7 جەلتوقسان, 22:02 324 0 جاڭالىقتار اسىل تۇمار

بالقاش كولىنىڭ ورتاسىندا قالعان بالىقشىلار قۇتقارىلدى

توتەنشە جاعداي دەپارتامەنتىنىڭ قىزمەتكەرلەرى سەڭ كوشۋىنىڭ سالدارىنان بالقاش كولىنىڭ ورتاسىندا قالعان ءتورت بالىقشىنى قۇتقاردى. «قوڭىراۋ 6 جەلتوقسان كۇنى ساعات 14:07-دە تۇسكەن. كۋاگەرلەر اقولەڭ اۋىلىنان وڭتۇستىككە قاراي 15 شاقىرىم قاشىقتىقتا قالقىپ جۇرگەن مۇزدىڭ ۇستىندە ءتورت ادام قالىپ قويعانىن ايتقان. سەڭ جاعادان 10 شاقىرىمعا ۇزاپ كەتىپتى. وقيعا ورنىنا قاراعاندى وبلىسىنىڭ تجد جەدەل ارەكەت توبى اتتاندى»، – دەلىنگەن تجد تاراتقان العاشقى حابارلامادا.

سونداي-اق مۇز ۇستىندەگى ادامدار ۇنەمى بايلانىستا بولعان. ءباسپاسوز قىزمەتىنىڭ سوڭعى مالىمدەمەسىندە تولقىننىڭ كۇشتى بولعانىنا قاراماستان قۇتقارۋشىلار بالىقشىلاردى تەز ارادا تاۋىپ، ساعات 17:35-تە جاعاعا جەتكىزگەنى تۋرالى ايتىلعان.

تجد قىزمەتكەرلەرى مۇزدىڭ ءالى تولىق قاتپاعانىن، وعان شىعۋدىڭ قاۋىپتى ەكەنىن قاتاڭ ەسكەرتەدى. تۇنگى ۋاقىتتا جانە داۋىلدى كۇندەرى كول ماڭىندا بالىق، اڭ اۋلاۋعا تىيىم سالىنعان.

 

سوڭعى جاڭالىقتار