21 قاراشا, 09:31 271 0 ءبىلىم انار لەپەسوۆا

الماتىدا اۋىر دەرتكە شالدىققان ازاماتتى ۇرعان ستۋدەنت وقۋدان شىعارىلادى

جاتاقحاناداعى كورشىسىنەن تاياق جەگەن كلوۋن سامات رامازانوۆ ءبىر-ەكى كۇندە اۋرۋحانادان شىعۋى مۇمكىن. بۇل تۋرالى بۇل تۋرالى الماتى قالالىق جەدەل كومەك كورسەتۋ اۋرۋحاناسىنىڭ دارىگەرلەرىنە سىلتەمە جاساپ «حابار 24» حابارلادى. 

مۋكوپوليساحاريدوز گەنەتيكالىق دەرتىنە شالدىققان سامات رامازانوۆتى جاتاقحانادا بىرگە تۇراتىن ستۋدەنت سوققىعا جىققان. ەكەۋى دە – تۇران ۋنيۆەرسيتەتىنىڭ ستۋدەنتتەرى. قىركۇيەكتەن بەرى ءبىر بولمەدە تۇرعان. كەلەڭسىز جايتتان ءبىر كۇن ىلگەرى سامات دەنساۋلىعى ناشارلاپ، جەدەل جاردەم شاقىرتادى. تەكسەرۋدەن سوڭ دارىگەرلەر تىنىشتىق كەرەكتىگىن ايتقان. 

– ول كۇنى بويى دەمالىپ، ۇيىقتايدى. كورشىسى قايتا-قايتا تەرەزەنى اشا بەرگەن سوڭ سامات وعان ەسكەرتۋ جاسايدى. ول ءسوز قايتارادى. ساماتتىڭ ايتۋى بويىنشا، ەسىكتى ىشىنەن قۇلىپتاپ الىپ، ونى سوققىعا جىققان، - دەيدى قوعامدىق قوردىڭ ءتورايىمى ەلميرا اليەۆا. 

وسى جاعدايدان سوڭ سامات دەرەۋ اۋرۋحاناعا جەتكىزىلەدى. باس سۇيەگىنە رەنتگەن جاسالىپ، تەراپەۆت، كارديولوگ تەسكەرەدى.

– باس جاراقاتى، باستىڭ شاشتى ءبولىمىنىڭ، بەتتىڭ جۇمساق تىندەرىنىڭ جاراقاتى بار. جاعدايى بىرقالىپتى. قازىر كەرەكتى ەمىنىڭ ءبارىن الىپ جاتىر. تىنىشتىق قالىپتا. نەيروحيرۋرگيا بولىمىندە جاتىر. جاعدايىنا قاراپ 1-2 كۇن شاماسىندا اۋرۋحانادان شىعارامىز، - دەيدى قالالىق جەدەل شۇعىل كومەك كورسەتۋ اۋرۋحاناسىنىڭ ءبولىم باسشىسى باقىتجان ابدىقادىروۆ، 

سامات ءوز دەرتىنە قاراماستان، پەدياتريا جانە بالالار حيرۋرگياسى عىلىمي ورتالىعىندا كلوۋن بولىپ ىستەيدى. ەكى كۇننەن بەرى ساماتتىڭ جۇمىس ورنى بوس تۇر. بۇل جەردە ول ءارتۇرلى كىتاپشالار جاساپ، ونكولوگيالىق اۋرۋعا شالدىققان بالاقايلارعا سىيلاپ، كوڭىلدەرىن اۋلايتىن ەدى. سول بۇلدىرشىندەر ساماتتى اسىعا كۇتىپ ءجۇر.

بۇل جاعداي قوعامدا قىزۋ پىكىرتالاس تۋدىردى. سامات رامازانوۆ بوستاندىق اۋداندىق پوليتسيا باسقارماسىنا ارىز بەرگەن. قازىر تەرگەۋ امالدارى ءجۇرىپ جاتىر. ساراپتاما قورىتىندىسىنا سايكەس پروتسەسسۋالدى شەشىم قابىلدانادى. ۋنيۆەرسيتەت باسشىلىعى دا بەي-جاي قارامايتىندارىن جەتكىزدى. 30 جاستاعى كلوۋنعا قول جۇمساعان 18 جاستاعى ستۋدەنت وقۋدان شىعارىلاتىن بولدى.

– ەكى جاقتان دا اتا-انالار كەلدى. انالارى جىلاپ وتىر. الدىن الا كەلىسكەن ەكەن. كەشىرەتىنىن ايتىپتى. بىراق ءبىز ، كەشىردى مە، كەشىرمەدى مە؟ كەشىرسە، ارىزدى الاتىن بولسا، وندا ءىس قوزعالماۋى مۇمكىن. بىراق ءبىز ونى كەشىرمەيمىز. ءبىز ول بالانى وقۋدان شىعارامىز. كەيىن قايتىپ كەلەمىن دەسە، ءوزى بىلەدى، - دەيدى «تۇران» ۋنيۆەرسيتەتىنىڭ رەكتورى راحمان الشانوۆ. 

تۋا ءبىتتى تۇقىم قۋالايتىن مۋكوپوليساحاريدوز دەرتىنە ەلىمىزدە 47 ادام شالدىققان. ازىرگە بۇل دەرتتىڭ ەمى جوق. قىمبات تەراپيا اۋرۋدى تەك تەجەيدى. سوندىقتان اۋىر سوققى تۇگىلى، ارتىق ءسوزدىڭ ءوزى ساماتتىڭ ومىرىنە قاۋىپ ءتوندىرۋى مۇمكىن.

سوڭعى جاڭالىقتار