21 قاراشا, 21:14 297 0 قوعام Túrkistan Gazeti

سينگاپۋر مودەلى – ءتيىمدى ۇلگى

كەشە ەلىمىزدىڭ باس قالاسىندا ستراتەگيالىق  باستامالار فورۋمى ءوتتى. فورۋمعا CSI ساراپشىلارى، مەملەكەتتىك ورگانداردىڭ، ۇلتتىق كومپانيالاردىڭ باسشىلارى، قوعام جانە ساياسات قايراتكەرلەرى، ەكونوميستەر قاتىستى.

ماڭىزدى شارا بارىسىندا ەل دامۋىنىڭ وزەكتى ماسەلەلەرى، جاڭا «ءوسىم نۇكتەلەرىن» تابۋ جايتتارى تالقىلاندى. ەڭ الدىمەن ساراپشىلار جاڭا ەكونوميكالىق ساياسات جانە بانك سەكتورىنا قاتىستى ماسەلەلەردى ءسوز قىلدى. بۇل رەتتە ستراتەگيالىق باستامالار ورتالىعىنىڭ باس سەرىكتەسى ولجاس قۇدايبەرگەنوۆ ورتالىق ازىرلەگەن جاڭا ەكونوميكالىق ساياساتتىڭ قازاقستاندا ۇزاقمەرزىمدى نەسيە كولەمىن ارتتىرۋعا مۇمكىندىك بەرەتىنىن اتاپ ءوتتى. «بىراق ەڭ الدىمەن پروبلەمالىق نەسيەلەردىڭ بارلىعىن قايتا قۇرىلىمداۋ قاجەت. قازىرگى كەزدە بانك سەكتورى تۇبەگەيلى تەكسەرىلىپ جاتىر، تەكسەرىس ناتيجەسىندە سالاداعى ناقتى تۇيتكىلدەردىڭ ءبارى انىقتالادى. سودان كەيىن قايتارىمسىز نەسيەنىڭ ءبارىن قايتا قۇرىلىمداپ،  بانك سەكتورىن تازالاۋ قاجەت. 2007 جىلى ىشكى جالپى ونىمدەگى نەسيە كولەمى 57 پايىزدى قۇراعان، ءبىز وسى كورسەتكىشكە قول جەتكىزە الامىز. الايدا بۇرىنعى قاتەلىكتەردى قايتالاماس ءۇشىن، الىپ-ساتۋعا قارسى شارالاردى قولعا الۋ كەرەك»، – دەدى ولجاس قۇدايبەرگەنوۆ.

سونداي-اق فورۋم اياسىندا ەلىمىزدىڭ زەينەتاقى جۇيەسىن سينگاپۋر ۇلگىسىندە قايتا جاڭعىرتۋ ۇسىنىلدى. ساراپشىلاردىڭ پىكىرىنشە، ءدال قازىر بۇل مودەل قازاقستان ءۇشىن ەڭ قولايلى ءارى ءتيىمدى ۇلگىلەردىڭ ءبىرى. جاڭا مودەل ەڭبەكاقى تولەۋ قورىنا سالىناتىن سالىقتى ازايتۋعا دا مۇمكىندىك بەرەتىن كورىنەدى.

 

سوڭعى جاڭالىقتار