10 جەلتوقسان, 11:45 349 0 جاڭالىقتار اسىل تۇمار

«الماتى سۋ» باسشىسى جۇمىستان كەتسىن!

كتك ارناسىنىڭ حابارلاۋىنشا، «الماتى سۋ» كوممۋنالدىق كومپانياسىنىڭ مەدەۋ ۋچاسكەلىك قىزمەتكەرلەرى دۇيسەنبىدە جۇمىسقا شىعۋدان باس تارتقان. ولار جاڭا باسشىنىڭ قىزمەتىنەن كەتىرۋدى تالاپ ەتىپ وتىر.

جۇمىسشىلاردىڭ ايتۋىنشا، اۋدان ۋچاسكەسىنىڭ جاڭا باسشىسى قول استىنداعىلاردى قورلاپ، قورقىتاتىن كورىنەدى. ونىڭ ۇستىنە قىزمەتكەرلەر باسشىنى بىلىكسىز دەيدى.

«ادامعا سويلەگەندەي بولمايدى. شاقىرعىسى كەلسە «ەي، بەرى كەل» دەيدى. ادامگەرشىلىك پە؟ ءبىز نە، قويمىز با؟ بالقىتىپ بىرىكتىرۋشىگە بىلاي دەگەن: «يا تەبيا پو-چەرنومۋ ي پو-كراسنومۋ سلومايۋ». «پو-چەرنومۋ، پو-كراسنومۋ» دەگەن نە ءسوز؟ ول نە، بانديت پە ەدى؟ ءبىز مۇندا جۇرگەن كىمبىز؟ قىزمەتكەرلەرمەن بۇلاي جۇمىس ىستەۋگە بولمايدى»، – دەدى «الماتى سۋ» مكك جۇمىسشىسى ايدوس قۇرالبەكوۆ.

تەلەارنانىڭ حابارلاۋىنشا، ولار باسشى بەكىتكەن جاڭا ەرەجەگە دە شاعىمدانعان. ەندى ءاربىر قىزمەتكەر جۇمىس پروتسەسىن ۇيالى تەلەفونىنا تىركەپ وتىرۋى ءتيىس.

«مەن بريگاديرمىن، بريگاداعا جاۋاپ بەرەمىن. تاڭەرتەڭ وتكىزۋ جاساعىندا قول قويامىن. قايدا جانە قانداي جۇمىسقا شىققانىمىز سودان-اق بەلگىلى. مەن سۋرەتكە ءتۇسىرىپ جۇرە المايمىن. بۇعان ۋاقىت كەتەدى. بىردەڭە بولىپ قالسا، جاۋاپتى بريگادير رەتىندە مەن جاۋاپ بەرەمىن. سودان كەيىن عانا باسشى مەن ينجەنەر جاۋاپتى»، – دەيدى كاسىپورىن قىزمەتكەرى يۋري شەستاكوۆ.

تەلەارناعا پىكىر بىلدىرگەن باسشى قىزمەتكەرلەرىمەن ەشقايسىمەن جانجالداسپاعانىن ايتادى.

«جالا مەن جالعان. جاسىم 51-دە. جۇمىسشىلارىما قالاي جامان ءسوز ايتامىن؟ ابسۋرد قوي! وتكەن اپتادا چات اشقانبىز. ۆيدەو ەمەس، فوتو. ولار قايدا ەكەنىن سۋرەتكە ءتۇسىرىپ، جىبەرۋى كەرەك دەپ. بۇل زاڭنىڭ تالابى. بىزدە مىسالى اكىمدىكتەگىلەر ليۋك اشىق جاتىر دەپ ايتادى. بارىپ، تەكسەرەمىز»، – دەپ مالىمدەدى ىسقاق بۋرحان.

سۋ جەلىلەرى دەپارتامەنتىنىڭ باسشىلىعى ۇجىمداعى بۇل جايدان مۇلدەم حابارسىز بولىپ شىققان. كومپانياداعىلار دەرەۋ قىزمەتتىك تەكسەرىس باستادى.  «ازىرشە ىشكى تەكسەرىس جۇرگىزەمىز. بۇل ادامدى بۇگىننەن باستاپ جۇمىسىنان شەتتەتەمىز، تەكسەرىس بىتكەنشە»، – دەدى «الماتى سۋ» سۋ جەلىلەرى دەپارتامەنتى ديرەكتورى مۇراتحان نۇركەن.

ال مەكەمە قىزمەتكەرلەرى باسشىنى ورنىنان الىپ تاستاماسا، جۇمىسقا شىقپايمىز دەپ وتىر.

فوتولار دەرەككوزدەن الىندى

سوڭعى جاڭالىقتار