2 جەلتوقسان, 19:06 393 0 سپورت انار لەپەسوۆا

ءتورتىنشى "الەم بارىسى" انىقتالدى

 الماتى قالاسىنداعى «بالۋان شولاق» سپورت سارايىندا قر تۇڭعىش پرەزيدەنتى كۇنىنە وراي ۇيىمداستىرىلعان قازاق كۇرەسىنەن "الەم بارىسى" حالىقارالىق سايىسى ءوز مارەسىنە جەتتى. 

چەمپيونات قازاقستاننىڭ تاريحي جانە مادەني مۇراسىن دامىتۋ، شەت ەلدەردە  قازاق كۇرەسىن دامىتۋ بارىسىنداعى ىنتىماقتاستىق پەن ءوزارا بايلانىسىن نىعايتۋ، قازاق كۇرەسىن حالىقارالىق دەڭگەيدە ودان ءارى جەتىلدىرۋ، ناسيحاتتاۋ جانە بەدەلىن كوتەرۋ، قازاق كۇرەسىنەن "الەم بارىسىن" انىقتاۋ ماقساتىن جۇزەگە اسىردى.

چەمپيوناتتى الماتى قالاسى اكىمدىگىنىڭ قولداۋىمەن، قر مادەنيەت جانە سپورت مينيسترلىگىنىڭ سپورت جانە دەنە شىنىقتىرۋ ىستەرى كوميتەتى،  قر قازاق كۇرەسى فەدەراتسياسى جانە "Qazaqstan Barysy" قازاق كۇرەسىن دامىتۋ جانە قولداۋ قورى ۇيىمداستىردى. سونىمەن قاتار، "قازاقتەلەكوم" اق، "ORDA-INVEST" كورپوراتسياسى جانە ء"ساتتى جۇلدىز" اق دەمەۋشىلىك جاسادى.

الەمدىك دودانىڭ اشىلۋ سالتاناتىندا قر اقپارات جانە قوعامدىق دامۋ ءمينيسترى، قر قازاق كۇرەسى فەدەراتسياسىنىڭ پرەزيدەنتى د.اباەۆ ءسوز سويلەپ، بالۋاندارعا ساتتىلىك تىلەدى.

ءتورتىنشى رەت وتكەن باسەكەگە 30 ەلدەن 33 بالۋان قاتىستى. "الەم بارىسى" اتانۋعا اقش، اۆستراليا، ازەربايدجان، برازيليا، گرەتسيا، گرۋزيا، ءۇندىستان، يران، يسپانيا، يتاليا، كامەرۋن، كونگو، كورەيا، كۋبا، قىرعىزستان، ليتۆا، موڭعوليا، نيدەرلاندى، پاكىستان، پولشا، رەسەي، سلوۆەنيا،تاجىكستان، تۇركىمەنستان، تۇركيا، وزبەكستان، ۋكراينا، ەستونيا، ياپونيا   سەكىلدى ەلدەردىڭ جانە قازاقستاننىڭ اتاقتى بالۋاندارى قاتىستى.

بۇل سىندا ەلىمىزدىڭ نامىسىن ا.نۇعىماروۆ (شقو), ر.ابدىرازاقوۆ (الماتى قالاسى), م.يساعابىلوۆ (قىزىلوردا وبلىسى), ن.جارىلعاپوۆ (ماڭعىستاۋ وبلىسى) سىندى بالۋاندار قورعادى.

بوز كىلەمنىڭ ۇستىندەگى بەلدەسۋلەر وتە تارتىستى ءوتتى. ناتيجەسىندە:

1 ورىن بوبيكوۆ رومان (رەسەي) - 10 ملن تەڭگە جانە التىن بەلبەۋ;

2 ورىن نۇعىماروۆ ايبەك (قازاقستان) 6 ملن تەڭگە جانە كۇمىس بەلبەۋ;

3 ورىن يساعابىلوۆ ماقسات (قازاقستان) 3 ملن تەڭگە جانە قولا بەلبەۋ;

"جەڭىسكە دەگەن جىگەرى ءۇشىن" نوميناتسياسى حيسومۋددينوۆ مۋحسين (وزبەكستان) -1 ملن تەڭگە.

ايتا كەتەيىك،  چەمپيوناتتىڭ رەسمي اقپاراتتىق رەسۋرسى www.qazaqstanbarysy.kz سايتى، قوسىمشا اقپاراتتار "قازاقستان بارىسى" قازاق كۇرەسىن دامىتۋ قورىنىڭ الەۋمەتتىك جەلىلەردەگى رەسمي وكىلدىكتەرىنەن تاراتىلادى.

 

 

سوڭعى جاڭالىقتار