22 قاراشا, 14:25 443 0 الەۋمەت انار لەپەسوۆا

قاقاعان ايازدا مۇگەدەك جولاۋشىنى اۆتوبۋستان ءتۇسىرىپ تاستاعان جۇرگىزۋشى جازالانادى

اقمولا وبلىسى اۋماعىنداعى «لەسنايا پوليانا» ايالداماسىندا قوعامدىق كولىك جۇرگىزۋشىسى 17 جاستاعى مۇگەدەك ستۋدەنتتى ايازدى كۇنى اۆتوبۋستان ءتۇسىرىپ تاستاعان، دەپ حابارلايدى قازاقپارات.

«كەشە تاڭەرتەڭگى ساعات 7.30-دا ەكىنشى توپتىڭ مۇگەدەگى – 17 جاستاعى جيەنىمدى «لەسنايا پوليانا» ايالداماسىندا №303 اۆتوبۋس جۇرگىزۋشىسى «جول ءجۇرۋ بيلەتىڭ جارامسىز» دەپ جولدان ءتۇسىرىپ جىبەرگەن. كوشەدەگى 25 گرادۋستىق ايازدا جيەنىم كوللەدجدەگى ساباعىنا كەشىگىپ قالعان. قالتاسىندا نەبارى 105 تەڭگە بولاتىن. بۇل جەردە قانداي پروبلەما بار؟ پارك باسشىلىعى جىل سايىن زەينەتكەرلەر مەن مۇگەدەكتەرگە مەملەكەت بەلگىلەگەن جەڭىلدىكتەردىڭ كۇشىن جويادى. قوسشا اۋىلى قالا اۋماعىنان 500 مەتر عانا قاشىقتىقتا ورنالاسقان. مۇنداي ايازدا ادامدى قالاي ءتۇسىرىپ كەتۋگە بولادى؟ نەلىكتەن قوسشى تۇرعىندارى ءۇشىن مۇنداي ەرەجەلەر ەنگىزىلگەن؟ نەگە قالاداعى زەينەتكەرلەر جول ءجۇرۋ بيلەتتەرىمەن ءجۇرىپ كەلە جاتىپ، جول ورتاسىندا زەينەتكەر ساناتىنان شىعىپ قالادى. ءبارى قالادا جۇمىس ىستەيدى، قالادا اقشا قالادى، سالىقتار تولەنەدى», - دەپ جازدى ءجاميلا ەلەۋسىزوۆا اتتى تۇرعىن facebook پاراقشادا.

بۇل ماسەلەگە قاتىستى «استانا LRT» جشس باسقارما توراعاسى بەكمىرزا يگەنبەردينوۆ الەۋمەتتىك جەلىدە جاۋاپ بەردى.

«قالا ماڭىنداعى باعداردا كورۋ قابىلەتى تومەن، كامەلەتكە تولماعان كوللەدج ستۋدەنتىن تاستاپ كەتكەن وقيعانى تۇسىندىرگىم كەلەدى. كەلىسەمىن، جۇرگىزۋشى كامەلەتكە تولماعان جولاۋشىنى تاستاپ كەتىپ، دۇرىس ىستەمەدى. سەبەبى، «ايازدى كۇندەرى جولاۋشىلاردى تاستاماڭىزدار» دەگەن ناقتى نۇسقاۋ بولعان. ءمان-جاي انىقتالۋ ۇستىندە. الايدا ىشكى تەرگەۋ جۇرگىزۋ ءۇشىن بىزگە اۆتوبۋس پەن جۇرگىزۋشى تۋرالى ناقتى اقپارات قاجەت. جولاۋشىنى تاستاپ كەتكەن جۇرگىزۋشىنى انىقتاپ، وعان قاتىستى ءتيىستى شارالار قولدانۋ كەرەك»، - دەيدى بەكمىرزا يگەنبەردينوۆ.

كومپانيا باسشىسى اۆتوبۋس جۇرگىزۋشى جولاۋشىنىڭ جاسىن جانە كورۋ قابىلەتىنىڭ ناشار ەكەنىن بايقاماعان بولۋى كەرەك دەپ تۇسپالدايدى. ارىزدانۋشىنىڭ ايتۋىنشا، ونىڭ جيەنىنىڭ ءبىر كوزى مۇلدەم كورمەيدى.

«مۇمكىن جۇرگىزۋشى ونى اقشاسى جەتپەي قالعان جولاۋشى دەپ قانا ويلاعان شىعار. سونىمەن بىرگە، مەن جەڭىلدەتىلگەن ساناتتاعى ازاماتتار ءۇشىن قوعامدىق كولىكتەردە ءجۇرۋ اقىسىنان بوساتۋ تۇرىندەگى الەۋمەتتىك قولداۋ كورسەتۋ ءتارتىبىن تۇسىندىرگىم كەلەدى. بىرىنشىدەن، جەڭىلدەتىلگەن «ايماق» كولىك كارتالارىن پايدالانۋشىلار 2019 جىلدىڭ 31 جەلتوقسانىنا دەيىن قالا ماڭىنداعى باعدارلاردا تەگىن جول ءجۇرۋ مۇمكىندىگىنە يە. ياعني، ازاماتتاردىڭ جەڭىلدىككە يە ساناتىنا جاتاتىن تسەلينوگراد جانە ارشالى اۋداندارىنىڭ تۇرعىندارى قالا ماڭىنداعى مارشرۋتتاردا تەگىن جۇرۋگە قۇقىلى. نۇر-سۇلتان قالاسى ءماسليحاتىنىڭ 2017 جىلعى 20 شىلدەدەگى № 167/21-VI شەشىمىمەن ەلوردانىڭ جەكەلەگەن ساناتتارىنا جاتاتىن قالا جولاۋشىلارىنا جول ءجۇرۋ اقىسىن تولەۋدەن بوساتۋ تۇرىندەگى الەۋمەتتىك كومەك كورسەتىلەدى. وسى قۇجاتتاعى ەرەجەلەر قالا ماڭىنداعى مارشرۋتتارعا قولدانىلمايدى. جوعارىدا ايتىلعانداردى قورىتىندىلاي كەلە نۇر-سۇلتاندا تىركەلگەن جەڭىلدەتىلگەن كولىك كارتالارىن پايدالانۋشىلار تەك قالالىق جانە ەكسپرەسس مارشرۋتتار بويىنشا تەگىن قاتىناۋعا، «ايماق» جەڭىلدىك كارتالارىن پايدالانۋشىلار - تەك قالا ماڭىنداعى مارشرۋتتاردا عانا جۇرۋگە قۇقىلى ەكەنىن حابارلايمىن»، - دەيدى ول.

سوڭعى جاڭالىقتار