10 جەلتوقسان, 18:54 463 0 الەۋمەت انار لەپەسوۆا

ەلوردالىق مۇعالىمدەر كەمبريدج ۋنيۆەرسيتەتىندە ءبىلىمىن جەتىلدىردى

الەمدەگى ەڭ ۇزدىك جوعارى وقۋ ورنىنا اينالعان كەمبريدج ۋنيۆەرسيتەتىندە ەلوردالىق 5 مەكتەپتىڭ مۇعالىمدەرى مەن قالالىق ءبىلىم بەرۋدى جاڭعىرتۋ ورتالىعىنىڭ ادىسكەرلەرى بىلىكتىلىگىن ارتتىردى. بۇل تۋرالى نۇر-سۇلتان قالاسى اكىمدىگىنىڭ ءباسپاسوز قىزمەتى حابارلادى.

«Share» حالىقارالىق جوباسىن جۇزەگە اسىرۋ اياسىندا اعىمداعى جىلدىڭ 1-7 جەلتوقسانى ارالىعىندا كەمبريدج قالاسىندا Bottisham Village College, Sawston Village College جانە كەمبريدج ۋنيۆەرسيتەتىنىڭ ءبىلىم بەرۋ فاكۋلتەتىندە رەفلەكسيرلەۋشى پراكتيك مۇعالىمدەردىڭ قاتىسۋىمەن بىرنەشە پايدالى workshop-تار ءوتتى.

حالىقارالىق جوباعا ەلوردالىق № 37, 58, 59, 67, 76 مەكتەپتەرىنىڭ مۇعالىمدەرى مەن ءبىلىم بەرۋدى جاڭعىرتۋ ورتالىعىنىڭ ادىسكەرلەرى قاتىستى. شارا بارىسىندا مەكتەپ ءومىرى، مادەنيەتى، قۇندىلىقتارى، كوزقاراسى، ميسسياسى جانە زەرتتەۋ قىزمەتى، مەكتەپ پەداگوگتارىن وقىتۋ جانە وقىتۋ تاجىريبەسىن جەتىلدىرۋ تۋرالى دارىستەر وقىتىلدى.

سونداي-اق ۇستازدار رەفلەكسيۆتى زەرتتەۋ قاۋىمداستىعىن قۇرۋ، وزگەرىستەردى باسقارۋ، وزگەرىستەردى زەرتتەۋدىڭ جانە ءىس — ارەكەتتەگى تاجىريبەنى زەرتتەۋدىڭ نەگىزگى پروتسەستەرى (Action research) سەكىلدى ماسەلەردى تالقىلادى.

ودان بولەك، مۇعالىمدەر پسيحولوگ-زەرتتەۋشىلەر كوللين ماكلافلين مەن كەيت ەۆانسپەن كەزدەسىپ، سۇراقتارىنا مازمۇندى جاۋاپتاردى الدى.

ءىس-شارا بارىسىندا 2020 جىلدىڭ 20-21 قاڭتارىندا نۇر-سۇلتان قالاسىندا وتەتىن الداعى workshop باعدارلاماسى تالقىعا سالىندى.

سوڭعى جاڭالىقتار