22 قاراشا, 17:07 467 0 دەنساۋلىق Túrkistan Gazeti

مەديتسينالىق ساقتاندىرۋ نە ءۇشىن قاجەت؟

مىندەتتى الەۋمەتتىك مەديتسينالىق ساقتاندىرۋ جۇيەسى ەنگىزىلەتىنى تۋرالى كوپتەن ايتىلىپ جۇرسە دە، ونىڭ قاجەتتىلىگىن كوپشىلىك تۇسىنبەي كەلەدى. مەديتسينالىق ساقتاندىرۋ – حالىقتى الەۋمەتتىك قورعاۋ ۇلگىسى. ونىڭ قازىرگى مەديتسينالىق قىزمەت جۇيەسىنەن باستى ارتىقشىلىعى سول – جارنانى اركىم مۇمكىندىگىنە قاراي تولەپ، قاجەتىنە قاراي مەديتسينالىق قىزمەت الاتىندىعىندا. ياعني، تۇرعىن سىرقاتىنان ايىققانشا مەديتسينالىق ۇيىمنان اقىسىز ەم الۋعا قۇقىلى بولادى.

ساقتاندىرۋ مەديتسيناسى ازاماتتىڭ تاپقان تابىسىنا، ول ءۇشىن اۋدارىلعان جارنا كولەمىنە قاراماستان دارىگەردىڭ كەز كەلگەن كومەگىنە جۇگىنە الادى. ونىڭ ىشىندە جوسپارلى ستاتسيونارلىق كومەك تە، ءدارى-دارمەكپەن قامتۋ دا، جوعارى مامانداندىرىلعان مەديتسينالىق قىزمەت تۇرلەرى مەن وڭالتۋ دا، دياگنوستيكالىق-كونسۋلتاتسيالىق جاردەم دە، مەدبيكە كۇتىمى مەن پاللياتيۆتىك كومەك تە بار.

قازىر الەمدە دەنساۋلىق ساقتاۋ سالاسى بيۋدجەتتىك، جەكە جانە الەۋمەتتىك ساقتاندىرۋ، سونداي-اق ارالاس جۇيە بويىنشا قارجىلاندىرىلادى. بيۋدجەتتىك ۇلگى – ۇلىبريتانيا، يسپانيا، يتاليا، شۆەتسيا سياقتى ەلدەردە قولدانىلادى. الەۋمەتتىك ساقتاندىرۋ – گەرمانيا، فرانتسيا، بەلگيا، كورەيا، جاپونيا، سلوۆاكيا جانە شىعىس ەۋروپانىڭ بىرقاتار مەملەكەتتەرىندە، جالپى، 30-عا تارتا ەلدە بار. ال اقش-تا  جەكە ساقتاندىرۋ جۇيەسى ەنگىزىلگەن. دەسە دە، كوپتەگەن ەلدەر بيۋدجەتتىك جانە ساقتاندىرۋ ۇلگىلەرىن ارالاس تۇردە قولدانادى. ءبىزدىڭ ەل دە تيىمدىلىگى دالەلدەنگەن وسى ۇزدىك تاجىريبەنى ەسكەرە وتىرىپ، مەديتسينالىق ساقتاندىرۋدىڭ ارالاس مودەلىن ەنگىزەتىن بولادى. وسىنىڭ ارقاسىندا دەنساۋلىق ساقتاۋ سالاسىندا قارجىلىق تۇراقتىلىق ورنايدى، مەديتسينالىق قىزمەتتەردىڭ ساپاسى وسەدى ءارى قولجەتىمدى بولا تۇسەدى.

 

ايجان جۇمابەكقىزى، تەراپەۆت-دارىگەر

نۇر-سۇلتان قالاسى

 

سوڭعى جاڭالىقتار