9 جەلتوقسان, 17:13 442 0 سپورت انار لەپەسوۆا

قازاقستاندىق اۋىر اتلەت بارلىق مەدالدارىنان ايرىلدى

قازاقستاندىق اۋىر اتلەت ۆلاديمير سەدوۆ 2009 جىلعى الەم چەمپيونى اتاعىنان ايرىلدى.

حالىقارالىق اۋىر اتلەتيكا فەدەراتسياسى (IWF) سەدوۆتى  دوپينگ قولدانعانى ءۇشىن 2008 جانە 2016 جىلدار ارالىعىندا العان بارلىق مەدالدارىنان ايىرۋ تۋرالى شەشىم قابىلدادى. ياعني، قازاقستاندىق سپورتشى 2009 جانە 2016 جىلعى ازيا چەمپيوناتتارىنداعى ەكى التىن، چا-2011 كۇمىسى، 2013 جىلعى الەم چەمپيوناتى مەن 2014 جىلعى الەم چەمپيوناتىنداعى قولا مەن كۇمىس مەدالداردى قايتارىپ بەرمەك. 

2016 جىلدىڭ جازىندا IWF جانە دۇنيەجۇزىلىك دوپينگكە قارسى اگەنتتىك (WADA) قازاقستاندىق سىناقتاردى قايتا تەكسەرىپ، ولاردا تىيىم سالىنعان ءدارى-دارمەك ستانوزولولىنىڭ ىزدەرىن تاپقان بولاتىن.

ەكى جىلعا سوزىلعان تەرگەۋدى اياقتاعاننان كەيىن سەدوۆ ەكىنشى رەت دوپينگ قابىلداعانى ءۇشىن سوتتالعاندىقتان، سەگىز جىلعا شەتتەتىلدى. سودان كەيىن IWF ونى 2008 جىلعى وليمپياداداعى ءتورتىنشى ورنىنان ايىردى.

 2009 جىلى كورەيادا وتكەن الەم چەمپيوناتىندا ۆلاديمير سەدوۆ التىن مەدال جەڭىپ العان ەدى. ەندى  بۇل التىن اۆتوماتتى تۇردە ازىربايجاندىق اۋىر اتلەت نيزامي پاشاەۆقا بۇيىردى. وسىلايشا، نيزامي پاشاەۆ اۋىر اتلەتيكادان الەمنىڭ ءۇش دۇركىن چەمپيونى اتاندى. سونداي-اق، ول ءازىربايجاندا ءۇش رەت الەم چەمپيونى اتانعان العاشقى سپورتشى رەتىندە تاريحقا ەنبەك. 

سوڭعى جاڭالىقتار