2 جەلتوقسان, 14:25 339 0 ايماق انار لەپەسوۆا

الماتى اكىمى قالاداعى مۇز ايدىندارىنىڭ دايىندىق بارىسىن تەكسەردى

باقىتجان ساعىنتاەۆ الماتىداعى مۇز ايدىندارىنىڭ دايىندىق بارىسىن تەكسەردى. بۇل تۋرالى قالا اكىمدىگىنىڭ ءباسپاسوز قىزمەتى حابارلادى.

بيىل قىستا قالادا ءتورت تەگىن، ياعني «الەۋمەتتىك» مۇز ايدىندارى اشىلادى. اتاپ ايتقاندا، 28 پانفيلوۆشىلار ساياباعىندا، تۇڭعىش پرەزيدەنت باعىندا، سونداي-اق ناۋرىزباي مەن تۇركسىب اۋداندارىندا، «MART» ويىن-ساۋىق ورتالىعىندا ىسكە قوسىلادى.

قالا اكىمى باقىتجان ساعىنتاەۆ دايىندىق جۇمىستارىنىڭ بارىسىن تەكسەرىپ، مۇزدىڭ ساپاسى مەن ىلەسپە سەرۆيس ينفراقۇرىلىمىن دۇرىستاۋ جونىندە بىرقاتار ەسكەرتۋ جاسادى. «مۇزدىڭ ساپاسىن رەتكە كەلتىرىپ، كونكيدى جالعا بەرۋ مەن تاماقتاناتىن ورىنداردى دۇرىس جولعا قويىپ، دەمالۋ ورىندارى مەن سانيتارلىق ايماقتاردى ويلاستىرۋ كەرەك. مۇز ايدىنى كەز-كەلگەن جاستاعى كەلۋشىلەر ءۇشىن قاۋىپسىز جانە ىڭعايلى بولۋى ءتيىس»، — دەپ مەردىگەر كومپانيا وكىلىنە ايتقان قالا اكىمى ب. ساعىنتاەۆ «الەۋمەتتىك» دەگەنىمىزدىڭ ساپاسىزدىق ەمەس ەكەنىن تىلگە تيەك ەتتى.

مۇز ايدىنىنىڭ جالپى اۋدانى 12 مىڭ شارشى مەتر. اۋا رايى جىلى بولعاندىقتان مۇز قاتپايدى. ايدىندار ارنايى جۇيەمەن سالقىنداتىلادى. 28 پانفيلوۆشىلار ساياباعى مەن تۇڭعىش پرەزيدەنت باعىنداعى مۇز ايدىنى مۇز الاڭدارى تۇرىندە جاسالعان. ساپار قورىتىندىسى بويىنشا قالا اكىمى ب. ساعىنتاەۆ جەتەكشىلىك ەتەتىن قالا اكىمىنىڭ ورىنباسارلارىنا، اۋدان اكىمدەرى مەن ءتيىستى باسقارمالارعا قالالىق مۇز ايدىندارىنىڭ تەحنيكالىق دايىندىق بارىسىن باقىلاۋدى كۇشەيتۋدى تاپسىردى.

 

سوڭعى جاڭالىقتار