22 قاراشا, 10:14 487 0 نۇر وتان اسەل انۋاربەك

ءلاززات يبراگيموۆا: ءبىز ءاربىر وتباسىنىڭ باسپاناسى بولسا دەيمىز

ەلباسى نۇرسۇلتان نازارباەۆتىڭ توراعالىعىمەن وتكەن Nur Otan پارتياسى ساياسي كەڭەسىنىڭ كەڭەيتىلگەن وتىرىسىندا اسا ماڭىزدى الەۋمەتتىك ماسەلەلەر كوتەرىلگەنى بەلگىلى. اسىرەسە، پارتيا توراعاسى حالىقتى باسپانامەن قامتۋ ىسىنە ايرىقشا نازار اۋداردى. وسى رەتتە Nur Otan پارتياسى ساياسي كەڭەسىنىڭ مۇشەسى، «تۇرعىن ءۇي قۇرىلىس جيناق بانكى» اق باسقارما ءتورايىمى ءلاززات يبراگيموۆامەن از-كەم سۇحباتتاسقان ەدىك.

– تۇرعىن ءۇي قۇرىلىس جيناق بانكى ارقىلى از قامتىلعان وتباسىلارعا جەڭىلدەتىلگەن نەسيەلەۋ جۇيەسى ىسكە قوسىلدى. وسى جايىندا تولىعىراق بايانداپ بەرىڭىزشى...

– ەلباسى نۇرسۇلتان نازارباەۆ Nur Otan پارتياسىنىڭ ساياسي كەڭەسى وتىرىسىندا كوپبالالى وتباسىلاردى قولجەتىمدى باسپانامەن قامتاماسىز ەتۋدى جانە تۇرعىن ءۇي قۇرىلىس جيناق جۇيەسى ارقىلى نەسيەلەندىرۋدىڭ جەڭىلدەتىلگەن مەحانيزمىن جاساپ شىعارۋ قاجەتتىگىن اتاپ وتكەن بولاتىن. تۇرعىن ءۇي قۇرىلىس جيناق بانكى اتالعان تاپسىرمانى جۇزەگە اسىرۋ ماقساتىندا وسى جىلدىڭ شىلدە ايىنان باستاپ تابىسى تومەن وتباسىلار ءۇشىن «باقىتتى وتباسى» باعدارلاماسىن ىسكە قوستى.

باعدارلاماعا كوپبالالى، كامەلەت جاسىنا تولماعان بالالارى بار تولىق ەمەس وتباسىلار مەن مۇمكىندىگى شەكتەۋلى بالالاردى تاربيەلەپ وتىرعان وتباسىلار قاتىسا الادى. ولار 10 پايىز كولەمىندە باستاپقى جارنانى جيناعان جاعدايدا نەسيەنى جىلدىق 2 پايىزدىق مولشەرلەمەمەن الا الادى.

«باقىتتى وتباسى» باعدارلاماسىنىڭ كومەگىمەن جاڭا جانە قولدانىستاعى ۇيدەن پاتەر نەمەسە جەر ءۇي ساتىپ الۋعا بولادى. ەڭ جوعارى زايم مولشەرى نۇر-سۇلتان، الماتى، اتىراۋ، اقتاۋ، شىمكەنت قالالارىندا 15 ملن تەڭگەگە دەيىنگى سومانى قۇراسا، ال قالعان وڭىرلەردە 10 ملن تەڭگەگە دەيىن. تۇرعىن ءۇيدى سالىمشى ءوزى اكىمدىكتە كەزەكتە تۇراتىن ايماقتا عانا ساتىپ الا الادى.

باعدارلامانىڭ باستى تالابى – وعان قاتىسۋشىلار تۇرعىن ءۇي قۇرىلىس جيناق بانكىنە بارىپ نەسيە ءوتىنىمىن بەرگەنگە دەيىن جەرگىلىكتى اكىمدىكتە كەزەكتە تۇرۋى قاجەت. سودان كەيىن ول جەردەن باسپاناعا مۇقتاج ەكەنىن راستايتىن جولدامانى الىپ، بانككە وتكىزۋلەرى كەرەك.

وسىدان سوڭ بانكتە ولاردىڭ كىرىس دەڭگەيىن تەكسەرەدى. 2 پايىزدىق مولشەرلەمە بويىنشا جەڭىلدەتىلگەن نەسيە جالاقىسى وتە تومەن بولعاندىقتان، ءوز باسپاناسىن ساتىپ الۋعا مۇمكىندىگى جوق وتباسىلارعا بەرىلەدى. باعدارلاما شارتتارىنا سايكەس، سوڭعى التى اي ىشىندەگى وتباسىنىڭ ءار مۇشەسىنە كەلەتىن تابىستىڭ ءبىر ايلىق كولەمى 42 500 تەڭگەدەن اسپاۋى كەرەك (بۇل – قازاقستاندا رەسمي تۇردە بەكىتىلگەن ەڭ تومەنگى جالاقى مولشەرى).

بۇگىنگى تاڭدا «باقىتتى وتباسى» باعدارلاماسى بويىنشا 3 382 وتباسى ءوز باسپانالارىنا قول جەتكىزىپ، قونىس تويىن اتاپ ءوتتى. تاعى 1 083 وتباسى نەسيەسى ماقۇلداندى. ولار قازىر  بولاشاق باسپانالارىن ىزدەستىرۋ ۇستىندە. بۇل ءۇشىن ولارعا 3 اي ۋاقىت بەرىلەدى.

بانك قازىرگى ساتتە 47,4 ملرد تەڭگە سوماسىنا 4 705 ءوتىنىمدى قابىلدادى. وسى جىلدىڭ سوڭىنا دەيىن 50 ملرد تەڭگە سوماسىنا 5 مىڭ زايمدى بەرۋ جوسپارلانۋدا. بيىل باعدارلاماعا قاتىسا الماعان وتباسىلار كەلەسى جىلى ءوتىنىم بەرە الادى. مەملەكەت باسشىسى قاسىم-جومارت توقاەۆتىڭ تاپسىرماسى بويىنشا «باقىتتى وتباسى» باعدارلاماسى 2020 جىلدان باستاپ 10 مىڭ وتباسىنى قامتيتىن بولادى.

– ەلباسى «باسپانا ماسەلەسى پارتيا نازارىندا بولۋى ءتيىس» دەدى. وسى رەتتە جاستاردىڭ باسپانالى بولۋ جاعدايى قالاي رەتتەلۋدە؟

– تۇرعىن ءۇي قۇرىلىس جيناق بانكىندە جاستارعا ارنالعان ارنايى باعدارلاما جوق. الايدا بانك جۇزەگە اسىراتىن تۇرعىن ءۇي قۇرىلىس جيناق  جۇيەسى جاستار ءۇشىن باسپاناعا قول جەتكىزۋدىڭ ەڭ ءتيىمدى جولى بولىپ سانالادى. ول ءتۇرلى دەڭگەيدەگى تابىسى بار قازاقستاندىقتارعا ءوز ءۇيىن نەمەسە پاتەرىن ساتىپ الۋعا مۇمكىندىك بەرەدى. ول ءۇشىن ەڭ الدىمەن دەپوزيت اشىپ، باستاپقى جارناعا قاجەتتى قاراجاتتى جيناي باستاعان ءجون. ءسويتىپ، ءۇيدىڭ 50 پايىزىن جيناعاننان كەيىن، قالعان 50 پايىزىن بانكتە جىلدىق 3,5 پايىزدان 5 پايىزعا دەيىنگى ەڭ تومەنگى مولشەرلەمەمەن نەسيەگە الۋعا بولادى.

قازىرگى ساتتە 18-29 جاس ارالىعىنداعى 400 مىڭ قازاقستاندىق ازامات تۇرعىن ءۇي قۇرىلىس جيناق بانكىندە شوت اشقان. بۇل – بانكتەگى دەپوزيتتەردىڭ جالپى ۇلەسىنىڭ 29 پايىزى. ولاردىڭ بارلىعى بولاشاقتا باسپانالى بولۋ ءۇشىن قاراجات جيناقتاۋ ۇستىندە.

ال بانكتەن ءتيىمدى شارتتارمەن نەسيە العان 23-29 جاس ارالىعىنداعى سالىمشىلاردىڭ سانى – 17 344 ادام. ولار زايمدى «نۇرلى جەر»، «نۇرلى جول» مەملەكەتتىك باعدارلامالارى اياسىندا العان.  سونداي-اق ءبىزدىڭ بانك «الماتى جاستارى» سەكىلدى باعدارلامالارعا دا ۇلەس قوسىپ، جاستاردى نەسيەلەندىرۋگە قاتىستى. «الماتى جاستارى» باعدارلاماسى بويىنشا 2017 جىلى 108 وتباسى، ال 2018 جىلى 200 وتباسى جاڭا قونىس يەسى اتاندى. تۇرعىن ءۇي قۇرىلىس جيناق بانكى مەن الماتى قالاسى اكىمدىگىنىڭ كومەگىمەن ولار جەڭىلدەتىلگەن نەسيەنى باستاپقى جارناسىز جىلدىق 5 پايىزدىق مولشەرلەمەمەن الدى.

– وسى ۋاقىتقا دەيىن تۇرعىن ءۇي قۇرىلىس جيناق بانكى ارقىلى قانشا قازاقستاندىق ازامات باسپانالى بولدى؟ الداعى ۋاقىتتا قانداي دا ءبىر جاڭا جوبالار جۇزەگە اسىرىلا ما؟

– جالپى، تۇرعىن ءۇي قۇرىلىس جيناق جۇيەسىنىڭ ارقاسىندا بۇگىندە 214  مىڭ وتباسى باسپانا يەسى اتاندى. قازىر ءوزىنىڭ بولاشاق پاتەرىنە نەمەسە ۇيىنە 1,5 ملن قازاقستاندىق قاراجات جيناقتاۋدا. بۇل ورايدا ولارعا مەملەكەت تە بارىنشا كومەك كورسەتۋدە. تۇرعىن ءۇي قۇرىلىس جيناق بانكى – ءوز سالىمشىلارىنا جىل سايىن 20 پايىز كولەمىندە مەملەكەت سىيلىقاقىسىن بەرەتىن بىرەگەي بانك. ول 200 ايلىق ەسەپتىك كورسەتكىشتەن اسپايتىن سوماعا ەسەپتەلىنەدى (505 000 تەڭگە). مەملەكەت تاراپىنان كورسەتىلىپ جاتقان بۇل كومەك بانك سالىمشىلارى ءۇشىن وتە ماڭىزدى. ويتكەنى ول دەپوزيتتە قاراجاتتى تەزىرەك جيناپ، ءۇي الۋعا مۇمكىندىك بەرەدى.

2019 جىلدىڭ قورىتىندىسى بويىنشا، ەڭ جوعارى مەملەكەت سىيلىقاقىسى – 101 مىڭ تەڭگە. ونى الۋ ءۇشىن وسى جىلدىڭ سوڭىنا دەيىن شوتتا كەم دەگەندە

505 000 تەڭگەنى جيناۋ قاجەت. ول ءۇشىن دەپوزيتكە 40 000 تەڭگەدەن استام قاراجاتتى اي سايىن نەمەسە بىردەن سالۋ كەرەك.

بانك سونداي-اق «نۇرلى جەر» باعدارلاماسىن جۇزەگە اسىرۋدا. ول حالىقتىڭ الەۋمەتتىك ءالسىز توپتارىن قولجەتىمدى باسپانامەن قامتاماسىز ەتۋگە باعىتتالعان. وتكەن جىلدىڭ قورىتىندىسى بويىنشا تۇرعىن ءۇي قۇرىلىس جيناق بانكى «نۇرلى جەر» باعدارلاماسى بويىنشا 8 724 جاڭا پاتەر كىلتىن تابىستادى.

باعدارلاما ىسكە قوسىلعالى بەرى (2016 جىلدىڭ سوڭىنان بەرى) 152,4 ملرد تەڭگە سوماسىنا 20 مىڭ پاتەر بەرىلدى. ولاردىڭ ىشىندە جەڭىلدەتىلگەن نەسيەگە ارنالعان قاراجاتتىڭ 78 پايىزى رەسپۋبليكالىق بيۋدجەتتەن ءبولىندى. ال 22 پايىزى – تۇرعىن ءۇي قۇرىلىس جيناق بانكىنىڭ ءوز قاراجاتى.

وسى جىلدىڭ 10 ايى ىشىندە تۇرعىن ءۇي قۇرىلىس جيناق بانكى مەملەكەتتىك باعدارلاما بويىنشا 6 147 نەسيەلىك ءوتىنىمدى ماقۇلدادى. ەڭ كوپ تۇرعىن ءۇي الماتى

(1 363 زايم), اقتوبە (810 زايم) وبلىستارى مەن شىمكەنت قالاسىندا (666 زايم) بەرىلدى.

جالپى، تۇرعىن ءۇي قۇرىلىس جيناق بانكى ارقىلى ءۇي الۋ ءۇشىن دەپوزيت اشىپ، شوتتا 20 پايىز مولشەرىندە باستاپقى جارنانى جيناۋ قاجەت. سول كەزدە سالىمشى نەسيەنى جىلدىق 5 پايىزدىق مولشەرلەمەمەن الا الادى. بانك الداعى جىلى «نۇرلى جەر»، «باقىتتى وتباسى» جانە «اسكەري باسپانا» باعدارلامالارىن جۇزەگە اسىرۋدى ارى قاراي جالعاستىراتىن بولادى. ءبىز ءاربىر وتباسىنىڭ ءوز باسپاناسى بولسا دەيمىز.

– سۇحباتىڭىزعا راقمەت!

 

سۇحباتتاسقان

اسەل انۋاربەك

سوڭعى جاڭالىقتار