8 جەلتوقسان, 09:06 401 0 ايماق انار لەپەسوۆا

قانت قىزىلشاسىن جيناۋدان رەكورد تىركەلدى

جامبىل وبلىسىندا قانت قىزىلشاسىن جيناۋ ناۋقانىنىڭ ناتيجەسىندە 5500 گەكتار القاپتان 173 مىڭ 748 توننا ءتاتتى ءتۇبىر جينالدى. بۇل  وتكەن جىلعى ناتيجەدەن 7168 تونناعا ارتىق كورسەتكىش. بۇل تۋرالى وبلىستىق اۋىل شارۋاشىلىق باسقارماسى حابارلادى. 

وبلىس ديقانشىلارى بيىل زاماناۋي اۋىلشارۋاشىلىعى تەحنيكالارىن پايدالانۋ جانە جوعارى سۇرىپتى تۇقىم سەبۋدىڭ ناتيجەسىندە قانت قىزىلشاسىنىڭ ءار گەكتارىنان الىنعان ورتاشا ءونىم 316 تسەنتنەردى قۇراپ، رەكوردتىق كورسەتكىشكە قول جەتكىزىلگەن. ءبىر عانا تاراز قالاسىنىڭ شارۋالارى نەبارى 20 گەكتار قانت قىزىلشاسىنىڭ ءار گەكتارىنان 634,6 تسەنتنەرگە دەيىن ءونىم العان.

سونداي-اق الىنعان ءونىم كولەمى مەركى اۋدانىندا 367,0, بايزاق اۋدانىندا 315,0, شۋ اۋدانىندا 301, قورداي اۋدانىندا 283,0, جامبىل اۋدانىندا 252,0 جانە تالاس اۋدانىندا 250 تسەنتنەردى قۇراعان. «بۇگىنگى تاڭدا قانت زاۋىتتارىنا 135 564,1 توننا قانت قىزىلشاسى وتكىزىلگەن. سونىمەن قاتار 17 مىڭ توننا قانت ءوندىرۋ جوسپارلانعان. ماسەلەن، اعىمداعى جىلى جامبىل وبلىسىندا 5,6 مىڭ گەكتار القاپقا قانت قىزىلشاسى وتىرعىزىلسا، ونىڭ 105 گەكتارى، ياعني جۋالى اۋدانىندا 60 گەكتار، ت.رىسقۇلوۆ اۋدانىندا 45 گەكتار القاپ جارامسىزدىققا ۇشىراعان بولاتىن»،-دەلىنگەن وبلىستىق اۋىل شارۋاشىلىق باسقارماسىنىڭ حابارلاماسىندا.

قازىرگى تاڭدا وڭىردە قانت ءوندىرىسىن دامىتۋ ءۇشىن جىلدىق قۋاتتىلىعى 148 مىڭ توننانى قۇرايتىن، قۇنى 85 ميلليارد تەڭگە بولاتىن زاماناۋي قانت زاۋىتىنىڭ قۇرىلىسى جۇرگىزىلۋدە. ءىرى جوبانى «Qyzylsha» جشس-مەن جۇزەگە اسىرۋدا.

 

سوڭعى جاڭالىقتار