21 قاراشا, 21:15 271 0 ىشكى ساياسات انار لەپەسوۆا

ەلوردا 2025 جىلى گازبەن تولىق قامتىلادى

نۇر-سۇلتان قالاسىنىڭ تۇرعىندارى 2025 جىلى تولىقتاي كوگىلدىر وتىنمەن قامتىلماق. بيىل باستالاتىن جوبا ءۇش كەزەڭمەن جۇزەگە اسىرىلادى.

قازىرگى ۋاقىتتا جوبانىڭ ءبىرىنشى كەزەڭى باستالىپ، 9 كوگىلدىر وتىن جىبەرۋ كەشەنى سالىندى. ول ءۇشىن رەسپۋبليكالىق بيۋدجەتتەن 2,2 ملرد تەڭگە قاراستىرىلعان. نۇر-سۇلتان قالاسىندا گاز جۇرگىزىلەتىن العاشقى شاعىن اۋدانداردىڭ ءبىرى – كوكتال-1, كوكتال-2 جانە جەو-1, جەو-2 اۋداندارى. اۋداندار ماگيسترالدى گاز قۇبىرىنا كەلەسى 2020 جىلدىڭ كۇزىنە دەيىن قوسىلادى.

ال تۇرعىندار تەك ءوز ۇيلەرىنە پەش ورناتۋ جۇمىستارىن جۇرگىزۋى كەرەك. ءاربىر ۇيگە گاز قۇبىرىن جەتكىزۋ جانە ەسەپتەۋىش قۇرالدارىن ورناتۋ ەلوردا اكىمدىگىنىڭ ەسەبىنەن جۇرگىزىلەدى.  اكىمدىك «اقىلدى» ەسەپتەۋىش قۇرالدارىن ورناتاتىن بولادى. «بىزدە نارىقتاعى باعاسى 15 مىڭ تەڭگەگە جۋىقتايتىن ەرەكشە ەسەپتەۋىش قۇرالدارىمەن قامتۋ ەسكەرىلگەن. سونىمەن قاتار كورسەتكىشتەردى ديستانتسيالىق تۇردە بەرە الاتىن ەسەپتەۋىش قۇرالدارى بار. بۇل بىرىنشىدەن، تۇرعىنداردى قاجەتسىز باقىلاۋشىلارمەن ىعىر قىلمايدى. وسى ەسەپتەۋىش قۇرالدارىنىڭ كورسەتكىشتەرى ديستانتسيالىق تۇردە بەرىلەدى»، – دەيدى نۇر-سۇلتان قالاسى اكىمدىگىنىڭ وتىن-ەنەرگەتيكا كەشەنى جانە كوممۋنالدىق شارۋاشىلىق باسقارماسىنىڭ باسشىسى ەرنات ءبازىل.

ايتا كەتەيىك، گاز قۇبىرىن ۇيگە دەيىن تارتۋ، پلومبالاۋ جانە ءۇيدى گاز قۇبىرىنا قوسۋ بويىنشا قالعان جۇمىستاردى تۇتىنۋشىنىڭ ءوزى اتقارادى. «ءبىز بيۋدجەت قاراجاتىن جەكە سەكتوردا پايدالانا المايمىز. گازدى جەكەمەنشىك يەلىك اۋماعىنا دەيىن، ياعني ءبىزدىڭ دالىزگە جاتاتىن اۋماق بويىنشا عانا جەتكىزەمىز. ال جەكەمەنشىك سەكتور اۋماعىنا بيۋدجەت قاراجاتىن جۇمساي المايمىز. ول جەرلەرگە ءۇي يەسىنىڭ شىعىندارى جۇمسالادى»، – دەپ ءتۇسىندىردى ەرنات ءبازىل.

سوڭعى جاڭالىقتار