاستارعا 9 مىڭ پاتەر بەرۋ تۋرالى شەشىم قابىلداعانىن جەتكىزدى. پاتەردى جالعا الۋ قۇنى ايىنا 15 مىڭ تەڭگە بولادى.

مەملەكەت باسشىسى ءوز سوزىندە جاستاردى قولداۋ جونىندە بىرىڭعاي كەشەندى باعدارلاما جاساۋ قاجەتتىنە توقتالدى. «بىرىڭعاي باعدار­لاما وسكەلەڭ ۇرپاقتىڭ وزەكتى پروبلەمالارىن شەشۋگە باعىتتالادى. ەڭ باستىسى، ونىڭ مەحانيزمى جاستارىمىز ءۇشىن قاراپايىم ءارى تۇسىنىكتى بولۋى ءتيىس. جەكە جانە كاسىبي تۇرعىدان ءوسۋ، جۇمىسقا ورنالاسۋ نەمەسە تۇرعىن ءۇي الۋ ءۇشىن قازاقستاننىڭ قاي جەرىندە قانداي مۇمكىندىكتەر بار ەكەنىن اركىم بىلۋگە ءتيىس»، – دەپ اتاپ ءوتتى ق.توقاەۆ.

سونىمەن قاتار پرەزيدەنت وتباسى ينستيتۋتىنا باسا ءمان بەرىلمەي وتىرعانىنا دا نازار اۋداردى. «جاستار ساياساتى تۋرالى ايتقاندا وتباسى ينستيتۋتىن ۇمىتپاۋىمىز كەرەك. بۇل – ءداستۇردى، ۇلتتىق قۇندىلىقتاردى جانە ۇرپاقتار ساباقتاستىعىن ساقتاۋ ءۇشىن وتە ماڭىزدى. وكىنىشكە قاراي، قازىرگى تاڭدا اجىراسۋ فاكتىلەرى وسى سالاداعى تۇيتكىلدى ماسەلەنىڭ بىرىنە اينالدى»، – دەدى قاسىم-جومارت توقاەۆ. مەملەكەت باسشىسىنىڭ ايتۋىنشا، وتباسى قۇندىلىقتارىن دارىپتەۋدىڭ مەملەكەت ءۇشىن ماڭىزى زور.

– حالقىمىزدا «وتان – وتباسىنان باس­تالادى» دەگەن قاناتتى ءسوز بار. ءاربىر وتباسىن ساقتاۋ – وتانىمىزدىڭ بەرىك بولۋى­نىڭ كەپىلى. جاس شاڭىراق باقىت بەسىگىنە اي­نالۋعا ءتيىس. ولاردىڭ ارقايسىسىنا تۇ­تاستىق پەن تاتۋلىقتىڭ ءداستۇرىن ورنىق­تىرۋىمىز كەرەك. زيالى قاۋىم وكىلدەرى مەن ۇستازدار جاستار اراسىندا ءتۇسىندىرۋ جۇ­مىس­تارىن جۇرگىزىپ، وتباسى قۇندىلىق­تا­رىن دارىپتەۋى قاجەت»، – دەدى پرەزيدەنت.

قاسىم-جومارت كەمەلۇلى اتاپ ايتقان ماڭىزدى ماسەلەنىڭ ءبىرى – ءبىلىم بەرۋ ساپاسى. مەملەكەت باسشىسى ديپلوم باسىپ شى­عاراتىن جانە تاراتاتىن  مەكەمەگە اي­نال­عان جوعارى وقۋ ورىندارىنا قاتىستى شارا قابىلداۋ قاجەتتىگىن تالاپ ەتتى. سونىمەن قاتار پرەزيدەنت ۇكىمەتكە جوعارى وقۋ  ورىندارى مەن كوللەدج ستۋدەنتتەرىنىڭ شاكىرتاقىسىن كوتەرۋ تۋرالى تاپسىرما جۇكتەدى.

– جوعارى وقۋ ورىندارى ستۋدەنتتەرىنىڭ ستي­پەندياسىن ارتتىرۋ وزەكتى ماسە­لە­لەردىڭ ءبىرى ەكەنىن بىلەمىن. بۇل ماسەلەگە كوڭىل بولىنبەي قالدى. 2016  جىلدان بەرى ستيپەنديا كوبەيگەن جوق. سوندىقتان ستۋدەنتتەردى قولداۋ ءۇشىن  2020 جىلدىڭ 1 قاڭتارىنان باستاپ باكالاۆريات، ماگيس­تراتۋرا مەن  دوكتورانتۋرادا وقيتىن ستۋدەنتتەردىڭ ستيپەندياسىن 25 پايىزعا ءوسىرۋ جونىندە شەشىم قابىلدادىم. بۇل جال­پى 130 مىڭعا جۋىق ادامدى قامتيدى. مۇنداي قولداۋ كوللەدج ستۋدەنتتەرىنە دە كورسەتىلەتىن بولادى، – دەدى مەملەكەت باسشىسى.

قاسىم-جومارت توقاەۆ الداعى ۆولونتەر جىلىنىڭ مىندەتتەرى تۋرالى ايتا كە­لىپ،  بىرنەشە نەگىزگى باعىتتارعا نازار اۋ­دارۋدى ۇسىندى. پرەزيدەنت ۆولونتەرلىكتى ۇلتتىق ماسشتابتا عانا ەمەس، ءاربىر قالا مەن اۋىلدا دامىتۋ كەرەك دەپ سانايتىنىن ايتتى. سونىمەن قاتار ۇجىمدىق ۆولونتەر­لىكتى  وركەندەتۋگە مەملەكەتتىك اپپاراتتى دا، ۇلتتىق جانە ءىرى كومپانيالاردى دا ات­سالىسۋعا شاقىردى.

– دانا حالقىمىز «جۇمىلا كوتەرگەن جۇك جەڭىل» دەگەن. قايىرىمدىلىق پەن مەيى­رىمدىلىك – قانىمىزعا سىڭگەن قاسيەت. قا­زاقتا اسار  جاساپ، ءبىر-بىرىنە كومەكتەسىپ، قول­داۋ كورسەتۋ ءداستۇرى بار. ونىڭ ۆو­لونتەر­لىكپەن ۇندەسەتىنى ءسوزسىز. سون­دىقتان الداعى جىلى سول ءداستۇردى زامانعا ساي قايتا جاڭعىرتۋىمىز قاجەت، – دەدى مەملەكەت باسشىسى.

قازاقستان پرەزيدەنتى ءوز سوزىندە ۆولونتەرلىك قىزمەتتى ەڭبەك وتىلىنە قوسۋدى ۇسىندى. «ۆولونتەرلىك ساعاتتاردى ەڭبەك وتىلىنە قوسۋ ادىستەمەسىن ەنگىزۋ ماڭىزدى. ءاسى­رەسە، بۇل وسى سالادا تۇراقتى ىستەيتىن­دەر­گە قاتىستى. مەنىڭ ويىمشا، بۇل، ماڭىزدى ماسەلە»، – دەدى مەملەكەت باسشىسى. سونىمەن قاتار مەملەكەت باسشىسى ۇكى­مەتكە ۆولونتەر ستۋدەنتتەردىڭ شاكىرتا­قىسىن كوبەيتۋ ماسەلەسىن شەشۋدى تاپسىردى. ال كوممەرتسيالىق باعىتتا وقيتىندار ءۇشىن الەۋمەتتىك ستۋدەنتتىك كرەديت جۇيەسىن ەنگىزۋ ۇسىنىلدى.

شارا سوڭىندا قاسىم-جومارت توقاەۆ بەل­سەندى جاستاردى مەملەكەتتىك ناگرا­دا­لار­مەن جانە العىسحاتتارمەن ماراپاتتادى.

سوڭعى جاڭالىقتار