2 جەلتوقسان, 17:43 425 0 رۋحانيات انار لەپەسوۆا

ارحەولوگتار كونە سارايشىق ورنىنان تابىلعان جادىگەرلەر جايلى ايتىپ بەردى

اتىراۋ وبلىسىنىڭ اكىمى نۇرلان نوعاەۆ ماحامبەت اۋدانىنا ساپارى كەزىندە “سارايشىق” مەملەكەتتىك تاريحي-مادەني مۋزەي-قورىعىنىڭ بولاشاقتا سالىناتىن ساپار ورتالىعىنىڭ قۇرىلىس الاڭىمەن تانىستى،  دەپ حابارلايدى اتىراۋ وبلىسىنىڭ وڭىرلىك كوممۋنيكاتسيالار قىزمەتى.

ساپار ورتالىعىنىڭ قۇرىلىسى سىرتقى جانە ىشكى تۋريزم كولەمىنىڭ كوبەيۋىنە، ادامداردىڭ قاسيەتتى سارايشىق قالاشىعىنا ەرەكشە نازار اۋدارۋىنا سەپتەسەدى دەپ كۇتىلۋدە. بۇل نىسان تۋريستەر مەن كەلۋشىلەرگە تولىققاندى جاعداي جاساۋعا مۇمكىندىك بەرەتىن تۇتاس كەشەن بولماق.

“سارايشىق” تاريحي-مادەني  مۋزەيىنىڭ ديرەكتورى ابىلسەيت مۇحتاردىڭ ايتۋىنشا، ارحەولوگتار ءحىح عاسىردىڭ ورتا شەنىندە جاسالعان كارتا بويىنشا، قالاشىقتىڭ باعزى قامالىن تابۋ ماقساتىندا بيىل دا كونە شاھاردىڭ ورنىندا قازبا جۇمىستارىن جۇرگىزگەن.

وسى قازبا جۇمىستارى كەزىندە ديىرمەن تاسى، وزبەك حان بيلىك قۇرعان ۋاقىتتا جاسالعان مىس تيىندار تابىلعان. سوڭعى جادىگەرلەر 1330-1350 جىلدارى سارايشىقتا سوعىلعان دەۋگە تولىق نەگىز بار دەيدى تاريحشىلار. ارحەولوگتار كونە قىش بۇيىمداردى دا “ولجالاعان”. مۇنداي سيپاتتاعى كەراميكالار ءحىى عاسىردا جاسالعان ەكەن. سونداي-اق، جاسالعانىنا ەكى مىڭ جىلداي بولعان اينا سىنىعى مەن تاس كەلساپتار جانە ءارتۇرلى كەزەڭدەگى جەبە ۇشتارى تابىلعان.

ال، ارحەولوگتاردىڭ كەزەكتى “ولجاسى” – جىلقى بەينەسىندە جاسالعان جەز كىلت –  الەمنىڭ كەز كەلگەن الدىڭعى قاتارلى مۋزەيلەرىنىڭ ەكسپوزيتسياسىنان ويىپ تۇرىپ ورىن الاتىنداي جادىگەر. ايتپاقشى، مۋزەي قىزمەتكەرلەرى، ايماق باسشىسىنا  قازبا جۇمىستارىنا قاتىسقان عالىمداردىڭ ءبىرى –  استراحان قالاسىنىڭ تاريحي-ساۋلەت مۋزەي-قورىعىنىڭ ارحەولوگيا سەكتورىنىڭ مەڭگەرۋشىسى ۆياچەسلوۆا پلاحوۆتىڭ وسى تەكتەس كىلتتىڭ ەرميتاج جادىگەرلەرىنىڭ اراسىندا دا بار ەكەندىگىن مالىمدەگەنىن جەتكىزدى.

وبلىس اكىمى تاريحىمىزدى ساقتاۋعا باعىتتالعان مۇنداي جۇمىستاردىڭ ماڭىزدىلىعىنا توقتالىپ، اتالعان ىستە جەرگىلىكتى اتقارۋشى ورگاندار جان-جاقتى قولداۋ بىلدىرەتىنىن اتاپ ءوتتى.

وتكەن جىلى كونە سارايشىق قالاشىعى ماڭىندا قورعاۋ-جاعالاۋ بوگەتىن سالۋ جۇمىستارى اياقتالعانىن ەستەرىڭىزگە سالا كەتەيىك. بۇل تاريحي ورىننىڭ جايىق وزەنى سۋلارىمەن شايىلۋىنا جول بەرمەدى. ەكى جىل ىشىندە قۇرىلىسشىلار بيىكتىگى 3,6 مەتر بولاتىن ءبىر جارىم كيلومەتر قورعاۋ-جاعالاۋ بوگەتىن تۇرعىزدى.

سوڭعى جاڭالىقتار