4 جەلتوقسان, 09:53 361 0 جاھان انار لەپەسوۆا

ناتو-عا 70 جىل: ۇيىمعا مۇشە ەلدەردىڭ باسشىلارى لوندونعا جينالدى

ناتو-عا مۇشە 29 ەلدىڭ ليدەرلەرى ۇيىمنىڭ 70 جىلدىعىنا وراي لوندوندا باس قوسىپ جاتىر، دەپ حابارلايدى ورتالىق ازيانىڭ جاڭالىقتار قىزمەتى

مەرەكەلىك سامميتكە فرانتسيا، تۇركيا جانە قۇراما شتاتتار ارقايسىسى قاراما-قايشى كوزقاراستارىمەن كەلدى. اقش پرەزيدەنتى دونالد ترامپ ۇيىمعا مۇشە ەلدەردىڭ قورعانىس شىعىنىن كوتەرۋگە، جالپى شىعىندى تەڭ ەتۋگە شاقىرىپ كەلەدى. سامميت الدىندا فرانتسۋز پرەزيدەنتى ەممانۋەل ماكرون ەۋروپا بۇدان بىلاي قۇراما شتاتتاردىڭ قورعانىنا سەنىم ارتا المايتىنىن ايتىپ، ناتو-نىڭ "ميى ءولىپ بارا جاتىر" دەگەن. وسىعان دەيىن ۇيىم مۇشەسى بولعان تۇركيا رەسەيدىڭ س-400 زەنيت-زىمىراندىق جۇيەلەرىن ساتىپ الىپ جاتقانى ءۇشىن ارىپتەستەرى تارابىنان سىنعا قالعان.

ناتو-نىڭ باس حاتشىسى يەنس ستولتەنبەرگ سوڭعى كەزدەگى قاراما-قايشىلىققا قاراماستان، ناتو تاريحتاعى ەڭ ءساتتى ۇيىم ەكەنىن جەتكىزدى. ول سامميت الدىندا ەۋروپا وداعى مەن كانادا اسكەري شىعىنىن 4,6 پروتسەنتكە كوبەيتەتىنىن ايتقان. بۇل ەلدەر 2016 جىلدان 2020 جىلعا دەيىن قورعانۋعا 130 ميلليارد دوللار بولسە، 2024 جىلعا قاراي بۇل سوما 400 ميلليارد دوللارعا جەتۋى ءتيىس.

ستولتەنبەرگتىڭ ايتۋىنشا، ناتو سوڭعى جىلدارى "باعدارلاما 30" دەپ اتالاتىن جوبانى ىسكە اسىرۋعا نيەتتەنىپ جاتىر. وعان سايكەس، ۇيىم جانجال شىققان ايماققا 30 كۇن ىشىندە قوسىمشا 30 اسكەري كەمە، 30 اۆياتسيالىق ەسكادريليا جانە جاياۋ اسكەرلەردىڭ 30 باتالونىن تولىق اسكەري دايىندىققا جەتكىزۋى كەرەك.

سولتۇستىك اتلانتيكالىق كەلىسىم ۇيىمى 1949 جىلى اقش، كانادا جانە 10 ەۋروپالىق ەل سوۆەتتىك ەكسپانسياعا قارسۋ تۇرۋ ماقساتىندا نەگىزدەلگەن. قازىرگى كەزدە وعان 29 مەملەكەت مۇشە.

سوڭعى جاڭالىقتار