9 جەلتوقسان, 11:39 394 0 جاھان انار لەپەسوۆا

قازاقستاندىقتار كولۋمبياعا ۆيزاسىز بارا الادى

قازاقستان مەن كولۋمبيا اراسىندا ۆيزاسىز ءتارتىپ ورناتىلدى. بۇل تۋرالى قر سىرتقى ىستەر مينيسترلىگى حابارلادى. 

«كولۋمبيا استاناسىندا ەكى ەلدىڭ سىرتقى ىستەر مينيسترلەرىنىڭ ورىنباسارلارى دەڭگەيىندەگى قازاقستان-كولۋمبيا ءسىم-ارالىق ساياسي كونسۋلتاتسياسىنىڭ كەزەكتى راۋندى ءوتتى. كەلىسسوزدەر بارىسىندا قازاقستان سىرتقى ىستەر ءمينيسترىنىڭ ورىنباسارى ەرجان اشىقباەۆ ەنەرگەتيكا، تاۋ-كەن ونەركاسىبى سالاسىنداعى ەكىجاقتى ىنتىماقتاستىقتى دامىتۋدىڭ جاقسى الەۋەتىنە، سونداي-اق قازاقستان رەسپۋبليكاسىنىڭ ترانزيتتىك جانە كولىكتىك مۇمكىندىكتەرىنىڭ تارتىمدىلىعىن ەسكەرە وتىرىپ، شاعىن جانە ورتا بيزنەس اراسىندا ىسكەرلىك بايلانىس ورناتۋعا نازار اۋداردى. قازاقستان سىرتقى ساياسات ۆەدومستۆونىڭ باسشىسى مۇحتار تىلەۋبەردىنىڭ كولۋمبيانىڭ جاڭادان تاعايىندالعان سىرتقى ىستەر ءمينيسترى كلاۋديا بليۋمعا ارنالعان قۇتتىقتاۋىن جەتكىزە وتىرىپ، قازاقستاندىق ديپلومات نۇر-سۇلتان قالاسىندا ساياسي كونسۋلتاتسيالاردىڭ كەلەسى راۋندىن ونىڭ قاتىسۋىمەن وتكىزىلەتىنىنە سەنىم ءبىلدىردى», - دەدى قر ءسىم-نەن.

ءوز كەزەگىندە كولۋمبيا سىرتقى ىستەر ءمينيسترىنىڭ ورىنباسارى فرانسيسكو ەچەۆەرري ساياسي ديالوگتىڭ دامۋىنا جوعارى باعا بەرىپ، 2015 جىلدان بەرى وتكىزىلىپ جۇرگەن قازاقستاندىق ديپلوماتتار مەن قر پرەزيدەنتىنىڭ جانىنداعى مەملەكەتتىك باسقارۋ اكادەمياسىنىڭ ستۋدەنتتەرى ءۇشىن يسپان ءتىلى كۋرستارىن جالعاستىرۋعا دايىن ەكەندىگىن جەتكىزدى. سونداي-اق ساۋدا-ەكونوميكالىق جانە مادەني-گۋمانيتارلىق ىنتىماقتاستىقتىڭ كەڭەيۋىنە ءۇمىت ءبىلدىردى.

كەلىسسوزدەر بارىسىندا تاراپتار حالىقارالىق بەيبىتشىلىك پەن قاۋىپسىزدىكتى ساقتاۋ، جاڭا سىناقتار مەن قاۋىپ-قاتەرلەرگە قارسى ارەكەت ەتۋ، يادرولىق قارۋدى تاراتپاۋ جانە تەرروريزمگە قارسى كۇرەس ماسەلەلەرىمەن تىعىز جۇمىس ىستەۋگە قىزىعۋشىلىق ءبىلدىردى. بۇدان بولەك، ەىدۇ-عا قوسىلۋدىڭ پراكتيكالىق اسپەكتىلەرىن تالقىلاپ، حالىقارالىق ۇيىمدار شەڭبەرىندەگى ءوزارا قولداۋ تۋرالى ۋاعدالاستى. كەلىسسوزدەردىڭ قورىتىندىلارى بويىنشا ەكى ەلدىڭ سىرتقى ساياسي ۆەدومستۆولارىنىڭ وكىلدەرى ديپلوماتيالىق جانە قىزمەتتىك پاسپورتقا يە ازاماتتاردى ۆيزالىق تالاپتاردان بوساتۋ تۋرالى كەلىسىمگە قول قويدى.

سوڭعى جاڭالىقتار