5 جەلتوقسان, 07:39 349 0 رۋحانيات انار لەپەسوۆا

ەلوردادا قازاق بۇلبۇلىنىڭ مەرەيتويى اتالىپ ءوتتى

"استانا وپەرا" ساحناسىندا سوتسياليستىك ەڭبەك ەرى، كسرو حالىق ءارتىسى، كسرو مەملەكەتتىك سىيلىعىنىڭ لاۋرەاتى بيبىگۇل احمەتقىزى تولەگەنوۆانىڭ مەرەيتويى اتالىپ ءوتتى. بۇل تۋرالى قر مادەنيەت جانە سپورت مينيسترلىگىنىڭ ءباسپاسوز قىزمەتى حابارلادى. 

ە.برۋسيلوۆسكيدىڭ "قىز جىبەك" وپەراسىنان جىبەكتىڭ "گاككۋ" انىن توي يەسىنىڭ ءوزى ورىنداپ ساحنا تورىنە كوتەرىلگەندە كورەرمەن قاۋىم قازاق ونەرىنىڭ اڭىز تۇلعاسىنا ۇزاق قول شاپالاقتاپ قۇرمەت كورسەتتى.

كەزىندە  باۋىرجان مومىشۇلى "قازىرگى ونەر شەبەرلەرىنىڭ ىشىندە بيبىگۇلدى بۇلبۇلعا تەڭەپ جۇرسىڭدەر، ول ودان دا ارتىق. سەندەردىڭ بۇلبۇلدارىڭ مەنىڭ بيبىگۇلىمە جەتپەيدى. وعان تابيعات كورىك تە بەرگەن، ەشكىمگە ۇقساتۋعا بولمايتىن دارىندى دا بەرگەن" دەپ  جوعارى باعالاعان "قازاقتىڭ بۇلبۇلى" بيبىگۇل تولەگەنوۆانىڭ شىعارماشىلىق كەشىن اشقان ەلىمىزدىڭ مادەنيەت جانە سپورت ءمينيسترى اقتوتى رايىمقۇلوۆا توي يەسىنە قر پرەزيدەنتى قاسىم-جومارت توقاەۆتىڭ قۇتتىقتاۋ حاتىن وقىپ بەردى. سونىمەن قاتار، ول قر پارلامەنتى سەناتىنىڭ توراعاسى  داريعا نازارباەۆانىڭ دا جۇرەكجاردى لەبىزىن جەتكىزدى.

شىعارماشىلىق كەشتە بيبىگۇل تولەگەنوۆا اتىنداعى بايقاۋدىڭ بيىلعى گران-پري يەگەرى، يتالياندىق ءانشى كوزيمو ورەستە ۇلى ابايدىڭ ولەڭىنە جازىلعان مۇقان تولەباەۆتىڭ "مەن كوردىم ۇزىن قايىڭ قۇلاعانىن" رومانسىن قازاق تىلىندە ناقىشىنا كەلتىرە ورىندادى.

قازاقتىڭ ايگىلى وپەرا ءانشىسى بيبىگۇل تولەگەنوۆانىڭ تورقالى تويىندا شاكىرتتەرى مەن "استانا وپەرانىڭ" سوليستەرى – قازاقستاننىڭ ەڭبەك سىڭىرگەن ءارتىسى جاننات باقتاي، قازاقستاننىڭ ەڭبەك سىڭىرگەن قايراتكەرلەرى دينا حامزينا، مەدەت چوتاباەۆ، مەيىر باينەش، جانات شىبىقباەۆ، ازامات جىلتىرگوزوۆ، گۇلجانات ساپاقوۆا، ەلەنا نيزامۋتدينوۆا، بولات ەسىمحانوۆ، گۇلدانا الدادوسوۆا ت.ب. تاماشا ونەر كورسەتتى. ولار ا.جۇبانوۆ، ل.حاميدي، ە.برۋسيلوۆسكي، س.مۇحامەدجانوۆ، م.تولەباەۆ، دج.ۆەردي، پ.چايكوۆسكي، ج.ماسسنە سىندى قازاق جانە الەمدىك وپەرا جاۋھارلارىنىڭ تۋىندىلارىن، اريالارىن، حالىق اندەرىن، رومانستار مەن وركەسترلىك شىعارمالاردى جوعارى تالعاممەن ورىنداپ، كورەرمەندەرگە رۋھاني قۋانىش سىيلادى، - دەلىنگەن حابارلامادا.

ال، بالەت ونەرىنىڭ مايتالماندارى، قازاقستاننىڭ ەڭبەك سىڭىرگەن قايراتكەرلەرى گاۋحار ۋسينا، انەل رۇستەموۆا، تايىر عاتاۋوۆ، حالىقارالىق بايقاۋلاردىڭ لاۋرەاتتارى ولجاس تارلانوۆ، نازير زاەتوۆ، بوستان قوجابەكوۆ، سۇلتانبەك عۇمار "زامانا تىنىسى", "كورسار", "بايادەركا" جانە ت.ب. حورەوگرافيالىق شىعارمالارى ارقىلى قازاق بي ونەرىنىڭ بيىك دەڭگەيىن تانىتتى.

كەش سوڭىنا قاراي مەرەيتوي يەسى قۇلاقتان كىرىپ، بويدى العان اۋەزدى انگە ەلىتىپ، كوڭىل قۇسى شارتاراپتى كەزگەن تالعامپاز كورەرمەندەرىنە زور ىلتيپاتپەن عابدوللا توقايدىڭ ولەڭىنە جازىلعان تاتاردىڭ حالىق ءانى "تافتيلياۋدى" ورىندادى.

توقساننىڭ تورىنە شىققان ەل اناسى جينالعان قاۋىمعا اق باتاسىن بەردى.

 

سوڭعى جاڭالىقتار