21 قاراشا, 19:29 279 0 رۋحانيات "تۇركىستان" گازەتىنىڭ اۆتورلارى

«جاقسىلار، داستان ايتايىن...»

تۇركىستاندا «رۋحاني جاڭعىرۋ» باعدارلاماسى اياسىندا جاس جىرشىلاردىڭ العىرلىعى مەن بىلىمدىلىگىن انىقتايتىن «جاقسىلار، داستان ايتايىن...» بايقاۋى ءوتتى.

جاس ۇرپاقتى نامىستى، قايسار ەتىپ تاربيەلەۋ، ولاردى حالقىمىزدىڭ رۋحاني قۇندىلىقتارىمەن سۋسىنداتۋ ماقساتىندا تۇركىستان وبلىستىق قوعامدىق دامۋ باسقارماسىنىڭ قولداۋىمەن، «وڭتۇستىك قازاقستان» گازەتىنىڭ ۇيىمداستىرۋىمەن ءداستۇرلى بايقاۋ ءۇشىنشى رەت ءوتىپ وتىر. «جاقسىلار، داستان ايتايىن...» بايقاۋىنىڭ ماقساتى – بالالار اراسىندا كىتاپ وقۋدى جانە قازاق حالقىنىڭ باتىرلىق ەپوستارىن ناسيحاتتاۋ، بالالاردى قازاق حالقىنىڭ رۋحاني اسىل مۇراسىنا دەگەن سۇيىسپەنشىلىككە جانە وتانسۇيگىشتىككە تاربيەلەۋ، ەلدىك پەن ەرلىك رۋحىنا، نامىسشىلدىق  پەن قايسارلىق قاسيەتتەرگە باۋلۋ.  بايقاۋدىڭ العاشقى جىلى «قامبار باتىر» جىرىن، ودان كەيىنگى جىلى «الپامىس باتىر» جىرىن جاتقا ايتۋدان سىنعا تۇسسە، بيىلعى بايقاۋ «قوبىلاندى باتىر» جىرىنا ارنالدى.

بايقاۋدىڭ العاشقى كەزەڭىندە باتىرلار جىرىن جاتقا ايتۋدان سۇرىنبەي وتكەن ۇمىتكەرلەر ەكىنشى كەزەڭدە ادەبيەت، رۋحانيات تاقىرىبى بويىنشا سۇراقتارعا جاۋاپ بەرىپ، باعىن سىنادى. ەكى كەزەڭدە دە ەڭ جوعارى ۇپاي جيناعان تالانتتار شەشۋشى سىندا «قوبىلاندى باتىر» جىرىنداعى كونەرگەن سوزدەردىڭ ماعىناسىن اشۋ بويىنشا قازىلاردىڭ سۇراقتارىنا جاۋاپ بەردى. بايقاۋدا جەڭىسكە جەتكەن سوزاق اۋدانىنىڭ تۋماسى وسەر تۇران ءبىرىنشى ورىن الىپ، 1 ملن تەڭگە، ونى دايىنداعان ۇستازى اسىلزات امەتوۆاعا  2 ملن تەڭگە قارجىلاي سىيلىق بەرىلدى. ەكىنشى ورىندى يەلەنگەن سوزاق اۋدانىنىڭ ۇمىتكەرى ءرابيا شالتايعا 600 مىڭ تەڭگە، ۇستازى جازيرا سانكىباەۆاعا 1 ملن 200 مىڭ تەڭگە بەرىلدى. جۇلدەلى ءۇشىنشى ورىن يەگەرى تولە بي اۋدانىنان قاتىسقان نۇرسۇلتان تۇرماحانعا 300 مىڭ تەڭگە، ۇستازى ءلاززات ساندىباەۆاعا 600 مىڭ تەڭگە اقشالاي سىياقى تابىستالدى. اتالعان بايقاۋ ەڭ العاش رەت 2017 جىلى ۇيىمداستىرىلىپ، سودان بەرى رەسپۋبليكا كولەمىندە كەڭىنەن قولداۋ تاۋىپ، بارلىق وڭىردە وتكىزىلىپ كەلەدى.

ارايلىم بيمەنديەۆا

سوڭعى جاڭالىقتار