5 جەلتوقسان, 16:43 425 0 مادەنيەت Túrkistan Gazeti

قازاقشاسى جاتىق «مۇزدى ولكە – 2»

جۋىقتا «بولاشاق» قاۋىمداستىعىنىڭ جۇزەگە اسىرۋىمەن Walt Disney Animation Studios ۇسىنعان «مۇزدى ولكە – 2» تولىقمەتراجدى انيماتسيالىق ءفيلمى كورەرمەنگە جول تارتتى. بۇل فيلم – ەكى مارتە «ۇزدىك اۋەن»، سوسىن «ۇزدىك اني­ما­تسيالىق فيلم» ساناتتارى بويىنشا «وسكار» جۇلدەسىن يە­لەن­گەن جانە ەڭ تابىستى كاسسالىق فيلم سانالعان كينوتۋىن­دى. «بولاشاق» قاۋىمداستىعىنىڭ «وزىڭنەن باستا» جوباسىنىڭ باستاماسىمەن اۋدارىلعان كەزەكتى 33-ءشى ءفيلمنىڭ سيۋجەتى ەرەك.

اپالى-ءسىڭىلى ەلزا مەن اننانىڭ باسىنان وتكەن شىم-شىتىرمان حيكايا كىمدى دە بولسا ەلىتىپ، وزىنە باۋراپ الا­دى. تۇتاس الەمدى وزىنە تەلمىرتكەن بۇل ءفيلمنىڭ ءتۇپ يدەياسى تۇركى حالىقتارىنىڭ نانىم-سەنىمىنەن، ميفولوگياسىنان  الىنعانى بەلگىلى. ەندى، مىنە، سول يدەياسى بىزگە تانىس كريسس باك پەن دجەننيفەر ءليدىڭ رەجيسسەرلىگىمەن تۇسىرىلگەن فيلم انا تىلىمىزدە سويلەدى.

دۋبلياج رەجيسسەرى جانە اققالا ولافتىڭ داۋىسىن دىبىستاعان بەلگىلى اكتەر شاحمۇرات ورداباەۆ: «بۇل – وتە قىزىقتى جوبا. كاستينگ باستالعان ساتتەن باستاپ پروكاتقا شىققانعا دەيىن ءاربىر دەتالعا ەرەكشە ءمان بەرىپ، نازار اۋداردىق. ءفيلمنىڭ ءماتىنىن قازاقتىڭ تابيعاتىنا ساي ەركىن اۋدارىپ، ديالوگتار اراسىنا اباي اتامىزدىڭ «سۇر بۇلت ءتۇسى سۋىق قاپتايدى اسپان»، «عاشىقتىڭ ءتىلى – ءتىلسىز ءتىل» دەگەن­دەي سياقتى ولەڭ جولدارىن قوسىپ، كەيىپكەرلەردىڭ بولمىسىن اشۋعا تىرىستىق. بۇكىل الەم بالاسىنىڭ قيالىنا قانات بىتىرگەن فيلم»، – دەيدى.  ەلزانى قازاقشا سويلەتكەن – بەگىم­نۇر قاليلا، اننانىڭ داۋىسىن دىبىستاعان نازەركە سەرىكبولقىزى سياقتى جاس تەاتر جانە كينو اكتريسالارى. كينو جوباعا دانيار وتەگەن، دينارا سۇلتان، يندي ەدىلباەۆا جانە تاعى باس­قا ورىنداۋشىلار قاتىسقان.

جانسايا جاناتقىزى، كورەرمەن:

– كە­رەمەت مۋلتفيلم! وتباسىممەن بارىپ كوردىم. انا  تىلىمىزدە دىبىستالعان تۋىندىدا كەيىپكەرلەر ءسوزى ماعىناسىنا قاراي اۋدارىلعان.  مۋزىكالىق ەففەكتىلەرى ەرەكشە. اكتەرلەردىڭ داۋىسى دا اسەرلى. قىنجىلتاتىن ءجايت، كينوتەاتردا قازاق تىلىندەگى كورسەتىلىم وتە ىڭعايسىز ۋاقىتقا  قويىلعان. كىم دەمالىس كۇندەرى تاڭعى 9-دا كينوتەاتردان تابىلسىن؟ بارلىعى 100 ادامعا ارنالعان كورەرمەن زالىندا ۇزىن-ىرعاسى 10-نان اسا ادام عا­نا وتىردىق.  «مۇزدى ولكەنى» ادام دە­مالىس ورنىنا كوپ باراتىن، كەشكى سەرۋەن ۋاقىتى 18-19 ساعاتتارعا قويسا، قاتىپ-اق كەتەر ەدى! ەستىر قۇلاق بولسا، قازاق ءتىلدى كورەرمەننىڭ نازى ايتىلدى.

ەلدوس ماديەۆ، كورەرمەن: 

– بۇل مۋلتفيلم ماعان ەرەكشە ۇنادى. ءوزىمدى سول كينونىڭ كەيىپكەرى سياقتى سەزىنىپ وتىردىم. بۇنىڭ 1-ءشى ءبولىمىن ەرەكشە ىقىلاسپەن كورگەن بولاتىنمىن. مىنە، 2-ءشى ءبولىمى دە كوڭىلىمنەن شىقتى. قازاق تىلىنە ەركىن اۋدارىلعان. كەيىپكەرلەردىڭ ميميكاسىنا دەيىن قازاقشا سويلەگەنىنە قۋانىپ قالدىم. ءبىزدىڭ انا ءتىلىمىزدىڭ قولدانىس اياسىن وسىنداي الەمدىك جوبالار كوتەرگەنىنە ريزامىز. وسىنداي انيماتسيالىق فيلمدەردى ءوزىمىزدىڭ رەجيسسەرلەر دە تۇسىرسە ەكەن دەگەن تىلەك بار. قاشانعى شەتەلدىڭ تۇسىرگەن دۇنيەسىن قىزىقتاپ، سولارعا يەك ارتا بەرەمىز؟

ايعانىم وتەۋلى، كورەرمەن:

– «بولاشاق» قورى اۋدارعان مۋلتفيلمدەردى سوڭعى جىلدارى وتباسىمىزبەن ۇزبەي كورىپ كەلەمىز. ءار پرەمەرا سايىن شىعارماشىلىق ۇجىمنىڭ تىنىمسىز ىزدەنىسى مەن ەڭبەگىنىڭ ناتيجەسى بايقالادى. ماسەلەن، «ارىستان پاتشاداعى» ورىستار شرام دەپ اتاعان جاعىمسىز كەيىپكەرگە «ىزعار» دەگەن اتتى تاۋىپ قويسا، «مۇزدى ولكە-2» ءمۋلتفيلمىنىڭ ءبىر-ەكى ەپيزودىنا دانىشپان ابايدىڭ ولەڭدەرىنەن ءبىر جول بولسا دا ءۇزىندىنى ورىندى قولدانا بىلگەن. ارينە، بالالارعا ارنالعان تۋىندى بولعاندىقتان مۋلتفيلمدە قايسارلىق پەن مەيىرىمدىلىك، باۋىرمالدىق ايقىن كورسەتىلگەن. اسىرەسە، اننا مەن ەلزانىڭ اراسىنداعى سىيلاستىق اپالى-سىڭىلىلەردىڭ قانداي بولاتىنىن بالالارعا ۇيرەتەدى. مۋلتفيلمدە قيىن جاعدايلار بولماسا، جاعىمسىز كەيىپكەرلەر جوق. ەڭ باستىسى، گولليۆۋدتىڭ قيال-عاجايىپ ەرتەگىگە قۇرىلعان تۋىندىلارىنىڭ قازاقشا سويلەپ قانا قويماي، كينوتەاترلاردا سەانس سانى مەن كورەرمەننىڭ ارتۋى كوڭىل قۋانتادى.

ەلدوس ءنۇسىپۇلى

 

 

سوڭعى جاڭالىقتار