8 جەلتوقسان, 11:35 400 0 ايماق انار لەپەسوۆا

قازاقستانداعى حالىق سانى ەڭ كوپ اۋىل جايلى نە بىلەمىز؟

قازاقستانداعى حالىق سانى ەڭ كوپ اۋىل – ماڭعىستاۋ وبلىسىنداعى بەينەۋ اۋىلى. بۇل تۋرالى ۇلتتىق ەكونوميكا مينيسترلىگى ستاتيستيكا كوميتەتى حابارلادى. 

كوميتەتتىڭ دەرەگىنشە، 2019 جىلدىڭ 1 ساۋىرىنە وسى اۋىلدىڭ حالىق سانى 53 286 ادام قۇراعان.

تاريحقا كوز جۇگىرتسەك، بەينەۋ اۋىلىنىڭ ىرگەتاسى 1916 جىلى قالانىپ، 1948-1963 جىلدار ارالىعىندا بەينەۋ ءوڭىرىن يگەرۋدىڭ ءبىرىنشى كەزەڭى اياقتالعان. ەكىنشى كەزەڭ 1963 جىلى ماقات-ماڭعىستاۋ، بەينەۋ-قوڭىرات تەمىرجولدارىنىڭ سالىنىپ، پايدالانۋعا بەرىلۋىنەن باستاۋ الادى. بۇرىنعى "جىبەك جولى" تورابى قايتادان ەل مەن ەلدى جالعاستىراتىن، ارالاستىراتىن كۇرەتامىرعا اينالىپ، بەينەۋ ستانتسياسىنىڭ باعى جانىپ، توعىز جولدىڭ تورابى، ورتا ازياعا شىعاتىن قازاقستاننىڭ قاقپاسى اتانعان. ورتالىق ازيا گاز قۇبىرى جەلىسى تارتىلىپ، كومپرەسسور ستانتسياسىنىڭ ورنالاسۋى، بەينەۋ اۋىلىنىڭ وسۋىنە زور اسەرىن تيگىزگەن. گازشىلار بەينەۋ مەن بورانقۇل اۋىلدارىن ءساندى عيماراتتارمەن ارلەي ءتۇستى.

اينالاسى ون جىلدىڭ ىشىندە بەينەۋ تەمىرجولشىلاردىڭ، گاز بەن مۇناي تاسىمالداۋشىلاردىڭ، قۇرىلىسشىلاردىڭ كوشەلەرى كوك جەلەككە تولى قالا ءتيپتى مەكەنىنە اينالعان. 1969 جىلى سام ءوڭىرىن ورىسكە تولتىرعان مال فەرمالارىنىڭ نەگىزىندە ماڭعىستاۋ كەڭشارى قۇرىلدى.

بۇگىندە 53 مىڭنان استام تۇرعىنى بار اۋىلدا جالپى ورتا ءبىلىم بەرەتىن 11 مەكتەپ، ون بوبەكجاي، ءبىر كەشكى مەكتەپ، ءبىر ونەر مەكتەبى، ءبىر سپورت مەكتەبى، جەكپە-جەك سپورت زالى، بوكس زالى، كاسىپتىك ءبىلىم بەرەتىن ەكى كوللەدج، جەكە قوسىمشا ءبىلىم بەرەتىن بەس ورتالىق، ءبىر اۋرۋحانا بار.

بەينەۋ اۋىلدىق اكىمدىگىنىڭ مالىمەتىنشە، اۋىلداعى تۋ دەڭگەيى 2,38 پايىزعا ارتقان، بيىل ومىرگە كەلگەن سابيلەردىڭ سانى - 1256 بالا. جەرگىلىكتى تۇرعىنداردىڭ ايتۋىنشا، بەينەۋلىكتەردىڭ سانى قازاقستان بويىنشا ەڭ جوعارى بولۋىنىڭ سىرى  حالىقتىڭ ءومىر ءسۇرۋ دەڭگەيىنە بايلانىستى. ايتالىق، اۋىلدا تەمىرجول جانە اۆتوموبيل جول قاتىناستارى، سونداي-اق، بايلانىس جۇيەسى، كوممۋنالدىق قىزمەتتەر - گاز، سۋ، توق جۇمىسى جوعارى دەڭگەيدە.

سوڭعى جاڭالىقتار