22 قاراشا 2019, 14:39 725 0 سىرتقى ساياسات انار لەپەسوۆا

قاسىم-جومارت توقاەۆ شۆەيتساريا پرەزيدەنتىمەن شاعىن قۇرامدا كەلىسسوز جۇرگىزدى

مەملەكەت باسشىسى قاسىم-جومارت توقاەۆ شۆەيتساريا پرەزيدەنتى ۋلي ماۋرەرمەن شاعىن قۇرامدا كەلىسسوز جۇرگىزدى، دەپ حابارلايدى اقوردا

قاسىم-جومارت توقاەۆ شۆەيتساريانى قازاقستاننىڭ ەۋروپاداعى ەڭ ماڭىزدى ارىپتەستەرىنىڭ ءبىرى سانايتىنىن ايتتى.

«مەملەكەتتەرىمىز اراسىندا بارلىق سالا بويىنشا، اسىرەسە ەكونوميكا باعىتىندا تاتۋ ىنتىماقتاستىق ورناعان. شۆەيتساريا قازاقستان ەكونوميكاسىنداعى ماڭىزدى ينۆەستورلاردىڭ جانە نەگىزگى ساۋدا سەرىكتەستەرىنىڭ ءبىرى»، – دەدى قازاقستان پرەزيدەنتى.

مەملەكەت باسشىسى شۆەيتساريا پرەزيدەنتىمەن بىرگە بيزنەس-دەلەگاتسيا وكىلدىگىنىڭ دە كەلۋى وسى ساپاردىڭ ماڭىزىن ارتتىرا تۇسەتىنىن اتاپ ايتتى. ۋلي ماۋرەر قاسىم-جومارت توقاەۆقا قوناقجايلىق كورسەتكەنى ءۇشىن ريزاشىلىق ءبىلدىرىپ، قازاقستاندى ءوز ەلىنىڭ اسا ماڭىزدى سەرىكتەسى رەتىندە قاراستىراتىنىن جەتكىزدى.

«ءبىز ساياسي قولداۋ كورسەتكەندەرىڭىز ءۇشىن شىن جۇرەكتەن ريزاشىلىق بىلدىرەمىز. ءبىزدىڭ ماقسات-مۇراتتارىمىز ورتاق. ال ەكونوميكالىق بايلانىستارىمىزعا كەلەر بولساق، سوڭعى جىلدارى بۇل سالانىڭ دامۋ قارقىنى ارتىپ كەلەدى. ءبىزدىڭ ءوزارا ساپار الماسۋىمىز قارىم-قاتىناستارىمىزدى ودان ءارى نىعايتۋعا سەپتىگىن تيگىزەدى دەپ ويلايمىن»، – دەدى شۆەيتساريا پرەزيدەنتى.

 

سوڭعى جاڭالىقتار