10 جەلتوقسان, 11:08 344 0 جاڭالىقتار اسىل تۇمار

مەكتەپ وقۋشىسى مۇگەدەك بالانىڭ ەمىنە جيناعان قارجىسىن ۇرلاعان

اقتوبەدە مەكتەپ وقۋشىسى الاياقتىق جاسادى دەگەن كۇدىككە ىلىكتى. ول ناۋقاس بالانىڭ ەمىنە جينالعان 800 مىڭ تەڭگەگە جۋىق قارجىنى الىپ كەتكەن. پوليتسيا بۇل ءىستى ۇزاق ۋاقىت تەرگەدى. ەكىنشى دەڭگەيلى بانك قوسىمشاسى ارقىلى بالانىڭ ەمىنە جينالعان 790 مىڭ تەڭگە ۇرلانعان. قىلمىستىق كودەكستىڭ «الاياقتىق» بابى بويىنشا ءىس قوزعالىپ، تەرگەۋ ءالى جالعاسىپ جاتىر.

24.kz-ءتىڭ حابارلاۋىنشا، وبلىستىق پوليتسيا دەپارتامەنتى ءباسپاسوز قىزمەتىنىڭ جەتەكشىسى ەربولات سارقۇلوۆ: «جابىرلەنۋشىنىڭ بالاسى تۋا ءبىتتى مۇگەدەك بولعان. رەسەيدىڭ سانكت-پەتەربۋرگ قالاسىنداعى ەمحاناعا قاجەتتى اقشانى حالىقتان كومەك سۇراپ جينادى. وتا جاساۋعا قاجەتتى قارجى جوعالعان كەزدە ارىز ءتۇسىردى. كريمينالدىق پوليتسيا قىزمەتكەرلەرى ماقساتتى جۇمىس ىستەپ، جەلتوقسان ايىنىڭ باسىندا اقتوبە قالاسىنداعى مەكتەپتەردىڭ بىرىندە ءبىلىم الىپ جۇرگەن 16 جاستاعى وقۋشىنى انىقتاپ، ۇستادى. كۇدىكتى ارنايى كومپيۋتەرلىك باعدارلامالاردى پايدالانۋ ارقىلى WhatsApp جەلىسىمەن حات الماسقان. سول كەزدە جابىرلەنۋشىنىڭ ۇيالى تەلەفونىنا ەلەكتروندى سىلتەمە جاساپ، اقپاراتتىق جۇيەگە زاڭسىز كىرىپ كەتتى. بانك كارتاسىنىڭ ەسەپشوتىن، ونىڭ قۇپيا سانىن ءبىلىپ، «Steam» ويىن اككاۋنتتارىنا اقشا اۋداردى. ءارى ەلەكتروندى اقشا (Bitcoin) ساتىپ العان. قازىرگى ۋاقىتتا تەرگەۋ امالدارى جۇرگىزىلىپ، وسىعان ۇقساس قىلمىستارعا قاتىسى بار-جوعى تەكسەرىلۋدە»، – دەپ مالىمدەگەن.

سوڭعى جاڭالىقتار