21 قاراشا, 21:18 271 0 كولىك Túrkistan Gazeti

بالالار قاۋىپسىزدىگى تاعى ءسوز بولدى

كەشە وتكەن پارلامەنت ءماجىلىسىنىڭ جالپى وتىرىسىندا ەلىمىزدەگى مەكتەپتەردى ينسپەكتورلارمەن جەتكىلىكتى دەڭگەيدە قامتاماسىز ەتۋ تالاپ ەتىلدى. بۇل تۋرالى دەپۋتات يرينا ۋنجاكوۆا باستاما كوتەرىپ، پرەمەر-مينيستر اسقار ءماميننىڭ اتىنا دەپۋتاتتىق ساۋال دا جولدادى. 

حالىق قالاۋلىسى يرينا ۋنجاكوۆانىڭ ايتۋىنشا، كوپ جاعدايدا ينسپەكتورلار مەكتەپتە ەمەس، جيىندار مەن ءتۇرلى شارالاردا جۇرەدى. ءتىپتى، دەپۋتات مەكتەپ ينسپەكتورلارىنىڭ ءوز قىزمەتىندە ۇزاق تۇراقتامايتىنىن دا تىلگە تيەك ەتتى. «ولاردىڭ ءجيى اۋىسۋى سالدارىنان بالالار دا، مۇعالىمدەر دە مەكتەپ ينسپەكتورىنىڭ ءتۇرىن ەستە ساقتاپ ۇلگەرمەيدى. ىشكى ىستەر مينيسترلىگى  مالىمەتىنشە، قازىرگى كەزدە مەكتەپ ينسپەكتورلارىمەن جاساقتالماۋ دەڭگەيى 2 000 بىرلىكتى قۇراپ وتىر»، – دەدى دەپۋتات.

سونىمەن قاتار يرينا ۋنجاكوۆا بالالاردىڭ مەكتەپتەردە ءتيىستى دەڭگەيدە قورعالمايتىنىن ءسوز ەتتى. وعان اپتا باسىندا تارازدا ورىن العان وقيعا سەبەپ. ايتا كەتەيىك، تاراز قالاسىنداعى №6 مەكتەپتىڭ 7-سىنىپ وقۋشىسىن ءبىلىم ورداسىنىڭ اجەتحاناسىندا زورلاپ كەتكەن ەدى. «تارازداعى تراگەديا مەكتەپتەگى بەينەباقىلاۋ جۇيەسىنىڭ تيىمسىزدىگىن كورسەتتى. رەسمي جاڭالىقتاردا اتالعان ەر ادام مونيتورلاردا ءبىر ساعات بويى كورىنىپ تۇرعانى حابارلاندى. الايدا وعان ەشكىم نازار اۋدارماعان. جالپى، ءبىلىم بەرۋ ۇيىمدارىندا بالالاردىڭ ءومىرى مەن قاۋىپسىزدىگىنە مەكتەپ مەكەمەسىندە جۇمىس ىستەيتىن بارلىق ادام جاۋاپتى، ونىڭ ىشىندە مەكتەپ ينسپەكتورلارى دا بار»، – دەپ اتاپ ءوتتى ول.

ماڭىزدى ماسەلەلەردى جىپكە تىزگەن دەپۋتات كەشەندى ءارى جۇيەلى شارالاردى قابىلداۋ تۋرالى ۇسىنىس ءبىلدىردى. اسىرەسە، بارلىق مەكتەپتى عيمارات ىشىندەگى اجەتحانامەن قامتاماسىز ەتۋ، بەينەباقىلاۋ جۇيەسىن ينتەگراتسيالاۋ جۇمىستارىن جەدەلدەتۋ قاجەتتىگى ەسكەرتىلدى. سونداي-اق مەكتەپ ينسپەكتورلارىمەن تولىقتاي قامتاماسىز ەتۋ، بەيتانىس ادامداردىڭ ءبىلىم بەرۋ مەكەمەسىنىڭ اۋماعىنا كىرۋىن شەكتەۋ بويىنشا قاتاڭ ءتارتىپ ەنگىزۋ ۇسىنىلدى.

 

سوڭعى جاڭالىقتار