3 جەلتوقسان, 12:11 456 0 ايماق انار لەپەسوۆا

قىزىلورداداعى جول اپاتى: 6 ادام اۋىر حالدە جاتىر

"قىزىلوردا-قۇمكول" تاس جولىنداعى اپاتتان كوز جۇمعانداردىڭ سانى 8 ادامعا جەتتى. توتەنشە جاعداي كەزىندە 22 ادام زارداپ شەككەن، ولاردىڭ التاۋى اۋىر حالدە وبلىستىق اۋرۋحانالارعا جاتقىزىلدى.

بۇل تۋرالى بۇگىن دەنساۋلىق ساقتاۋ ءمينيسترى ەلجان ءبىرتانوۆ مالىمدەدى، دەپ حابارلايدى Sputnik قازاقستان.

ءمينيستردىڭ ايتۋىنشا، "قىزىلوردا-قۇمكول" تاس جولىنداعى اۆتوبۋس اپاتىنان 22 ادام زارداپ شەككەن.

"التى ادام اۋىر حالدە وبلىستىق اۋرۋحانالارعا جاتقىزىلدى، 16-سى اۋىرلىعى ورتاشا جاراقات العان", - دەدى ءبىرتانوۆ ۇكىمەت كۋلۋارىندا.

بۇدان بولەك، جەتى ادام جەڭىل جاراقات العان. پاتسيەنتتەرگە سانيتارلىق اۆياتسيا بريگادالارى ۇسىنىلىپ، بارلىق قاجەتتى كومەك كورسەتىلۋدە.

"پاتسيەنتتەردى رەسپۋبليكالىق ورتالىقتارعا اۋىستىرۋ قاجەت بولىپ قالۋى مۇمكىن. سوندىقتان ءبىز دايىندىق جۇرگىزىپ جاتىرمىز", - دەدى مينيستر.

ەسكە سالا كەتەيىك، بۇگىن تاڭعى بەستەر شاماسىندا "قىزىلوردا-قۇمكول" تاس جولىندا اۆتوبۋس اۋدارىلدى. الدىن الا مالىمەت بويىنشا، جۇرگىزۋشى كوكتايعاقتان رولگە يە بولا الماي، اۋدارىلعان.

سوڭعى دەرەكتەرگە سۇيەنسەك، سالوندا 36 جولاۋشى بولعان. سەگىز ادام كوز جۇمىپ، 22 جاراقات الدى. اۆتوبۋستا تەك قازاقستان ازاماتتارى بولعان، شەتەلدىكتەر جوق.

ءىىم اكىمشىلىك پوليتسيا كوميتەتىنىڭ مالىمەتىنشە، اۆتوبۋس مۇناي كومپانياسىنا تيەسىلى ەكەن. كولىكتەگى جولاۋشىلار قۇمكولگە جۇمىسقا بارا جاتقان.

وقيعا ورنىندا پوليتسيا، توتەنشە جاعداي جانە مەديتسينالىق قىزمەت قىزمەتكەرلەرى جۇمىس ىستەپ جاتىر.

جول اپاتىنا قاتىستى قىلمىستىق كودەكستىڭ 345-بابى 4-تارماعى "كولىك باسقارعان ادامداردىڭ جول قوزعالىسى نەمەسە كولىكتى پايدالانۋ ەرەجەلەرىن بۇزۋى" بويىنشا سوتقا دەيىنگى تەرگەۋ باستالدى.

اۆتوبۋس جۇرگىزۋشىسى بەس جىلدان ون جىلعا دەيىن باس بوستاندىعىنان ايىرىلۋى مۇمكىن. سونداي-اق، بەلگىلى ءبىر لاۋازىم اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان جەتى جىلعا دەيىن ايىرىلۋى ىقتيمال.

توتەنشە جاعدايعا بايلانىستى قىزىلوردا وبلىسى تجد بازاسىندا جەدەل شتاب قۇرىلدى. قاۋىرت جەلى تەلەفونى جۇمىس ىستەپ تۇر: 8 (7242) 24-41-61, 70-03-28.

 

سوڭعى جاڭالىقتار