9 جەلتوقسان, 10:00 425 0 رۋحانيات انار لەپەسوۆا

تۇركياداعى قازاقستاندىق جاستاردىڭ تۇڭعىش قۇرىلتايى ءوتتى

اعىمداعى جىلدىڭ 5-6-7 جەلتوقسان كۇندەرى تۇركيانىڭ ساكاريا شاحارىندا تۇرىكتىڭ جوعارعى وقۋ ورىندارىندا ءبىلىم الۋشى ستۋدەنتتەر باس قوستى. قازاقستاننىڭ تۇركياداعى ەلشىلىگى مەن ساكاريا قازاقستاندىق ستۋدەنتتەر قاۋىمداستىعى ۇيىتقىسىمەن وتكەن اتاۋلى شارا مەملەكەتتىك «رۋحاني جاڭعىرۋ» باعدارلاماسى، «جاستار جىلى» جانە تاۋەلسىزدىك كۇنىنە ورايلاستىرىلدى.

وعان قازاقستاننىڭ تۇركياداعى ەلشىسى ابزال ساپاربەكۇلى، ساكاريا گۋبەرناتورى احمەت حامدي ناۆير، تر قورشاعان ورتا ۆيتسە- ءمينيسترى مۋجاحيت دەميرتاش، ساكاريا مەرى ەكرەم يۋجە، شەتەلدىك تۇرىك جانە تۋىستاس حالىقتار قاۋىمداستىعى ۆيتسە - پرەزيدەنتi سايد يۋسۋف، ساكاريا ۋنيۆەرسيتەتiنiڭ رەكتورى فاتيح ساۆاشان، تۇرىكتىڭ بەلدى ساياساتكەرلەرى، قوعامدىق قايراتكەرلەر مەن ەلدىڭ 32 قالاسىندا وقيتىن 200-دەن استام جاستارىمىز قاتىستى. «تۇركياداعى قازاقستاندىق ستۋدەنتتەردىڭ 1-ءشى قۇرىلتايى» اتاۋىمەن وتكەن العاشقى باس قوسۋدىڭ ماقساتى، جاستار اراسىنداعى ءوزارا سەلبەسۋدى ارتتىرىپ، ەلىمىزدىڭ ەرتەڭىنە ەسەلى ۇلەس قوسۋ. مەملەكەتتىك باعدارلامالاردى تالقىلاپ، شەت ەلدىڭ ۇزدىك تاجىريبەلەرىن تۋعان جەردە قولدانۋ.

ءۇش كۇن بويى جالعاسقان قۇرىلتايدا، ەلىمىزدىڭ «شابىت» فولكلورلى-ەتنوگرافيالىق وركەسترى مەن قازاقستاننىڭ تۇكپىر-تۇكپىرىنەن جينالعان جاس ونەرپازدار ساحنا الدى. سونداي-اق، قازاقستاننىڭ تۇركياداعى ەلشىسى ابزال ساپاربەكۇلىنىڭ قاتىسۋىمەن ارنايى بريفينگ ۇيىمداستىرىلدى. ەلشى قۇرىلتايعا قاتىسۋشىلاردىڭ نازارىن ەلىمىزدە جاستاردىڭ ءوز قابىلەتتەرىن تانىتۋى ءۇشىن بەرىلگەن بىرەگەي مۇمكىندىكتەرگە، زامان شارتتارىنا جانە قارقىندى وزگەرىپ جاتقان الەم تالاپتارىنا ساي كەلەتىن ساپالى ءبىلىم الۋدىڭ ماڭىزدىلىعىنا اۋداردى. 2020 جىلى قازاق حالقىنىڭ ۇلى اقىنى، اعارتۋشىسى اباي قۇنانبايۇلىنىڭ 175 جىلدىق مەرەيتويىن انادولى ەلىندە جاستارىمىزبەن جوعارعى دەڭگەيدە مەرەكەلەۋ قاجەتتىگىن اتاپ ءوتتى.

سونىمەن قاتار، تۇرىكتىڭ بەلدى وقۋ وردالارىندا ءبىلىم الۋشى جاستار، كوكەيلەرىندە جۇرگەن سۇراقتارعا جاۋاپ الىپ، قاجەتتى تاقىرىپتار جونىندە تولىق مالىمەتپەن سۋسىندادى.

بۇدان بولەك، جەرگىلىكتى اكىمشىلىك باسشىلارىمەن كەزدەسىپ، جاستارعا قاجەتتى ۇسىنىستارىن جەتكىزدى. شەت ەلدىك تۇرىكتەر جانە تۋىستاس حالىقتار باسقارماسى وكىلىنەن «تۇركيا ستيپەندياسى» باعدارلاماسىنا قاتىستى ماڭىزدى سۇراقتار قويىلدى.

قۇرىلتاي قورىتىندىسىنا سايكەس، كەلەسى باسقوسۋ ەسكيشەحير قالاسىندا وتەتىن بولدى. سونداي-اق، تۇركياداعى بەلسەندى جاستار ۇلىستىڭ ۇلى كۇنىن ىستانبۇلدا تويلاۋعا ۋاعدالاستى.

ايتا كەتەرلىگى، ساكاريا سۋ جانە كاناليزاتسيا مەكەمەسى 3 ۇزدىك ستۋدەنتكە شاكىرتاقى تاعايىندادى.

شارا سوڭىندا قۇرىلتايعا قاتىسۋشى جاستار قالانىڭ تاريحي جەرلەرىمەن تانىستى.

سوڭعى جاڭالىقتار